ສະພາບອາກາດທີ່ແປປວນສົ່ງຜົນກະທົບໃຫ້ຫລາຍປະເທດໃນທົ່ວໂລກ

ວັນທີ 21 ພຶດສະພາ 2023 ຜ່ານມາ, ສຳນັກຂ່າວ TNN ລາຍງານວ່າ: ຈາກສະພາບອາກາດທີ່ແປປວນ ແລະ ຜົນກະທົບ ທີ່ເກີດຂຶ້ນຈາກພາວະໂລກຮ້ອນ, ໄດ້ສົ່ງຜົນກະທົບໃຫ້ຫລາຍປະເທດໄດ້ຮັບຜົນກະທົບຢ່າງຮຸນແຮງເປັນຕົ້ນແມ່ນ: ຫິມະເທິງພູເຂົາເອເວີເຣດປະເທດເນປານ ຫລຸດລົງ ເຮັດໃຫ້ມີສະພາບແຫ້ງແລ້ງຫຼາຍຂຶ້ນ, ອິຕາລີ ວິກິດນ້ຳຖ້ວມ ປະຊາຊົນຕ້ອງອົບພະຍົບ 3,6 ໝື່ນຄົນ ອອກຈາກພື້ນທີ່, ລັດອັນເບີຕາ ການາດາ ເກີດໄຟປ່າລຸກລາມເປັນອາທິດ ເຮັດໃຫ້ຕ້ອງໄດ້ປິດສວນສາທາລະນະເພື່ອປ້ອງກັນໄຟປ່າ, ປະເທດອິນເດຍ ປະເຊີນກັບຄື້ນຄວາມຮ້ອນສູງເຖິງ 45 ອົງສາ ປົກຄຸມພື້ນທີ່ຕ່າງໆທົ່ວປະເທດ ສົ່ງຜົນໃຫ້ພື້ນທີ່ກະສິກຳໄດ້ຮັບຄວາມເສຍຫາຍ.

ຫລ້າສຸດ ອົງການອຸຕຸນິຍົມວິທະຍາ ແຫ່ງສະຫະປະຊາຊາດ (WMO:World Meteorological Organization) ໄດ້ເຜີຍແຜ່ ລາຍງານສະບັບປັບປຸງ ໂດຍລະບຸວ່າ: ຜົນກະທົບຈາກການປ່ຽນແປງດິນຟ້າອາກາດ ເກືອບ 12,000 ເຫດການ ໃນໄລຍະ 50 ປີທີ່ຜ່ານມາ ໄດ້ສົ່ງຜົນກະທົບຕໍ່ມະນຸດ ແລະ ເສດຖະກິດຂອງໂລກຢ່າງມະຫາສານ.

ຕະຫຼອດໄລຍະ 50 ປີທີ່ຜ່ານມາ ຜົນກະທົບຈາກການປ່ຽນແປງດິນຟ້າອາກາດ ໄດ້ເຮັດໃຫ້ມີຜູ້ເສີຍຊີວິດ ຫຼາຍກວ່າ 2 ລ້ານຄົນ ແລະ ສ້າງຄວາມເສຍຫາຍແກ່ເສດຖະກິດຂອງໂລກ ເຖິງ 4.3 ລ້ານໆດອນລ່າ.

ເຖິງວ່າ ລະບົບເຕືອນໄພລ່ວງໜ້າ ຈະສາມາດຫຼຸດຜ່ອນຕົວເລກຜູ້ເສຍຊິວິດ ແຕ່ຜົນກະທົບທາງເສດຖະກິດຂອງໄພພິບັດເຫຼົ່ານີ້ກໍຍັງສືບຕໍ່ເກີດຂຶ້ນ ໂດຍສະເພາະ ໃນບັນດາປະເທດທີ່ກຳລັງພັດທະນາ.