ຈະປັບປຸງດ່ານນ້ຳເງິນ ແຂວງໄຊຍະບູລີໃຫ້ມີຄວາມເປັນເອກະລັກຂອງທ້ອງຖິ່ນ

ວັນທີິ 23 ພຶດສະພາ 2023 ທີ່ຜ່ານມາ, ກອງປະຊຸມປຶກສາຫາລືກ່ຽວກັບແຜນການຄຸ້ມຄອງສິ່ງແວດລ້ອມ ແລະ ສັງຄົມ ຂອງໂຄງການປັບປຸງດ່ານນ້ຳເງິນ ແບບລະບົບເຊິ່ງໜ້າ ແລະ ທາງໄກ.

ໂຄງການພັດທະນາຕາມແລວທາງເສດຖະກິດອາຊີຕາເວັນອອກສຽງໃຕ້ ເພື່ອການເຊື່ອມຈອດ ແລະ ເຊື່ອມໂຍງ (SEARECC) ນີ້ເປັນໂຄງການໜຶ່ງທີ່ນອນຢູ່ໃນແຜນພັດທະນາເສດຖະກິດແຫ່ງຊາດ 5 ປີຄັ້ງທີ 9 ຂອງລັດຖະບານລາວ ແລະ ມີຄວາມໝາຍ ຄວາມສໍາຄັນເປັນຢ່າງຍິ່ງຕໍ່ກັບການພັດທະນາເສດຖະກິດ-ສັງຄົມ ຂອງຊາດກໍຄືທ້ອງຖິ່ນ. ຈາກປະເທດທີ່ບໍມີທາງອອກສູ່ທະເລ (land lock ໃຫ້ກາຍເປັນປະເທດ ສາມາດເຊື່ອມໂຍງ, ເຊື່ອມຈອດ ກັບບັນດາປະເທດໃນພາກພື້ນ ແລະ ທົ່ວໂລກ land link)

ກອງປະຊຸມໃນຄັ້ງນີ້ໄດ້ພ້ອມກັນຄົ້ນຄວ້າ, ປຶກສາຫາ ແລະ ຮັບຟັງການນໍາສະເໜີລາຍງານ ສະພາບໂດຍລວມ ຂອງໂຄງການພັດທະນາຕາມແລວທາງເສດຖະກິດອາຊີຕາເວັນອອກສຽງໃຕ້ ເພື່ອການເຊື່ອມໂຍງ ແລະ ເຊື່ອມຈອດ; ຄົ້ນຄວ້າ, ວິເຄາະ-ວິໄຈບັນດາຂໍ້ມູນຕ່າງໆ ໃນການສຶກສາຄວາມເປັນໄປໄດ້ ການອອກແບບ, ການວາງແຜນຄຸ້ມຄອງ ຜົນກະທົບທາງດ້ານສິ່ງແວດລ້ອມ ແລະ ສັງຄົມ ເພື່ອຈະນຳເອົາຂໍ້ມູນຂອງໂຄງການໄປປຶກສາຫາລືໃຫ້ມີຄວາມເປັນເອກະພາບກັນ.

ຈາກນັ້ນ ບໍລິສັດທີ່ປຶກສາ ໄດ້ລາຍງານສະພາບຄວາມຄືບໜ້າກ່ຽວກັບການກວດກາ, ການປະເມີນພາກສະຫນາມ ຂອງສະພາບຕົວຈິງ ແລະ ຄວາມຄືບໜ້າໃນການສໍາຫຼວດ-ອອກແບບເບື້ອງຕົ້ນ.ເພື່ອນໍາເອົາຄໍາສະເໜີຈາກພາກສ່ວນທີ່ກ່ຽວຂ້ອງໃນກອງປະຊຸມຄັ້ງນີ້ນໍາໄປປັບປຸງແກ້ໄຂ ເຮັດໃຫ້ການອອກແບບຜັງດ່ານສາກົນນໍ້າເງິນໃຫ້ມີຄວາມແທດເໝາະກັບ ສະພາບຄວາມເປັນຈິງ ມີຮູບຊົງທີ່ເປັນເອກະລັກທາງດ້ານວັດທະນະທໍາຂອງທ້ອງຖິ່ນ.