ຮາແລນ ສ້າງສະຖິຕິໃຫມ່ເປັນນັກເຕະຄົນທຳອິດທີ່ຄວ້າລາງວັນນັກເຕະດີເດັ່ນ-ດາວຮຸ່ງ ພຣີເມຍລີກ

ເອີລິງ ເບຣົາ ຮາແລນ ກາຍເປັນນັກເຕະຄົນທຳອິດທີ່ຄວ້າລາງວັນທັງນັກເຕະດີເດັ່ນ ແລະ ນັກເຕະດາວຮຸ່ງດີເດ່ັນປະຈຳລະດູການຂອງພຣີເມຍລີກ ອັງກິດ.

ເອີລິງ ເບຣົາ ຮາແລນ ສູນກອງໜ້າຂອງ ແມນເຊສເຕີ ຊິຕີ ສ້າງປະຫວັດສາດໜ້າໃຫມ່ອີກຄັ້ງຫນຶ່ງ ເມື່ອກາຍເປັນນັກເຕະທຳອິດທີ່ໄດ້ຮັບເລືອກໃຫ້ຄວ້າລາງວັນທັງນັກເຕະດີເດ່ັນ ແລະ ນັກເຕະດາວຮຸ່ງດີເດ່ັນປະຈຳລະດູການຂອງພຣີເມຍລີກ ອັງກິດ.

ນອກຈາກລາງວັນນັກເຕະດີເດັ່ນແລ້ວ ຮາແລນ ທີ່ປັດຈຸບັນຢູ່ໃນໄວ 22 ປີ ຍັງມີຊື່ເຂົ້າລາງວັນດາວຮຸ່ງດີເດັ່ນ ເຊິ່ງຈະມອບໃຫ້ສຳລັບຜູ້ຫລິ້ນອາຍຸບໍ່ເກີນ 23 ປີ ແລະ ລາວກໍໄດ້ຮັບເລືອກໃຫ້ຄວ້າ 2 ລາງວັນດັ່ງກ່າວ ເຊິ່ງບໍ່ເຄີຍມີໃຜເຮັດໄດ້ມາກ່ອນ.

ໂດຍ ຮາແລນ ກ່າວວ່າ : “ ຂ້ອຍພູມໃຈທີ່ກາຍເປັນນັກເຕະຄົນທຳອິດທີ່ຄວ້າທັງ 2 ລາງວັນໃນລະດູການດຽວ ຂອບໃຈທຸກຄົນທີ່ລົງຄະແນນໃຫ້ຂ້ອຍ ມັນເປັນເວລາທີ່ດີຫລາຍກັບລະດູການທຳອິດໃນພຣີເມຍລີກຂອງຂ້ອຍ ການໄດ້ຊູຂັນແຊ໊ມຕໍ່ໜ້າແຟນບານຂອງເຮົານັ້ນເປັນເວລາພິເສດຫລາຍ ”.

ກ່ອນໜ້ານີ້ ຮາແລນ ກໍຄວ້າລາງວັນນັກເຕະດີເດ່ັນປະຈຳລະດູການຈາກຈາກສະມາຄົມຜູ້ສື່ຂ່າວບານເຕະອັງກິດ ແລະ ລາວກຽມຄວ້າລາງວັນດາວຍິງສູງສຸດພຣີເມຍລີກ ນຳອີກ ໂດຍຫລັງຈາກນີ້ ແມນຊິຕີ ມີນັດຊີງຊະນະເລີດເອຟເອ ຄັບ ແລະ ຢູຟາ ແຊ໊ມປຽນ ລີກ ຖ້າຢູ່.