ເກຣັກຈັດຕັ້ງລັດຖະບານປະສົມບໍ່ສໍາເລັດ ແຕ່ງຕັ້ງນາຍົກລັດຖະມົນຕີຮັກສາການ ກ່ອນເລືອກຕັ້ງໃໝ່ອີກໃນເດືອນໜ້າ

ວັນທີ 24 ພຶດສະພາ, ປະທານາທິບໍດີເກຣັກແຕ່ງຕັ້ງນາຍົກລັດຖະມົນຕີຮັກສາການ ເພື່ອກຽມຈັດການເລືອກຕັ້ງອີກໃນວັນທີ 25 ມິຖຸນາ ຫລັງການລົງຄະແນນຈັດຕັ້ງລັດຖະບານບໍ່ສໍາເລັດ ເນື່ອງຈາກພັກລໍາດັບທີສອງ ແລະ ສາມ ປະຕິເສດການເຂົ້າຮ່ວມລັດຖະບານກັບທ່ານ ຄິເຣຍກໍສ ມິດໂຊຕາກິສ ຕົວແທນພັກຂວາກາງ (New Democracy) ທີ່ຊະນະການເລືອກຕັ້ງດ້ວຍຄະແນນສຽງກວ່າ 40,1% ຈາກການເລືອກຕັ້ງລະດັບປະເທດ ໃນວັນທີ 21 ພຶດສະພາຜ່ານມາ.

ທ່ານ ມິດໂຊຕາກິສ ເຊື່ອວ່າ: ການເລືອກຕັ້ງຄັ້ງທີສອງຈະເພີ່ມຄະແນນສຽງໃຫ້ພັກ New Democracy ແລະ ສາມາດຈັດຕັ້ງລັດຖະບານສຽງສ່ວນຫລາຍຈາກພັກດຽວໄດ້ ເຊັ່ນດຽວກັບບັນດາພັກຝ່າຍຄ້ານທີ່ຍັງຫວັງວ່າ ການລົງຄະແນນຄັ້ງທີສອງຈະຊ່ວຍເພີ່ມຄະແນນສຽງໃຫ້ພວກທ່ານເຊັ່ນກັນ.

ທ່ານ ກາເຕຣີນາ ຊາເກລາໂຣປູລູ ປະທານາທິບໍດີເກຣັກ ໄດ້ເຊີນຜູ້ນໍາຂອງທຸກພັກທີ່ມີຄະແນນສຽງເກີນ 3% ໃຫ້ຮ່ວມຈັດຕັ້ງລັດຖະບານປະສົມ, ແຕ່ການເຈລະຈາດັ່ງກ່າວບໍ່ເກີດຜົນສໍາເລັດ ເຊິ່ງພາຍໃຕ້ລັດຖະທໍາມະນູນຂອງເກຣັກ ຖ້າການຈັດຕັ້ງລັດຖະບານປະສົມບໍ່ສໍາເລັດ ປະທານາທິບໍດີຈໍາເປັນຕ້ອງແຕ່ງຕັ້ງນາຍົກລັດຖະມົນຕີຮັກສາການ ເພື່ອປ້ອງກັນສູນຍາກາດກ່ອນຈັດການເລືອກຕັ້ງໃໝ່.

ສໍາລັບນາຍົກລັດຖະມົນຕີຮັກສາການທີ່ໄດ້ຮັບການແຕ່ງຕັ້ງ ຄືທ່ານ ໄອໂອອັນນິສ ຊາມາສ ເຈົ້າໜ້າທີ່ຕຸລາການອາວຸໂສ ເຊິ່ງເປັນປະທານ Hellenic Court of Audit ເຊິ່ງເປັນ 1 ໃນ 3 ສານສູງຂອງເກຣັກ.

ທັງນີ້, ພາຍໃຕ້ລະບົບການເລືອກຕັ້ງຂອງເກຣັກ ຫລັງການເລືອກຕັ້ງຄັ້ງທໍາອິດທີ່ຈັດຕັ້ງລັດຖະບານບໍ່ສໍາເລັດ ຜູ້ຊະນະການເລືອກຕັ້ງຮອບທີສອງມີໂອກາດໄດ້ຮັບບ່ອນນັ່ງໂບນັດເພີ່ມອີກສູງສຸດ 50 ບ່ອນນັ່ງ ຖ້າໄດ້ບ່ອນນັ່ງເກີນ 25% ຂຶ້ນໄປ.

ອ້າງອີງ:

http://www.reuters.com/…/greek-party-leaders-meet…/