ສປປ ລາວ ກຽມຄວາມພ້ອມຕ້ອນຮັບນັກທ່ອງທ່ຽວຈີນ ແລະ ຫາວິທີປ້ອງກັນຄວາມສ່ຽງ ໂດຍສະເພາະແມ່ນການທ່ອງທ່ຽວແບບສູນຫລຽນ

ວັນທີ 26 ພຶດສະພາ 2023 ນີ້ ກົມໂຄສະນາການທ່ອງທ່ຽວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຈັດກອງປະຊຸມເຜີຍແຜ່ ແຜນຕ້ອນຮັບນັກທ່ອງທ່ຽວຈີນ  ແນໃສ່ກະກຽມຄວາມພ້ອມໃນທຸກໆດ້ານ ເພື່ອຮອງຮັບນັກທ່ອງທ່ຽວຈີນ ທີ່ຈະເດີນທາງເຂົ້າມາທ່ອງທ່ຽວ ສປປ ລາວ ນັບມື້ນັບຫລາຍຂຶ້ນ.

ທ່ານ ອຸ່ນທວງ ຂາວພັນ ຮອງລັດຖະມົນຕີ ຖວທ ໄດ້ກ່າວວ່າ: ຕະຫລາດທ່ອງທ່ຽວຈີນ ເປັນຕະຫລາດໜຶ່ງທີ່ມີຄ່າໃຊ້ຈ່າຍສູງ ຫລາຍໆປະເທດໄດ້ກໍານົດນະໂຍບາຍຕ່າງໆ ເພື່ອຍາດແຍ່ງ ແລະ ດຶງດູດນັກທ່ອງທ່ຽວຈີນ ໄປທ່ອງທ່ຽວໃນປະເທດຂອງຕົນ ສຳລັບ ສປປ ລາວ ກ່ອນໜ້າການແພ່ລະບາດພະຍາດໂຄວິດ-19 ໃນປີ 2019, ລາວ ໄດ້ຕ້ອນຮັບນັກທ່ອງທ່ຽວຈີນ 1.022.727 ເທື່ອຄົນ ກວມເອົາ 21% ຂອງນັກທ່ອງທ່ຽວທັງໝົດ ທີ່ເຂົ້າມາທ່ອງທ່ຽວລາວ, ປີ 2022 ມີນັກທ່ອງທ່ຽວຈີນທີ່ເດີນທາງມາ 45.249 ເທື່ອຄົນ.

ປັດຈຸບັນລັດຖະບານຈີນ  ອະນຸຍາດໃຫ້ປະຊາຊົນຈີນ ສາມາດເດີນທາງອອກນອກປະເທດໄດ້ ເຊິ່ງ ສປປ ລາວ ເປັນ 1 ໃນ 20 ປະເທດ ທີ່ລັດຖະບານຈີນ ອະນຸຍາດໃຫ້ອອກໄປທ່ຽວແບບເປັນໝູ່ຄະນະ. ສະນັ້ນລັດຖະບານລາວ ຈຶ່ງໄດ້ສຸມໃສ່ປັບປຸງຜະລິດຕະພັນການທ່ອງທ່ຽວ ຫັນອຸດສະຫະກໍາການທ່ອງທ່ຽວໃຫ້ທັນສະໄໝວ່ອງໄວ ໃຫ້ແທດເໝາະກັບຕະຫລາດຈີນ ໂດຍອີງໃສ່ທ່າແຮງທາງດ້ານຊັບພະຍາກອນການທ່ອງທ່ອງທ່ຽວ ແລະ ຮີດຄອງປະເພນີອັນດີງາມ. ນອກນີ້, ຍັງມີລົດໄຟຄວາມໄວສູງ ເຊື່ອມໂຍງລະຫວ່າງ ລາວ-ຈີນ ສາມາດອໍານວຍຄວາມສະດວກ ໃນການເດີນທາງລະຫວ່າງປະເທດ, ເປີດສາຍການບິນເຊື່ອມຕໍ່ລະຫວ່າງ ນະຄອນຫລວງວຽງຈັນ ແລະ ບັນດາແຂວງຂອງ ສປ ຈີນ ເຮັດໃຫ້ມີຄວາມສະດວກສະບາຍ ແລະ ເປັນຫລາຍທາງເລືອກໃຫ້ນັກທ່ອງທ່ຽວຈີນ ເຂົ້າມາທ່ອງທ່ຽວຢູ່ລາວຫລາຍຂຶ້ນ.

