ຈອດລົດຕາມທາງຫລວງແນວໃດໃຫ້ຖືກຕ້ອງ ທັງປອດໄພ ບໍ່ກີດຂວາງການສັນຈອນໄປມາຂອງຄົນອື່ນ

ທຸກມື້ນີ້ຢູ່ຕາມທ້ອງຖະໜົນຫົນທາງຕາມຕົວເມືອງນ້ອຍ, ໃຫຍ່ ຫລື ນະຄອນ ເຮົາຈະເຫັນວ່າມີລົດລາງພາຫະນະ ຫລາຍຂະໜາດມີທັງນ້ອຍ, ໃຫຍ່, ສັ້ນ, ຍາວ, ແລ່ນດ້ວຍໄຟຟ້າແລ່ນດ້ວຍນ້ຳມັນເຊື້ອໄຟ ເປັນສ່ວານສົນ ແລະ ຈອດຍັ່ງຍາຍຕາມຢ່າງຫລວງຫລາຍ, ທາງຫລວງທາງຮ່ອມ ນີ້ມັນອາດຈະສ່ອງແສງເຖິງຄວາມເຂັ້ມແຂງທາງດ້ານເສດຖະກິດ-ສັງຄົມຂອງ ປະເທດເຮົາໄປໃນທາງທີ່ດີຂຶ້ນ.

ການຈອດລົດທີ່ບໍ່ເໝາະສົມແລ້ວແຕ່ອາລົມຂອງຜູ້ຂັບລົດມັນເປັນການສ້າງຄວາມບໍ່ປອດໄພ ແລະ ສ້າງຄວາມລຳຄານຕໍ່ຄົນອື່ນຊຶ່ງເຫັນໄດ້ຢ່າງແຜ່ຫລາຍ ເຊັ່ນ: ຈອດຕາມບ່ອນທາງໂຄ້ງ, ຈອດຕາມຈຸດສາມແຍກ, ສີ່ແຍກ, ປາກທາງຮ່ອມທາງຊອຍ, ບ່ອນທາງແຄບ ບ່ອນບໍ່ຮັບປະກັນຄວາມປອດໄພ ເຊິ່ງຈຸດເຫລົ່ານີ້ຕາມມາລະຍາດຂອງຜູ້ຂັບຂີ່ທີ່ດີແລ້ວແມ່ນບໍ່ຄວນຈອດ ຫລື ຖ້າຈຳເປັນຕ້ອງຈອດກໍໃຫ້ຈອດທາງຊື່, ຈອດຫ່າງຈາກປາກທາງຮ່ອມ, ທາງແຍກຢ່າງຕ່ຳ 5 ແມັດຂຶ້ນໄປເພື່ອຄວາມປອດໄພຂອງລົດຄັນອື່ນເວລາລ້ຽວ ຫລື ເຫັນວ່າບ່ອນອ່າວ ກ້ວາງສາມມາດຫລີກກັນໄດ້ຈຶ່ງຈອດ, ຊຶ່ງທັງໝົດນີ້ແມ່ນພື້ນຖານການຮັກສາຄວາມປອດໄພຈາກອຸບັດຕິເຫດຕາມທ້ອງຖະໜົນ ຊຶ່ງຜູ້ຂັບຂີ່ພາຫະນະທຸກຄົນຕ້ອງຮູ້.

ເມື່ອເສດຖະກິດ-ສັງຄົມດີຂຶ້ນກໍບໍ່ໄດ້ໝາຍຄວາມວ່າທາງດ້ານສາມັນສຳນຶກຂອງຜູ້ໃຊ້ລົດໃຊ້ຖະໜົນຈະດີຂຶ້ນໄປນໍາ, ນີ້ບໍ່ໄດ້ໝາຍຄວາມວ່າຈະຕີລວດກວດພຽງ, ຊຶ່ງສ່ວນຫລວງຫລາຍເຫັນວ່າປະຕິບັດຕາມລະບຽບການສັນຈອນທາງບົກໄດ້ດີ ສົມກັບມີໃບອະນຸຍາດການຂັບລົດ ແທ້ໆ, ແຕ່ວ່າກໍ່ຍັງມີກຸ່ມຄົນຈຳນວນນື່ງຍັງມີແນວຄິດເຫັນແກ່ໂຕຖືເບົາມັກງ່າຍ ຈອດລົດລາງພາຫະນະຕາມທາງຫລວງ, ທາງຮ່ອມ, ທາງຊອຍຢ່າງບໍ່ຖືກຕ້ອງ ສ້າງຄວາມຫຍຸ້ງຍາກສັບສົນ ແລະ ສ້າງຄວາມລຳຄານໃຫ້ຄົນອື່ນແລະໜັກໄປກວ່ານັ້ນອາດພາໃຫ້ເກີດອຸປະຕິເຫດກໍ່ເປັນໄດ້ ຊຶ່ງກໍຍັງມີໃຫ້ເຫັນຢູ່ເປັນປະຈຳ, ດ້ວຍສາມັນສຳນຶກອັນຖຶກຕ້ອງຜູ້ຂັບຂີ່ທີ່ດີມີມາລະຍາດ ຕ້ອງຄຳນຶ່ງຢູ່ສະເໝີວ່າຈອດລົດຕາມທາງຫລວງແນວໃດໃຫ້ຖືກຕ້ອງທັງປອດໄພ ບໍ່ກີດຂວາງການສັນຈອນໄປມາຂອງຄົນອື່ນ.