ໄບຣຕັນ ສູ້ຂາດໃຈ ຕີສະເໝີ ແມນຊິຕີ້ 1-1 ຮັບປະກັນການໄດ້ໄປຫລິ້ນ ຢູໂຣປາ ລີກ
ຈົບລົງໄປຢ່າງໜ້າຕື່ນເຕັ້ນສຳລັບເກມພຣີເມຍລີກກາງອາທິດ ເມື່ອ ໄບຣຕັນ ຮຶດຕີສະເໝີ ແມນເຊັສເຕີ ຊິຕີ້ 1-1 ທີມແຊ້ມລີກ ເມື່ອຄືນວັນທີ 24 ພຶດສະພາຜ່ານມານີ້.
ກ່ອນເກມ ໄບຣຕັນ ເຈົ້າບ້ານຢູ່ອັນດັບ 6 ຂອງຕາຕະລາງ ມີ 61 ຄະແນນ, ຂະນະທີ່ ແມນເຊັສເຕີ ຊິຕີ້ ມີ 88 ຄະແນນ ແລະ ຄວ້າແຊ້ມໄປແລ້ວ. ຢ່າງໃດກໍ່ຕາມເຮືອໃບຍັງຫວັງທີ່ຈະຊະນະໂດຍການສົ່ງ ເອລລິງ ຮາແລນ, ເຄວິນ ເດບຣອຍ ແລະ ອີຄາຍ ກຸນໂດກັນ ລົງໄປລ່າປະຕູ.
ເກມນີ້ ແມນເຊັສເຕີ ຊິຕີ້ ໄດ້ປະຕູຂຶ້ນນຳກ່ອນ 1-0 ຈາກການຫລຸດຍິງຂອງ ຟິລ ໂຟເດນ ນາທີ 25, ແຕ່ຈາກນັ້ນມາໃນນາທີ 38 ໄບຣຕັນ ກໍ່ເປີດເກມບຸກໜັກ ຈົນໄດ້ປະຕູຕີສະເໝີ 1-1 ຈາກການຍິງຢ່າງສວຍງາມຂອງ ຈູລິໂອ ເອັນຊິໂຊ ສຽບສາມຫລ່ຽມຢ່າງສວຍງາມ.
ໃນເຄິ່ງເວລາທີສອງ ເຮືອໃບສີຟ້າ ມີໂອກາດຍິງປະຕູຫລາຍຄັ້ງ ແຕ່ກໍ່ບໍ່ປະສົບຜົນສຳເລັດ. ສຸດທ້າຍຈົບເກມແບ່ງຄະແນນກັນໄປ ແລະ ເປັນຜົນດີຂອງ “ໄບຣຕັນ” ເມື່ອພວກເຂົາເກັບໄດ້ອີກ 1 ຄະແນນ, ຮັບປະກັນໂຄຕ້າໄປຫລິ້ນໃນ ຢູໂຣປາ ລີກ ໃນລະດູການໜ້າ.
