ປກສ ລາວ-ຈີນ ເພີ່ມທະວີການພົວພັນຮ່ວມມືວຽກງານຮັກສາຄວາມສະຫງົບປອດໄພ ໃນຫລາຍດ້ານ
ໂດຍຕອບສະໜອງຕາມຄຳເຊີນ ຂອງສະຫາຍ ຫວາງ ຊ່ຽວຫົງ, ທີ່ປຶກສາແຫ່ງລັດ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປ ຈີນ; ສະຫາຍ ພົນເອກ ວິໄລ ຫລ້າຄຳຟອງ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບ ສປປ ລາວ ໄດ້ເຄື່ອນໄຫວສັນທະວະໄມຕີ ແລະ ເຮັດວຽກຢູ່ ຢູ່ນະຄອນຫລວງປັກກິ່ງ ສາທະລະນະລັດ ປະຊາຊົນຈີນ ຢ່າງເປັນທາງການ ໃນລະຫວ່າງວັນທີ 24-26 ພຶດສະພາ 2023 ເພື່ອຈັດຕັ້ງປະຕິບັດເນື້ອໃນຈິດໃຈ ທີ່ການນໍາສູງສຸດຂອງສອງພັກ, ສອງລັດ ໄດ້ເປັນເອກະພາບຮ່ວມກັນ ທັງສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານ ລະຫວ່າງສອງຊາດ, ສອງກຳລັງປ້ອງກັນຄວາມສະຫງົບລາວ-ຈີນ ໃຫ້ກ້າວສູ່ລວງເລິກ ທັງເປັນການເສີມຂະຫຍາຍສາຍພົວພັນຕາມທິດ 4 ດີ.
ໂອກາດນີ້, ສອງຝ່າຍໄດ້ມີກອງປະຊຸມພົບປະສອງຝ່າຍ ເພື່ອທົບທວນຄືນ ການຈັດຕັ້ງປະຕິບັດການຮ່ວມມືສອງຝ່າຍ ຜ່ານມາ ແລະ ປຶກສາຫາລື ເພື່ອກຳນົດທິດທາງແຜນການຮ່ວມມື ສຳລັບປີ 2023. ເຊິ່ງໄລຍະຜ່ານ ທີ່ທັງສອງກະຊວງ ປກສ ລາວ ແລະ ຈີນ ໄດ້ເສີມຂະຫຍາຍສາຍພົວພັນຮ່ວມມືນັບມື້ກ້າວເຂົ້າສູ່ລວງເລິກຢ່າງບໍ່ຢຸດຢັ້ງ ແລະ ມີໝາກຜົນທີ່ໜ້າພາກພູມໃຈ, ເປັນຕົ້ນແມ່ນໄດ້ຮ່ວມມືສະກັດກັ້ນ ແລະ ຕ້ານຢາເສບຕິດ, ການຄ້າມະນຸດ, ການສໍ້ໂກງທາງໂທລະຄົມ; ວຽກງານໄລ່ຊອກໄລ່ຈັບຜູ້ຖືກຫາທີ່ເອົາຕົວຫລົບໜີ; ນອກນັ້ນ, ກະຊວງປ້ອງກັນຄວາມສະຫງົບຈີນ ຍັງໄດ້ຈັດຝຶກອົບຮົມວຽກງານປ້ອງກັນທາງລົດໄຟລາວ-ຈີນ, ວຽກງານຕ້ານຢາເສບຕິດ ແລະ ອື່ນໆ ໃຫ້ແກ່ເຈົ້າໜ້າທີ່ຕໍາຫລວດລາວ ເປັນການຍົກລະດັບຄວາມສາມາດຂອງເຈົ້າໜ້າວິຊາສະເພາະລາວໄດ້ເປັນຢ່າງດີ.
ພ້ອມນີ້, ທັງສອງຝ່າຍຍັງເປັນເອກະພາບສູງຕໍ່ການສືບຕໍ່ເພີ່ມທະວີການຮ່ວມມືກັນຫຼາຍໆດ້ານໃນຕໍ່ໜ້າ ເປັນຕົ້ນແມ່ນ:
- ສືບຕໍ່ຈັດຕັ້ງປະຕິບັດເນື້ອໃນຈິດໃຈ ທີ່ການນຳຂັ້ນສູງຂອງສອງປະເທດ ໄດ້ຕົກລົງເປັນເອກະພາບຮ່ວມກັນໃນໄລຍະຜ່ານມາ, ພ້ອມກັນສືບຕໍ່ສ້າງຄູ່ຮ່ວມຊາຕາກຳ ລາວ-ຈີນ ໃຫ້ເຂົ້າສູ່ລວງເລິກ ແລະ ນຳເອົາຜົນປະໂຫຍດຕົວຈິງຂອງການຮ່ວມມື ມາສູ່ປະຊາຊົນສອງຊາດ; ປະກອບສ່ວນເຂົ້າໃນພາລະກິດປົກປັກຮັກສາສັນຕິພາບ, ມິດຕະພາບ, ການຮ່ວມມື ເພື່ອການພັດທະນາໃນພາກພື້ນ ແລະ ສາກົນ.
- ເພີ່ມທະວີການຮ່ວມມື ໃນຂົງເຂດວຽກງານຮັກສາຄວາມສະຫງົບປອດໄພທາງດ້ານການ ເມືອງ.
- ເພີ່ມທະວີການຮ່ວມມືແກ້ໄຂບັນຫາອາຊະຍາກໍາຂ້າມຊາດ ເປັນຕົ້ນແມ່ນຄະດີສໍ້ໂກງທາງໂທລະຄົມ, ການພະນັນຂ້າມຊາດ, ຢາເສບຕິດ, ຄ້າມະນຸດ ແລະ ການເຄື່ອນໄຫວກະທໍາຜິດອື່ນໆໃຫ້ມີປະສິດທິຜົນສູງ.
- ເພີ່ມທະວີການຮ່ວມມືຮັກສາຄວາມປອດໄພໃຫ້ແກ່ໂຄງການທີ່ສຳຄັນ, ແກ້ໄຂທຸກການເຄື່ອນໄຫວ ທີ່ມີຜົນກະທົບຕໍ່ຄວາມປອດໄພຂອງໂຄງການ ໂດຍສະເພາະແມ່ນຮັກສາຄວາມປອດໄພເສັ້ນທາງລົດໄຟລາວ-ຈີນ; ເຮັດໃຫ້ການຂົນສົ່ງໂດຍສານຂອງລົດໄຟລາວ-ຈີນ ໃຫ້ມີຄວາມປອດໄພສູງສຸດ.
- ເພີ່ມທະວີວຽກງານຝຶກອົບຮົມ ແລະ ໃຫ້ການຊ່ວຍເຫລືອຍົກລະດັບຂີດຄວາມສາມາດໃນການປະຕິບັດກົດໝາຍ, ເພີ່ມທະວີການຊ່ວຍເຫລືອ ແລະ ສະໜັບສະໜູນ ດ້ານອຸປະກອນຮັບໃຊ້ວຽກງານວິຊາສະເພາະຕໍາຫລວດ ແລະ ອື່ນໆ.
- ຊຸກຍູ້ການປະຕິບັດໜ້າທີ່ຂອງສູນຮ່ວມມືວຽກງານຕໍາຫລວດລາວ-ຈີນ; ປະກອບອຸ ປະກອນເຕັກນິກວິຊາສະເພາະ ແລະ ອື່ນໆຢ່າງຄົບຊຸດ ທັງມີການກໍານົດແຜນວຽກງານອັນເປັນຈຸດສຸມ ແຕ່ລະໄລຍະຢ່າງລະອຽດ.
