ກົດໝາຍ: ວ່າດ້ວຍການຄຸ້ມຄອງເງິນຕາຕ່າງປະເທດ
May 25, 2023 - 4:11 PM
ເລກທີ15/ສພຊ , ນະຄອນຫລວງວຽງຈັນ, ວັນທີ 7 ກໍລະກົດ 2022
ມາດຕາ 43 ຂໍ້ຫ້າມທົ່ວໄປ
ຫ້າມ ບຸກຄົນ, ນິຕິບຸກຄົນ ແລະ ອົງການຈັດຕັ້ງ ມີພຶດຕິກຳດັ່ງນີ້:
- ຫ້າມ ນຳໃຊ້ເງິນຕາຕ່າງປະເທດເຂົ້າໃນການຊຳລະ ແລະ/ຫລື ຮັບຊຳລະ ຢູ່ ສປປ ລາວ ໂດຍບໍ່ສອດຄ່ອງກັບກົດໝາຍສະບັບນີ້ ແລະ ກົດໝາຍອື່ນທີ່ກ່ຽວຂ້ອງ,
- ຫ້າມ ກຳນົດມູນຄ່າ, ຕິດປະກາດ ແລະ/ຫລື ໂຄສະນາລາຄາສິນຄ້າ, ຄ່າບໍລິການ ແລະ ຄ່າອື່ນ, ກຳນົດໂຄ່ງສ້າງລາຄາ ສິນຄ້າ ແລະ ບໍລິການ ຢູ່ ສປປ ລາວ ເປັນເງິນຕາຕ່າງປະເທດ,
- ຫ້າມ ໂຄສະນາ ແລະ/ຫລື ປະກາດ ການບໍລິການແລກປ່ຽນເງິນຕາຕ່າງປະເທດ, ການຝຶກອົບຮົມ, ເຮັດການຕະຫລາດ ກ່ຽວກັບເງິນຕາຕ່າງປະເທດ ທຸກຮູບແບບຜ່ານຊ່ອງທາງຕ່າງໆ,
- ຫ້າມ ປັ່ນປ່ວນອັດຕາແລກປ່ຽນ ດ້ວຍການສ້າງຂ່າວປອມ ຫລື ບົດບິດເບືອນຂໍ້ມູນຂ່າວສານ ກ່ຽວກັບບັນດາປັດໄຈທີ່ຈະກະທົບຕໍ່ອັດຕາແລກປ່ຽນ,
- ຫ້າມ ກຳນົດ ແລະ ຕິດປະກາດ ອັດຕາແລກປ່ຽນ ໂດຍບໍ່ໄດ້ຮັບອະນຸຍາດຈາກທະນາຄານ ແຫ່ງ ສປປ ລາວ,
- ຫ້າມ ຊຳລະສິນຄ້າ ແລະ ບໍລິການ ຢູ່ພາຍໃນ ແລະ ລະຫວ່າງປະເທດ ດ້ວຍການນຳໃຊ້ລະບົບການຊຳລະທີ່ບໍ່ສອດຄ່ອງກັບກົດໝາຍຂອງ ສປປ ລາວ,
- ຫ້າມໃຫ້ບໍລິການເງິນຕາຕ່າງປະເທດ ໂດຍບໍ່ໄດ້ຮັບອະນຸຍາດຈາກທະນາຄານແຫ່ງ ສປປ ລາວ,
- ຫ້າມ ໃຫ້ບໍລິການເງິນຕາຕ່າງປະເທດ ເປັນຕົ້ນ ແລກປ່ຽນເງິນຕາ, ໂອນເງິນກັບບຸກຄົນ, ນິຕິບຸກຄົນອື່ນ ທີ່ບໍ່ໄດ້ຮັບອະນຸຍາດຈາກທະນາຄານແຫ່ງ ສປປ ລາວ,
- ຫ້າມເປີດ ແລະ ນຳໃຊ້ບັນຊີເງິນຝາກຢູ່ຕ່າງປະເທດ ໂດຍບໍ່ສອດຄ່ອງກັບກົດໝາຍສະບັບນີ້,
- ຫ້າມນຳໃຊ້ບັນຊີເງິນຝາກອື່ນທີ່ບໍ່ແມ່ນບັນຊີເງິນຝາກສະເພາະ ເພື່ອຊຳລະສິນຄ້າ, ການບໍລິການ ແລະ ການລົງທຶນກັບຕ່າງປະເທດ,
- ຫ້າມຮັກສາລາຍຮັບຈາກການສົ່ງອອກສິນຄ້າ, ການບໍລິການ ແລະ ການລົງທຶນໄວ້ຢູ່ຕ່າງປະເທດ ໂດຍບໍ່ໄດ້ຮັບອະນຸຍາດ,
- ຫ້າມບໍສະເໜີຂໍຢັ້ງຢືນ ຫລື ຢັ້ງຢືນເກີນເວລາທີ່ກຳນົດ ໃນການນຳທຶນເຂົ້າ ສປປ ລາວ ນຳທະນາຄານແຫ່ງ ສປປ ລາວ,
- ຫ້າມນຳທຶນອອກ ສປປ ລາວ ໄປລົງທຶນຢູ່ຕ່າງປະເທດ ໂດຍບໍ່ໄດ້ຮັບອະນຸຍາດ,
- ຫ້າມກູ້ຍືມລະຫວ່າງປະເທດ ໂດຍບໍ່ສອດຄ່ອງກັບກົດໝາຍສະບັບນີ້ ແລະ ກົດໝາຍສະບັບອື່ນທີ່ກ່ຽວຂ້ອງ,
- ຫ້າມບໍ່ແຈ້ງເຈົ້າໜ້າທີ່ພາສີທີ່ກ່ຽວຂ້ອງ ໃນກໍລະນີນຳເງິນຕາທີ່ເປັນເງິນສົດເຂົ້າ ສປປ ລາວ ເກີນຈຳນວນທີ່ກຳນົດໄວ້, ບໍ່ໄດ້ອະນຸຍາດຈາກທະນາຄານແຫ່ງ ສປປ ລາວ ແລະ ບໍ່ແຈ້ງຕໍ່ເຈົ້າໜ້າທີ່ພາສີທີ່ກ່ຽວຂ້ອງ ໃນກໍລະນີທີ່ນຳເງິນຕາເປັນເງິນສົດອອກ ສປປ ລາວ ເກີນຈຳນວນທີ່ກຳນົດໄວ້,
- ຫ້າມປະຕິເສດການສະໜອງຂໍ້ມູນ ຫລື ສະໜອງຂໍ້ມູນບໍ່ຖືກຕ້ອງ, ບໍ່ຄົບຖ້ວນ ກ່ຽວກັບການເຄື່ອນໄຫວເງິນຕາຕ່າງປະເທດ,
- ຫ້າມປະຕິເສດການໃຫ້ຄວາມຮ່ວມມື ຫລື ຂັດຂວາງການປະຕິບັດໜ້າທີ່ຂອງພະນັກງານ ແລະ ເຈົ້າໜ້າທີ່ທີ່ກ່ຽວຂ້ອງ ໃນການເຄື່ອນໄຫວວຽກງານຄຸ້ມຄອງເງິນຕາຕ່າງປະເທດ,
- ຫ້າມເລີ່ນເລີ້ ຫລື ເມີນເສີຍ ຕໍ່ການຈັດຕັ້ງປະຕິບັດວຽກງານເງິນຕາຕ່າງປະເທດ,
- ຫ້າມມີພຶດຕິກຳອື່ນ ທີ່ເປັນການລະເມີດກົດໝາຍ.
