ລະວັງ ! ອາກາດຮ້ອນ ພະຍາດຖອກທ້ອງຈະຖາມຫາ ກິນຢູ່ຕ້ອງຮັກສາອະນາໄມໃຫ້ດີ
ອາກາດຮ້ອນໆ ກິນໝາກສົ້ມ ດື່ມນ້ຳເຢັນໆ ເປັນສິ່ງທີ່ຫຼາຍຄົນມີຄວາມຕ້ອງການດື່ມເພື່ອແກ້ຄວາມຫິວ ແລະ ຫຼຸດຄວາມຮ້ອນໃນຮ່າງກາຍລົງ ແຕ່ຢາກໃຫ້ເຮົາຄຳນຶງເຖິງຄວາມປອດໄພທາງດ້ານສຸຂະພາບຕ້ອງມາກ່ອນ ຍ້ອນວ່າໄລຍະນີ້ອາກາດຮ້ອນອົບເອົ້າ ມັກມີຫຼາຍໆພະຍາດຕາມມາ ແລະ ໜຶ່ງໃນນັ້ນລວມທັງພະຍາດຖອກທ້ອງທີ່ມັກເກີດຂຶ້ນໃນຍາມຮ້ອນ ຊຶ່ງແຕ່ລະປີເກີດຂຶ້ນເປັນຈຳນວນຫຼາຍ.
ຍ້ອນວ່າຄົນເຮົາມັກກິນມັກດື່ມແບບສະບາຍເກີນໄປຈົນລືມຄຳນຶງເຖິງສຸຂະອະນາໄມຄວາມປອດໄພກັບຕົນເອງ ແລະ ຄົນໃນຄອບຄົວ, ຈຶ່ງພາໃຫ້ເກີດຖອກທ້ອງຮຸນແຮງແບບບໍ່ໄດ້ຕັ້ງໃຈ ອັນເນື່ອງມາຈາກການກິນການດື່ມ ຍ້ອນການປຸງແຕ່ງບໍ່ຖືກຫຼັກສຸຂະອະນາໄມເຊັ່ນວ່າ ອາດມີການໃຊ້ນ້ຳດິບປົນກັບນ້ຳອຸ່ນ ຫຼື ນ້ຳກ້ອນທີ່ມີແນວປົນເປື້ອນ, ບາງເທື່ອແມ່ຄ້າຫົວໃສກໍນຳເອົາອາຫານເກົ່າຂາຍບໍ່ໝົດມາອຸ່ນແລ້ວປຸງແຕ່ງສີສັນຄືນໃໝ່ແລ້ວຂາຍໃຫ້ລູກຄ້າ, ອາຫານທີ່ມີແມງວັນຕອມຫຼາຍແລະອື່ນໆ ໃນເມື່ອຄົນເຮົາກິນລົງໄປແລ້ວອາດຈະພາໃຫ້ເກີດຖອກທ້ອງໄດ້.
ກ່ອນຈະກິນຈະດື່ມຫຍັງລົງໄປ ຄວນຄຳນຶງເຖິງຄວາມປອດໄພທາງດ້ານສຸຂະພາບຂອງເຮົາເປັນອັນດັບທຳອິດ ດີແທ້ແມ່ນກິນອາຫານທີ່ປຸງແຕ່ງສຸກດີ, ສະອາດປອດໄພ, ຖ້າຫາກຈຳເປັນຕ້ອງຊື້ອາຫານຈາກຂ້າງນອກມາກິນ ໂດຍສະເພາະ ແມ່ນປະເພດອາຫານສຸກທີ່ວາງຂາຍຢູ່ຕາມຮ້ານນ້ອຍຮ້ານໃຫຍ່ກໍຕ້ອງມີສະຕິລະມັດລະວັງຄວນໃຫ້ແນ່ໃຈວ່າໄດ້ກິນແຕ່ອາຫານທີ່ດີ ມີການປຸງແຕ່ງໃໝ່ ແລະ ສຸກດີ, ບໍ່ແມ່ນອາຫານຄ້າງຄືນ, ບໍ່ມີແມງວັນຕອມ, ອາຫານດິບປະເພດລາບກ້ອຍຊອຍແຊ່ ເພາະທັງໝົດນັ້ນເຮົາບໍ່ອາດແນ່ໃຈໄດ້ວ່າຈະມີການປຸງແຕ່ງຖືກຫຼັກອະນາໄມຫຼືບໍ່. ບໍ່ຄວນນຳເອົາຄຳເວົ້າທີ່ວ່າ ກິນມຳໆ ບໍ່ຄຳເບິ່ງທ້ອງ ມາປະຕິບັດກັບຕົວເຮົາເອງແລະຄົນໃນຄອບຄົວ ຖ້າບໍຢາກໃຫ້ພະຍາດຖອກທ້ອງຖາມຫາມີແຕ່ປະຕິບັດຕາມຫຼັກອະນາໄມສາມສະອາດ ເທົ່ານັ້ນຈຶ່ງຈະພາໃຫ້ປອດໄພຈາກພະຍາດຖອກທ້ອງ.
