ທ່ານນາຍົກ ເຂົ້າຮ່ວມກອງປະຊຸມຄົບຄະນະບໍລິຫານງານພັກກາງສະໄໝ ແຂວງອັດຕະປື ເພື່ອທົບທວນຄືນໝາກຜົນແຫ່ງການຊີ້ນຳ-ນຳພາ

ກອງປະຊຸມຄົບຄະນະບໍລິຫານງານພັກແຂວງ ອັດຕະປື ກາງສະໄໝ XI ໄດ້ດຳເນີນໄປແຕ່ ວັນທີ 29 ພຶດສະພາ ຫາ 1 ມິຖຸນາ 2023, ເຂົ້າຮ່ວມໂດຍ ສະຫາຍ ສອນໄຊ ສີພັນດອນ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ, ມີສະຫາຍ ເລັດ ໄຊຍະພອນ ກຳມະການສູນກາງພັກ ເລຂາພັກແຂວງ ເຈົ້າແຂວງອັດຕະປື.

ໃນກອງປະຊຸມ, ສະຫາຍ ເລັດ ໄຊຍະພອນ ກ່າວວ່າ:  ເພື່ອກວດກາຕີລາຄາ ແລະ ທົບທວນຄືນໝາກຜົນແຫ່ງການຊີ້ນຳ-ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ກົດລະບຽບພັກ, ມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງ, ແຜນພັດທະນາເສດຖະກິດສັງຄົມ 5 ປີ ຂອງອົງຄະນະພັກແຂວງຕະຫລອດໄລຍະແຫ່ງການນຳພາຈັດຕັ້ງປະຕິບັດເນື້ອແຜນການນຳພາ-ຊີ້ນຳຂອງອົງຄະນະພັກໃນ 2 ປີເຄິ່ງຜ່ານມາ ຢ່າງຮອບດ້ານ, ຖືກຕ້ອງ ແລະ ພາວະວິໄສ, ຊອກໃຫ້ເຫັນດ້ານຜົນສຳເລັດທີ່ຕັ້ງໜ້າໃນແຕ່ລະຂົງເຂດວຽກງານໃນການສືບຕໍ່ເສີມຂະຫຍາຍ ແລະ ຍົກລະດັບ, ດັດປັບບັນດາເນື້ອໃນ, ວິທີການ, ມາດຕະການຈັດຕັ້ງປະຕິບັດໃນຕໍ່ໜ້າໃຫ້ມີປະສິດທິຜົນສູງຂຶ້ນກວ່າເກົ່າ, ພ້ອມທັງຕີລາຄາຊອກໃຫ້ເຫັນບັນດາບັນຫາຈຸດອ່ອນ, ສາເຫດ, ທັງຊອກໃຫ້ເຫັນຢ່າງເລິກເຊິ່ງ ປັດໄຈທີ່ພົວພັນເຖິງບັນຫາດັ່ງກ່າວ ເພື່ອມີວິທີແກ້ໄຂຢ່າງຖືກຕ້ອງ, ສອດຄ່ອງ ແລະ ທັນການແນໃສ່ສ້າງ ແລະ ຍົກສູງຄວາມສາມາດນຳພາຂອງພັກ, ຄວາມເປັນແບບຢ່າງນຳໜ້າຂອງ ບັນດາສະຫາຍຄະນະບໍລິຫານງານພັກແຂວງແຕ່ລະສະຫາຍ, ສ້າງຄວາມເອກະພາບ ແລະ ຄວາມຕັດສິນໃຈສູງໃນທົ່ວອົງຄະນະພັກແຂວງ, ເຮັດໃຫ້ພັກມີຄວາມປອດໃສ, ໜັກແໜ້ນ, ເຂັ້ມແຂງ ທັງເປັນການຍົກສູງພາລະບົດບາດຄວາມສາມາດນຳພາຂອງຄະນະພັກ ໃຫ້ສົມຄູ່ກັບການເລັ່ງທວງຂອງໜ້າທີ່ການເມືອງໃນໄລຍະໃໝ່.

ໂອກາດນີ້, ສະຫາຍ ສອນໄຊ ສີພັນດອນ ໄດ້ມີຄຳເຫັນໂອ້ລົມ ແລະ ຮຽກຮ້ອງໃຫ້ຄະນະພັກທຸກສະຫາຍ ຕ້ອງເປັນເຈົ້າການຍົກສູງຄວາມຮັບຜິດຊອບການເມືອງຂອງຕົນ, ການດຳເນີນທາບທາມຄວາມໄວ້ວາງໃຈ ຕໍ່ການນຳພາລວມ ແລະ ບຸກຄົນ ໃນຄະນະບໍລິຫານງານພັກແຂວງ ເພື່ອເຮັດໃຫ້ບັນລຸຕາມຄາດໝາຍ ແລະ ເນື້ອໃນວຽກງານທີ່ກຳນົດໄວ້, ການລົງຄະແນນສຽງ ຕ້ອງພ້ອມກັນເອົາໃຈ ໃສ່ຍົກສູງຄວາມຮັບຜິດຊອບ, ມີຄວາມຈິງໃຈໃນການລົງຄະແນນຢັ່ງຫາງສຽງ, ຫລີກເວັ້ນແນວຄິດອະຄະຕິ, ສວຍໂອກາດໂຄ່ນລົ້ມໂຈມຕີ, ໃສ່ຮ້າຍປ້າຍສີ ເຊິ່ງກັນ ແລະ ກັນ, ລວມທັງທັດສະນະກໍຄືການກະທຳອື່ນທີ່ບໍ່ຖືກຕ້ອງ.

ທັງນີ້ກໍເພື່ອຮັບປະກັນໃຫ້ຜົນການທາບທາມຄະແນນໃນຄັ້ງນີ້ ມີປະສິດພາບ ແລະ ປະສິດທິຜົນສູງ, ເຮັດໃຫ້ກອງປະຊຸມໃນຄັ້ງນີ້ ດໍາເນີນໄປຕາມວາລະ, ລະບຽບການທີ່ວາງໄວ້, ເປັນເຈົ້າການຄົ້ນຄວ້າຕີລາຄາທຸກບັນຫາໃຫ້ເລິກເຊິ່ງຈະແຈ້ງ ແລະ ຊອກໃຫ້ເຫັນດ້ານຕັ້ງໜ້າເພື່ອເສີມຂະຫຍາຍໃຫ້ດີຂຶ້ນເປັນກ້າວໆ.