ອັນໂຕນີ ປີກຈອມໝຸນຂອງແມນຢູ ກຽມພັກຍາວ 2 ເດືອນຫລັງຈາກ ເຈັບຂໍ້ຕີນໃນທີ່ເກມຊະນະເຊວຊີ
“ຜີສາດແດງ” ແມນເຊັສເຕີ ຢູໄນເຕັດ ຕ້ອງສັ່ນຄອນ ຫລັງຈາກມີລາຍງານວ່າ ໜຶ່ງໃນນັກເຕະຕົ້ນຕໍຂອງພວກເຂົາ ອາດຈະຕ້ອງພັກຍາວເປັນເວລາ 2 ເດືອນ, ອົດລົງສະໜາມໃນຊີງຊະນະເລີດ FA Cup ກັບ ແມນ ຊິຕີ້.
ວັນທີ 25 ພຶດສະພາ 2023 The Independent ສື່ຂອງອັງກິດລາຍງານວ່າ ອັນໂຕນີ ປີກຊາວບຣາຊິນຂອງ ແມນເຊັສເຕີ ຢູໄນເຕັດ ອາດຈະຕ້ອງພັກຍາວເປັນເວລາ 2 ເດືອນ ຫລັງຈາກໄດ້ຮັບບາດເຈັບຂໍ້ຕີນຂວາ ຈາກເກມພຣີເມຍລີກ ອັງກິດ ນັດຫລ້າສຸດທີ່ເປີດສະໜາມ Old Trafford, ເອົາຊະນະ “ສິງໂຕຟ້າ” 4-1 ໃນວັນພະຫັດທີ່ຜ່ານມາ.
ອັນໂຕນີ ປະທະກັບ ເທຣໂວ ຊາໂລບາ ກອງຫລັງ ເຊວຊີ ຈົນຕ້ອງຖືກປ່ຽນໂຕອອກຈາກສະໜາມຫລັງຜ່ານໄປໄດ້ພຽງເຄິ່ງຊົ່ວໂມງຂອງເກມ ເຊິ່ງ ເອຣິກ ເທນຮາກ ຜູ້ຈັດການທີມ ຜີສາດແດງ ໃຫ້ສໍາພາດວ່າຕ້ອງລໍຖ້າ 24 ຊົ່ວໂມງເພື່ອລໍຖ້າລາຍລະອຽດທີ່ຊັດເຈນ, ຈົນຫລ້າສຸດ, The Independent ລາຍງານວ່າການບາດເຈັບຂອງ ອັນໂຕນີ ແມ່ນການບາດເຈັບຊ້ຳບ່ອນເກົ່າ ທີ່ລາວໄດ້ຮັບບາດເຈັບໃນຂະນະທີ່ຮັບໃຊ້ໃຫ້ທີມຊາດບຣາຊິນ ໃນການແຂ່ງຂັນເຕະບານໂລກ 2022 ຮອບຄັດເລືອກໃນເດືອນມີນາ 2022, ຈົນກ່ວາລາວຕ້ອງພັກຜ່ອນ 2 ເດືອນເມື່ອ ແລະ ພາດລົງສະໜາມໃນ 8 ນັດສຸດທ້າຍໃຫ້ກັບ ອາແຈ໋ກ ໃນລະດູການທີ່ແລ້ວ.
