ເຈົ້າແຂວງເຊກອງ ເນັ້ນພະແນກສາທາລະນະສຸກ ພັດທະນາການບໍລິການສຸຂະພາບ

ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ໃນໂອກາດເຂົ້າຮ່ວມກອງປະຊຸມກາງສະໄໝ ຄັ້ງທີ I ຂອງຄະນະພັກຮາກຖານ ພະແນກສາທາລະນະສຸກແຂວງເຊກອງ ໃນວັນທີ 25 ພຶດສະພາ 2023 ຜ່ານມາ, ທ່ານ ເຫລັກໄຫລ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ໄດ້ໃຫ້ທິດຊີ້ນໍາຄະນະພັກ, ຄະນະນໍາພະແນກສາທາລະນະສຸກແຂວງ ໂດຍເນັ້ນໃຫ້ສືບຕໍ່ປັບປຸງແບບແຜນນໍາພາ-ວິທີເຮັດວຽກ, ຍຶດໝັ້ນ ແລະ ປະຕິບັດຫລັກການລວມສູນປະຊາທິປະໄຕຂອງພັກ, ບໍາລຸງສ້າງພະນັກງານໃຫ້ມີຄວາມຮູ້ຄວາມສາມາດ, ຂະຫຍາຍຕາໜ່າງການບໍລິການ ດ້ານສາທາລະນະສຸກລົງສູ່ຮາກຖານ ເພື່ອຕອບສະໜອງການບໍລິການຮັກສຸຂະພາບ ປະຊາຊົນຢ່າງທົ່ວເຖິງ, ມີຄຸນນະພາບ, ຍຸຕິທໍາ ແລະ ສະເໝີພາບ ຕີຖອຍບັນຫາປະກົດການຫຍໍ້ທໍ້, ຫາງສຽງການຈົ່ມວ່າຂອງສັງຄົມ ຕໍ່ພະນັກງານແພດ-ໝໍໃຫ້ຫລຸດລົງ.

ພ້ອມນີ້, ໃຫ້ຄະນະພັກ-ຄະນະນໍາສືບຕໍ່ ສຶກສາອົບຮົມການເມືອງ-ນໍາພາແນວຄິດ ໃຫ້ພະນັກງານຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ແນວທາງນະໂຍບາຍຂອງພັກ, ຂໍ້ກໍານົດ ແລະ ກົດໝາຍຂອງລັດ; ສືບຕໍ່ປັບປຸງການຈັດຕັ້ງ, ກໍ່ສ້າງໜ່ວຍພັກໃຫ້ເຂັ້ມແຂງທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນການນໍາພາ; ກໍ່ສ້າງພະນັກງານໃຫ້ມີຄຸນທາດການເມືອງ, ຄຸນສົມບັດສິນທໍາປະຕິວັດ ແລະ ມີຄວາມຮູ້ຄວາມສາມາດ; ຕິດຕາມ, ກວດກາ ການປະຕິບັດໜ້າທີ່ວຽກງານຂອງພະນັກງານ, ຊຸກຍູ້ສົ່ງເສີມ, ຍ້ອງຍໍສັນລະເສີນ ແລະ ປະຕິບັດນະໂຍບາຍອື່ນໆຢ່າງເໝາະສົມ ຕໍ່ພະນັກງານຜູ້ເຮັດແທ້ທໍາຈິງ; ສ້າງເງື່ອນໄຂໃຫ້ອົງການຈັດຕັ້ງມະຫາຊົນ ທີ່ຢູ່ໃນຄວາມຮັບຜິດຊອບຂອງຕົນ ໄດ້ເຄື່ອນໄຫວເປັນເສນາທິການໃຫ້ຄະນະພັກຢ່າງແຂງແຮງ ແລະ ນໍາພາປະຕິບັດວຽກງານວິຊາສະເພາະ ຕາມ 8 ແຜນງານໃຫຍ່ 49 ແຜນງານຍ່ອຍ 133 ໂຄງການບຸລິມະສິດ ແລະ ຄາດໝາຍ 11 ຕົວຊີ້ບອກ ໂດຍສະເພາະ ບັນດາຕົວຊີ້ບອກ ທີ່ບໍ່ທັນບັນລຸໃຫ້ບັນລຸໂດຍໄວ ແຕ່ນີ້ຮອດປີ 2025.

ສະຫາຍເລຂາພັກແຂວງ ຍັງໄດ້ຮຽກຮ້ອງໃຫ້ຄະນະພັກ, ສະມາຊິກພັກ ກໍຄືພະນັກງານ-ລັດຖະກອນ ພະແນກສາທາລະນະສຸກແຂວງ ແກ້ໄຂຈຸດອ່ອນ-ຂໍ້ຄົງຄ້າງ ພ້ອມກັນຄົ້ນຄວ້າຂະຫຍາຍມະຕິ ກອງປະຊຸມໃຫຍ່ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງ, ແຜນພັດທະນາວຽກງານສາທາລະນະສຸກໃຫ້ເປັນແຜນລະອຽດ, ແທດເໜາະກັບຕົວຈິງ ເພື່ອເຮັດໃຫ້ການເຄື່ອນໄຫວວຽກງານ ແຕ່ນີ້ຮອດປີ 2025 ມີຜົນສໍາເລັດໃໝ່ທີ່ດີ ມີປະສິດທິພາບ ແລະ ປະສິດທິຜົນ.