ເລຂາທິການ ສປຊ ຢ້ຽມຢາມອີຣັກ ເພື່ອຕີລາຄາການຊ່ວຍເຫລືອ

ທ່ານ ອັນໂຕນິໂອ ກູເຕເຣສ ເລຂາທິການສະຫະປະຊາຊາດ ເດີນທາງເຖິງນະຄອນຫລວງແບກແດດຂອງອີຣັກ ໃນ ວັນທີ 30 ມີນານີ້ຕາມເວລາທ້ອງຖິ່ນ ເພື່ອຕີລາຄາສະຖານະການດ້ານສິດທິມະນຸດ ໂດຍຮຽກຮ້ອງໃຫ້ປົກປ້ອງພົນ ລະເມືອງເປັນສິ່ງສຳຄັນອັນດັບທຳອິດ. ໃນຂະນະທີ່ ກອງກຳລັງລັດຖະບານອີຣັກປະຕິບັດການສູ້ຮົບເພື່ອຍຶດຄືນ ເມືອງໂມຊຸນ.

ພົນລະເຮືອນຫລາຍແສນຄົນຍັງຢູ່ເມືອງໂມຊຸນ ເຊິ່ງຖືກກຸ່ມລັດອິສລາມ (IS) ຍຶດຄອງມາແຕ່ປີ 2014. ເຈົ້າໜ້າທີ່ ແລະ ຜູ້ເຫັນເຫດການກ່າວວ່າ: ປະຕິບັດການໂຈມຕີທາງອາກາດເຮັດໃຫ້ພົນລະເຮືອນບາດເຈັບ ແລະ ເສຍຊີວິດ ເປັນຈຳນວນຫລາຍຢູ່ເມືອງໂມຊຸນໃນເດືອນນີ້. ເລຂາທິການ ສປຊ ມີກຳນົດພົບປະຫາລືກັບເຈົ້າໜ້າທີ່ລະດັບສູງ ອີຣັກ ລວມທັງນາຍົກລັດຖະມົນຕີ ໄຮເດີ ອັດ ອາບາດີ ຢູ່ນະຄອນຫລວງແບກແດດ ກ່ອນເດີນທາງໄປເມືອງອາຣ ບິວໃນເຂດປົກຄອງຕົນເອງຊາວເຄຣີດ.

ຂໍ້ມູນທາງການອີຣັກລະບຸວ່າ: ພົນລະເມືອງກວ່າ 2 ແສນຄົນ ອົບພະຍົບໜີທາງຕາເວັນຕົກຂອງເມືອງໂມຊຸນນັບ ແຕ່ມີປະຕິບັດການໂຈມຕີ ເພື່ອຍຶດຄືນເມືອງມາແຕ່ເດືອນຜ່ານມາ. ກ່ອນໜ້ານີ້ ກຸ່ມ IS ຍຶດຄອງພື້ນທີ່ສ່ວນ ໃຫຍ່ທາງເໜືອ ແລະ ຕາເວັນຕົກຂອງນະຄອນຫລວງແບກແດດ ນັບແຕ່ປີ 2014, ແຕ່ກອງກຳລັງອີຣັກທີ່ໄດ້ປະ ຕິບັດການໂຈມຕີທາງອາກາດຂອງອາເມລິກາຮ່ວມນຳ ສາມາດຍຶດຄືນດິນແດນສ່ວນໃຫຍ່ທີ່ສູນເສຍໄປກັບມາ ໄດ້.