ດັບເບິນຢູໄອຈີ ບຸກຊະນະ ມັດສະດາ ເຖິງຖິ່ນ 2-1 ຮັກສາຕຳແໜ່ງທີມນຳຢ່າງໜ້ຽວແໜ້ນ ເຕະບານ ມັດສະດາ ຢູດລີກ 2023

ຢູ-10 ສະໂມສອນ ດັບເບິນຢູໄອຈີ ນາຄາ ລົງສະໜາມນັດສົ່ງທ້າຍບຸກເອົາຊະນະ ສະໂມສອນ ມັດສະດາ ລາວ ຈີບີ ເອັບຊີ ເຖິງຖິ່ນ 2-1 ປະຕູ ຮັກສາຕຳແໜ່ງທີມນຳຕາຕະລາງຢ່າງໜ້ຽວແໜ້ນ ໃນການແຂ່ງຂັນເຕະບານ ຮຸ່ນອາຍຸບໍ່ເກີນ 10 ປີ ຫຼື ຢູ-10 ມັດສະດາ ຢູດລີກ 2023 (Mazda Youth League 2023) ຮອບຂາໄປ ອາທິດທີ 5 ລະດູການ 2023. ຂະນະທີ່ ຢູ-14 ປາກຊັນ ເອັບຊີ ເປີດບ້ານຮັບມື ເອສຣາ ເອັບຊີ ອອກນຳກ່ອນ ໄປກ່ອນແຕ່ສຸດທ້າຍຖືກ ເອສຣາ ທີມຢາມ ແຊງຊະນະ 5-4 ຄວ້າ 3 ແຕ້ມກັບບ້ານ.

ການແຂ່ງຂັນເຕະບານລາຍການດັ່ງກ່າວ ໄດ້ສືບຕໍ່ແຂ່ງຂັນລະຫວ່າງວັນທີ 20-21 ພຶດສະພາ 2023 ຈຳນວນ 13 ຄູ່ ຈາກ 3 ຮຸ່ນ ກໍຄື ຢູ-10, ຢູ-12 ແລະ ຢູ-14 ໂດຍສະເພາະການແຂ່ງຂັນຄູ່ບິກແມ໊ດ ໃນຮຸ່ນອາຍຸ 10 ປີ ຈັດຂຶ້ນ ໃນວັນທີ 21 ພຶດສະພາ 2023 ເປັນການພົບກັນລະຫວ່າງ ມັດສະດາ ລາວ ຈີບີ ເອັບຊີ ເປີດບ້ານຕ້ອນຮັບການມາຢາມຂອງ ດັບເບິນຢູໄອຈີ ນາຄາ. ຜ່ານການແຂ່ງຂັນຜົນປະກົດວ່າ ດັບເບິນຢູໄອຈີ ນາຄາ ບຸກເອົາຊະນະ ມັດສະດາ ລາວ ຈີບີ ເອັບຊີ ໄປແບບສຸດມ່ວນ 2-1 ປະຕູ ເກັບ 3 ແຕັມ ຮັກສາຕຳແໜ່ງທີມນຳຕາຕະລາງຢ່າງໜ້ຽວແໜ້ນ ສ່ວນຜົນອີກສອງຄູ່ທີ່ແຂ່ງຂັນໃນມື້ດຽວກັນ ວຽງຈັນ ເອັບທີ ບຸກຖະຫຼົ່ມ ເອໄອເອັດ 6-2 ແລະ ມາດເຕີ ເຊເວັນ ເອັບຊີ ຖະຫຼົ່ມ ຈຳປາຮັກ 13-0.

ສ່ວນຜົນການແຂ່ງຂັນ ຢູ-12 ແລະ ຢູ-14 ໃນວັນເສົາວັນທີ 20 ພຶດສະພາ 2023 ມີທັງໝົດ 10 ຄູ່ ຜົນປະກົດວ່າ ຢູ່-14 ເອສຣາ ຊະນະ ປາກຊັນ 5-4 ປະຕູ, ເອັບເຮັດແອວ ເອັບຊີ ຖະຫຼົ່ມ ເອໄອເອັດ 7-0, ເອັບຊີ ຕາລັນຕ້າ ຊະນະ ຈຳປາຮັກ 4-1 ປະຕູ, ມັດສະດາ ລາວ ຈີບີ ເອັບຊີ ຊະນະ ເຄເອັມທີ ເອັບຊີ 8-3 ແລະ ວຽງຈັນ ເອັບທີ ຊະນະ ມະຫາວິທະຍາໄລແຫ່ງຊາດ 2-0 ຂະນະທີ່ຜົນການແຂ່ງຂັນ ຢູ-12 ປະກົດວ່າ: ປາກຊັນ ເອັບຊີ ຢຸດຟອມເກັ່ງ ບີບີບີ ໂອໂຕ ຊະນະ 3-2 ປະຕູ, ຈຳປາຮັກ ສະເໝີ ເອັບຊີ ຕາລັນຕ້າ 0-0 ປະຕູ, ດັບເບິນຢູໄອຈີ ນາຄາ ຖະຫຼົ່ມ ເອໄອເອັດ ເອັບຊີ 13-0 ປະຕູ, ມັດສະດາ ລາວ ຈີບີ ເອັບຊີ ໄລ່ຕ້ອນ ມາດເຕີ ເຊເວັນ ເອັບຊີ 3-1 ປະຕູ ແລະ ວຽງຈັນ ເອັບທີ ຊະນະ ພີເອັມທີ ເອັບຊີ 6-0 ປະຕູ.

ການແຂ່ງຂັນເຕະບານ 7 ຄົນ ຫຼື 6 ຮັບ 1 ລາຍການດັ່ງກ່າວ ມີການຊີງໄຊທັງໝົດ 3 ຮຸ່ນ ກໍຄື ຢູ-10, ຢູ-12 ແລະ ຢູ-14 ສຳລັບ ຢູ-10 ມີ 6 ສະໂມສອນເຂົ້າຮ່ວມ, ຢູ-12 ມີ 10 ສະໂມສອນ ແລະ ຢູ-14 ກໍມີ 10 ສະໂມສອນເຂົ້າຮ່ວມແຂ່ງຂັນ ແຕ່ລະຮຸ່ນແຂ່ງຂັນພົບກັນໝົດໃນຮູບແບບລະບົບລີກ ມີທັງຮອບຂາໄປ-ຂາກັບ ຄາດວ່າຈະດຳເນີນແຂ່ງຂັນສຳເລັດໃນທ້າຍປີນີ້. ແນວໃດກໍດີ, ໃນລະຫວ່າງວັນທີ 27-28 ພຶດສະພານີ້ ທາງສະໂມສອນ ມັດສະດາ ຈີບີ ເອັບຊີ ຍັງຈະເປັນເຈົ້າພາບ ຈັດແຂ່ງຂັນ ມັດສະດາ ຊາເລັນ ຄັບ 2023 ຄາດວ່າຈະມີນັກກິລາທັງພາຍໃນ ແລະ ຕ່າງປະເທດ ໂດຍສະເພາະປະເທດເພື່ອນບ້ານຈະເຂົ້າຮ່ວມແຂ່ງຂັນຢ່າງຄຶກຄັກ.

ຂໍ້ມູນ: ໜັງສືພິມສຶກສາ-ກິລາລາຍວັນ