ເມືອງສັງທອງ ສະເໜີໃຫ້ພິຈາລະນາການອະນຸຍາດຂຸດຄົ້ນແຮ່ຄຳ ແລະ ການຕັດໄມ້ປ່ອງ ຢາກໂຈະໂກຕາໃນປີຕໍ່ໄປເພື່ອຮັກສາວັດຖຸດິບໄວ້

ທ່ານ ພົງສະຫວັນ ສິລິພັນ ເຈົ້າເມືອງສັງທອງ ໄດ້ຂຶ້ນລາຍງານສະພາບການໂດຍຫຍໍ້ໃນໂອກາດທີ່ ທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫລວງວຽງຈັນ ລົງຕິດຕາມກວດກາ ຊຸກຍູ້ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແກ້ໄຂຄວາມທຸກຍາກ ຢູ່ເມືອງສັງທອງ ໃນວັນທີ 25 ພຶດສະພາ 2023 ຜ່ານມາວ່າ: ບັນຫາຊາຍແດນທີ່ມີຄວາມສຳຄັນຈະຕ້ອງໄດ້ສູ້ຊົນແກ້ໄຂໃຫ້ມີຄວາມສະຫງົບ, ບັນຫາທີ່ເກີດຂຶ້ນໃນຂອບເຂດຊາຍແດນແມ່ນໍ້າຂອງ ເມືອງສັງທອງ ແມ່ນມີຄົນຢູ່ໃນພື້ນທີ່ ແລະ ນອກພື້ນທີ່ ເຂົ້າສວຍໂອກາດ ແລະ ສວຍໃຊ້ຊ່ອງຫວ່າງຂອງລະບຽບກົດໝາຍຂອງພື້ນທີ່, ເຄື່ອນໄຫວຜິດຕໍ່ລະບຽບຂອງບ້ານເມືອງ.

ນອກນີ້ ເຈົ້າເມືອງສັງທອງໄດ້ສະເໜີໃຫ້ຂັ້ນເທິງພິຈາລະນາການອະນຸຍາດການຂຸດຄົ້ນແຮ່ຄຳ ຕາມຂໍ້ຕົກລົງ141/ນຍ ເຊິ່ງມາຮອດປັດຈຸບັນແມ່ນຢຸດແລ້ວ 2 ບໍລິສັດ ຍັງສືບຕໍ່ 1 ບໍລິສັດ, ສະພາບນ້ຳສັງຂຸ້ນທີ່ມາຈາກສາຍນ້ຳສັງເບື້ອງເທິງ ຫລື ປາກນ້ຳໄຫ ແມ່ນຍັງຂຸ້ນຢູ່ ເນື່ອງຈາກເຂດດັ່ງກ່າວເປັນຂອງເມືອງຫີນເຫີບຄຸ້ມຄອງປັດຈຸບັນຍັງມີຫລາຍບໍລິສັດຊອກຂຸດຄົ້ນສຳຫລວດຢູ່ ທີ່ບໍ່ມີມາດຕະການຄຸ້ມຄອງລະອຽດ ຈຶ່ງເປັນສາເຫດທີ່ມີຜົນກະທົບຕໍ່ປະຊາຊົນຢູ່ຕອນລຸ່ມຂອງນ້ຳສັງ.

ສຳລັບໂຮງງານທີ່ສົ່ງອອກໄມ້ດິ້ວ ເມືອງສັງທອງຂໍໂຈະໂກຕາໃນປີຕໍ່ໄປເພື່ອຮັກສາວັດຖຸດິບໄວ້ປ້ອນໂຮງງານທີ່ເຮັດເປັນຜະລິດຕະພັນສົ່ງອອກທີ່ຢູ່ພາຍໃນ ແລະ ຕ່າງປະເທດ, ນອກນີ້ຍັງສະເໜີີໃຫ້ຂັ້ນເທີງມີແຕ່ໂຮງງານດຽວທີ່ມີຢູ່ແລ້ວ ເນື່ອງຈາກວັດຖຸດິບໄມ້ປ່ອງທີ່ມີຢູ່ໃນເມືອງສັງທອງຫລຸດລົງຫລາຍ.