ທ່ານ ນາງ ພອນມະນີ ອິນທະພົມ ຫົວໜ້າກົມພັດທະນາການທ່ອງທ່ຽວ ໄດ້ລາຍງານແຜນກິດຈະກຳ ການຕ້ອນຮັບນັກທ່ອງທ່ຽວຈີນ ສຳລັບປີ 2023 (ໄລຍະສັ້ນ) ເປັນຕົ້ນ ເປີດເຊື່ອມເສັ້ນທາງລົດໄຟລາວ-ຈີນ ຢູ່ດ່ານສາກົນບໍ່ເຕນ; ປັບປຸງການບໍລິການເຂົ້າ-ອອກ ແລະ ສິ່ງອຳນວຍຄວາມສະດວກຢູ່ຕາມດ່ານສາກົນ; ແກ້ໄຂບັນຫາການຈຳໜ່າຍປີ້ລົດໄຟໃຫ້ມີຄວາມສະດວກ ແລະ ວ່ອງໄວ; ສ້າງວິດີໂອໂຄສະນາການທ່ອງທ່ຽວ ເປັນພາສາຈີນຍາວ 3 ນາທີ; ຝຶກອົບຮົມພະນັກງານນຳທ່ຽວພາສາຈີນ ໄລຍະສັ້ນເພື່ອອອກແບບນຳທ່ຽວຊົ່ວຄາວ; ຕິດຕັ້ງປ້າຍຊີ້ບອກສະຖານທີ່ທ່ອງທ່ຽວ ຕາມເສັ້ນທາງຫລວງແຫ່ງຊາດ ແລະ ເສັ້ນທາງເຂົ້າແຫລ່ງທ່ອງທ່ຽວ ບູລິມະສິດຕາມເສັ້ນທາງລົດໄຟລາວ-ຈີນ (ພາສາລາວ, ຈີນ, ອັງກິດ); ເຂົ້າຮ່ວມງານວາງສະແດງທ່ອງທ່ຽວຢູ່ ສປ ຈີນ; ຈັດສຳມະນາສົ່ງເສີມການທ່ອງທ່ຽວລາວ-ຈີນ; ຈັດລາຍການລົງຢ້ຽມຢາມແຫລ່ງທ່ອງທ່ຽວ FAMTRIP ສຳລັບນັກທຸລະ ກິດຈີນ ເພື່ອຊ່ວຍໂຄສະນາ ແລະ ເຮັດສັນຍາຊື້-ຂາຍລາຍການທ່ອງທ່ຽວຢູ່ລາວ ແລະ ອື່ນໆ.

ແຜນກະກຽມຕ້ອນຮັບນັກທ່ອງທ່ຽວ ສ້າງຂຶ້ນເພື່ອເປັນບ່ອນອີງໃຫ້ແກ່ພາກລັດ ແລະ ພາກທຸລະກິດ ທັງສູນກາງ ແລະ ທ້ອງຖິ່ນ ເປັນຂໍ້ມູນພື້ນຖານເພື່ອກະກຽມການບໍລິການ ຕ້ອນຮັບນັກທ່ອງທ່ຽວຈີນ (ຕະຫລາດຈີນ) ຢູ່ໃນ ສປປ ລາວ ເປັນຕົ້ນ ທ່າອ່ຽງ ແລະ ໂອກາດທີ່ນັກທ່ອງທ່ຽວຈີນ ຈະເຂົ້າມາທ່ອງທ່ຽວຢູ່ລາວ ລວມເຖິງຄວາມສ່ຽງທີ່ອາດຈະເກີດຂຶ້ນ ໂດຍສະເພາະ ແມ່ນການທ່ອງທ່ຽວໃນຮູບແບບທົ່ວສູນຫລຽນ (zero-dollar tourism). ແຜນສະບັບນີ້ ຍັງໄດ້ສັງລວມບາງນະໂຍບາຍ ແລະ ແຜນການຕ້ອນຮັບນັກທ່ອງທ່ຽວຈີນ ຂອງບັນດາປະເທດຕ່າງໆໃນພາກພື້ນ ແລະ ສາກົນ ເພື່ອເປັນການຮອງຮັບການປ່ຽນແປງຂອງອຸດສະຫາກຳການທ່ອງທ່ຽວ ເນື່ອງຈາກສະພາບການຂອງຕະຫລາດນັກທ່ອງທ່ຽວ ມີການປ່ຽນແປງຢູ່ຕະຫລອດເວລາ. ສະນັ້ນ ແຜນກະກຽມຕ້ອນຮັບນັກທ່ອງທ່ຽວ ດັ່ງກ່າວ ອາດຈະມີການປັບປຸງ ແລະ ດັດປັບເປັນແຕ່ລະໄລຍະເພື່ອໃຫ້ສອດຄ່ອງກັບສະພາບຄວາມເປັນຈິງຢູ່ຂັ້ນສູນກາງ ແລະ ທ້ອງຖິ່ນ.