ແມັກຊິກເຕືອນປະຊາຊົນກວ່າ 25 ລ້ານຄົນ ກຽມພ້ອມອົບພະຍົບ ຫລັງພູໄຟໂປໂປກາເຕເປດ ປ່ອຍເຖົ່າຖ່ານອອກມາຢ່າງຮຸນແຮງ
ໜ່ວຍງານປະສານງານດ້ານການຄຸ້ມຄອງພົນລະເຮືອນແຫ່ງຊາດ (CNPC) ຂອງແມັກຊິກ ປະກາດເຕືອນປະຊາຊົນກວ່າ 25 ລ້ານຄົນ ທີ່ອາໄສຢູ່ໃນລັດສະໝີ 96,5 ກິໂລແມັດ ອ້ອມບໍລິເວນພູໄຟໂປໂປກາເຕເປດ (Popocatépetl) ໃຫ້ກຽມພ້ອມສໍາລັບອົບພະຍົບທີ່ອາດເກີດຂຶ້ນ ຫລັງຈາກພູໄຟໜ່ວຍນີ້ ເຊິ່ງຖືເປັນພູໄຟມີພະລັງ (Active Volcano) ອັນຕະລາຍທີ່ສຸດໃນປະເທດ ເກີດການປ່ອຍຄວັນ ແລະ ຂີ້ເຖົ່າອອກມາຢ່າງຮຸນແຮງນັບແຕ່ອາທິດຜ່ານມາ.
ເບື້ອງຕົ້ນພົບວ່າຜົນກະທົບຈາກຂີ້ເຖົ່າຂອງພູໄຟໂປໂປກາເຕເປດ ຕັ້ງຢູ່ທາງຕອນກາງ ຫ່າງຈາກນະຄອນຫລວງແມັກຊິກໂກ ໄປທາງຕາເວັນອອກສຽງໃຕ້ 70 ກິໂລແມັດ ສົ່ງຜົນໃຫ້ສະໜາມບິນເບນິໂຕ ຮົວເຣຊ (AICM) ພາຍໃນແມັກຊິກໂກ ຕ້ອງປິດໃຫ້ບໍລິການຊົ່ວຄາວໃນວັນທີ 20 ພຶດສະພາຜ່ານມາ. ຂະນະທີ່ໃນວັນທີ 22 ພຶດສະພາ ມີຫລາຍຖ້ຽວບິນປະສົບຄວາມຊັກຊ້າ ໂດຍທາງການຍັງໄດ້ປະກາດປິດໂຮງຮຽນຫລາຍສິບແຫ່ງພາຍໃນເມືອງນໍາອີກ.
CNPC ໄດ້ເພີ່ມລະດັບໄພຄຸກຄາມຈາກພູໄຟເປັນ “ໄລຍະ 3 ສີເຫລືອງ” ແລະ ເຕືອນປະຊາຊົນປະມານ 3 ລ້ານຄົນທີ່ອາໄສຢູ່ໃນຫລາຍເມືອງ ແລະ ບ້ານທີ່ຕັ້ງຢູ່ຕິດກັບພູໄຟ ໃຫ້ກຽມພ້ອມສໍາລັບອົບພະຍົບທີ່ອາດເກີດຂຶ້ນ.
ຂະນະທີ່ CNPC ຍັງເຕືອນເຖິງການປ່ອຍຄວັນຂອງພູໄຟທີ່ເພີ່ມຂຶ້ນ ແລະ ຂີ້ເຖົ່າທີ່ອາດລອຍໄປຫລາຍເມືອງໃກ້ຄຽງ, ພ້ອມປະກາດຂໍ້ແນະນໍາໃຫ້ປະຊາຊົນທີ່ອາໄສໃນບໍລິເວນທີ່ໄດ້ຮັບຜົນກະທົບ ຫລີກລ່ຽງການເຮັດກິດຈະກໍາກາງແຈ້ງ.
