ເຂດເສດຖະກິດພິເສດສາມຫລ່ຽມຄຳ 60 ຫົວໜ່ວຍ ຕ້ອງການແຮງງານປະມານ 1.000 ຄົນ ເພື່ອສ້າງເງື່ອນໄຂໃຫ້ຜູ້ກຳລັງຊອກວຽກເຮັດງານທຳ
ວັນທີ 27 ພຶດສະພາ 2023, ເຂດເສດຖະກິດພິເສດສາມຫລ່ຽມຄຳ ໄດ້ຈັດພິທີຮັບສະໝັກແຮງງານ ຢູ່ໂຮງຮຽນປະຖົມດອກງິ້ວຄຳ, ເຂົ້າຮ່ວມໂດຍທ່ານ ເຄື່ອນເພັດ ວົງຈັນ ຮອງເຈົ້າແຂວງ ແຂວງບໍ່ແກ້ວ ຜູ້ຊີ້ນຳວຽກງານເສດຖະກິດ, ທ່ານ ຫວາງ ເອີ້ເປົາ ປະທານກຸ່ມບໍລິສັດດອກງິ້ວຄຳ ພ້ອມມີພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີ ທ່ານ ຄຳສະແຫວງ ວິໄລພົງ ຮອງຫົວໜ້າຄະນະຄຸ້ມຄອງເຂດເສດຖະກິດພິເສດ ໄດ້ໃຫ້ຮູ້ວ່າ: ໃນປັດຈຸບັນຢູ່ພາຍໃນເຂດເສດຖະກິດພິເສດສາມຫລ່ຽມຄຳ ມີແຮງງານປະມານ 50 ພັນກວ່າຄົນ ທີ່ເຄື່ອນໄຫວອອກແຮງງານຢູ່ຫົວໜ່ວຍທຸລະກິດຂະແໜງການຕ່າງໆທັງນ້ອຍ ແລະ ໃຫຍ່ ລວມປະມານ 1.700 ຫົວໜ່ວຍ ແລະ ມີທ່າອ່ຽງເພີ່ມຂຶ້ນໃນແຕ່ລະວັນ, ເຊິ່ງອີງຕາມຂໍ້ມູນສະຖະຕິມີແຮງງານເຂົ້າມາເຮັດວຽກຢູ່ພາຍໃນເຂດ ເພີ່ມຂຶ້ນປະມານ 1.000 ກວ່າຄົນ/ເດືອນ. ດັ່ງນັ້ນ, ການຄຸ້ມຄອງແຮງງານຖືເປັນວຽກງານສຳຄັນໜຶ່ງຂອງເຂດ ແລະ ປັດຈຸບັນ ຍັງມີຫລາຍຂະແໜງການ ຫລື ບໍລິສັດ ທີ່ຕ້ອງການແຮງງານ ທີ່ມີລະດັບຄວາມຮູ້, ຄວາມສາມາດ, ມີປະສົບການ, ມີຄວາມອົດທົນ ແລະ ມີລະບຽບວິໄນ, ຮູ້ວຽກບໍລິຫານ ໂດຍສະເພາະແມ່ນຄວາມຮູ້ດ້ານພາສາຈີນ, ດ້ານໄອທີ, ດ້ານເຕັກນິກວິຊາຊີບ ຫລື ນາຍຊ່າງ, ວິຊາການດ້ານການປູກຝັງ ແລະ ລ້ຽງສັດ, ພະນັກງານໃນຂະແໜງບໍລິການ ແລະ ອື່ນໆ, ເພື່ອແນໃສ່ສ້າງເງື່ອນໄຂໃຫ້ບັນດາຫົວໜ່ວຍ ທີ່ຕ້ອງການນຳໃຊ້ແຮງງານ ແລະ ຜູ້ທີ່ກຳລັງຊອກວຽກເຮັດງານທຳໄດ້ມີໂອກາດພົບປະແລກປ່ຽນກັນ, ໄດ້ມີບັນດາຫົວໜ່ວຍຕ້ອງການແຮງງານມາລົງທະບຽນ ເພື່ອເຂົ້າຮ່ວມຮັບສະໝັກ 60 ຫົວໜ່ວຍ, ໃນນັ້ນ ສະເພາະກຸ່ມບໍລິສັດ ດອກງິ້ວຄຳ 30 ກວ່າຫົວໜ່ວຍ ແລະ ທຸລະກິດອື່ນໆ 30 ກວ່າຫົວໜ່ວຍ, ເຊິ່ງມີຄວາມຕ້ອງການແຮງງານທັງໝົດປະມານ 1.000 ຄົນ.
ສຳລັບຜູ້ທີ່ຜ່ານການສະຫມັກງານ ແລະ ເຂົ້າເຮັດວຽກຈະໄດ້ມີສະຫວັດດີການ, ນະໂຍບາຍຕ່າງໆ, ອຳນວຍຄວາມສະດວກໃຫ້ພະນັກງານທີ່ເຮັດວຽກໃນບໍລິສັດ, ມີທີ່ພັກເຊົາ, ມີບັດແຮງງານ, ເອກະສາງຕ່າງໆໃຫ້ຖືກຕ້ອງຕາມລະບຽບ.
ໂອກາດນີ້ ທ່ານ ຮອງເຈົ້າແຂວງ ແຂວງບໍ່ແກ້ວ ມີຄຳເຫັນວ່າ: ຄຽງຄູ່ກັບການພັດທະນາເສດຖະກິດ-ສັງຄົມຂອງແຂວງ, ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ງານໃນຄັ້ງນີ້ຍັງເປັນການເສີມສ້າງຊອກວຽກເຮັດງານທຳໃຫ້ແກ່ຊາວຜູ້ອອກແຮງງານ ແລະ ປະຊາຊົນບັນດາເຜົ່າຈາກພາຍໃນ ແລະ ຕ່າງປະເທດທີ່ມາຊອກວຽກເຮັດງານທຳໃນເຂດເສດຖະກິດພິເສດສາມຫລ່ຽມຄຳ, ເມືອງຕົ້ນເຜິ້ງ ແຂວງບໍ່ແກ້ວ. ນອກນີ້ກໍຮຽກຮ້ອງໃຫ້ບັນດາຫົວໜ່ວຍທຸລະກິດໃຫ້ການສະໜັບສະໜູນຮັບເອົາຊາວໜຸ່ມໄວໜຸ່ມເຂົ້າເຮັດວຽກປະກອບໃສ່ຫົວໜ່ວຍທຸລະກິດຕ່າງໆຂອງເຂດ ເພື່ອໃຫ້ມີການຈັດຕັ້ງປະຕິບັດທີ່ຖືກຕ້ອງ ແລະ ເຮັດວຽກໄປຕາມຂັ້ນຕອນ.
