ກະຊວງສຶກສາ ຍ້ອງຍໍນັກຮຽນຕ່າງປະເທດ ປະກອບສ່ວນບັນທຶກສຽງຫລັກສູດວິຊາພາສາອັງກິດ ປ.5 ສະບັບປັບປຸງໃໝ່
ກະຊວງສຶກສາທິການ ແລະ ກິລາ (ສສກ) ຮ່ວມກັບລັດຖະບານອົດສະຕຣາລີ ຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າເຖິງການສຶກສາຂັ້ນພື້ນຖານ ໃນ ສປປ ລາວ (ແຜນງານບີຄວາ) ໄດ້ຈັດພິທີຍ້ອງຍໍນັກຮຽນຕ່າງຊາດ ທີ່ຮຽນຢູ່ໂຮງຮຽນນານາຊາດ ວຽງຈັນ ໄດ້ປະກອບສ່ວນໃນການບັນທຶກສຽງ ສໍາລັບຫລັກສູດວິຊາພາສາອັງກິດ ຊັ້ນ ປ.5 ສະບັບປັບປຸງໃໝ່ ເມື່ອບໍ່ດົນຜ່ານມາ, ຕາງໜ້າມອບໂດຍທ່ານ ຄໍາຈັນ ລັດທະຍອດ ຮອງອໍານວຍການ ສະຖາບັນຄົ້ນຄວ້າວິທະຍາສາດການສຶກສາ (ສວສ) ກະຊວງສຶກສາທິການ ແລະ ກິລາ ແລະ ທ່ານ ນາງ ວາແນັດຊ້າ ເຮກາຕີ້ ເລຂາເອກ ສະຖານທູດອົດສະຕຣາລີ ປະຈຳ ສປປ ລາວ.
ແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າເຖິງການສຶກສາຂັ້ນພື້ນຖານ ໃນ ສປປ ລາວ (ແຜນງານບີຄວາ) ແມ່ນຢູ່ໃນຂັ້ນຕອນສຸດທ້າຍຂອງຂອດການຜະລິດສື່ການຮຽນການສອນ ສໍາລັບຫລັກສູດຊັ້ນ ປ.5 ສະບັບປັບປຸງໃໝ່ ທີ່ຈະໄດ້ເລີ່ມຕົ້ນນຳໃຊ້ໃນສົກຮຽນໃໝ່ ໃນເດືອນກັນຍາ 2023 ນີ້. ປີນີ້ແມ່ນປີສຸດທ້າຍຂອງການປັບປຸງຫລັກສູດຊັ້ນປະຖົມສຶກສາແຫ່ງຊາດ ສະບັບປັບປູງໃໝ່ ຊຶ່ງໄດ້ເລີ່ມຕົ້ນມາແຕ່ປີ 2019. ວິຊາພາສາອັງກິດ, ວິຊາພາສາລາວ ແລະ ວິຊາວິທະຍາສາດ ແລະ ສິ່ງແວດລ້ອມ ເປັນວິຊາທີ່ສອນຢູ່ໃນຊັ້ນ ປ.5 ແລະ ເປັນວິຊາທີ່ໄດ້ຮັບການພັດທະນາໂດຍການສະໜັບສະໜູນຈາກລັດຖະບານອົດສະຕຣາລີ. ນັກຮຽນຊັ້ນປະຖົມສຶກສາໃນ ສປປ ລາວ ແມ່ນໄດ້ເລີ່ມຮຽນພາສາອັງກິດຕັ້ງແຕ່ຊັ້ນ ປ.3, ເຊິ່ງໃນເມື່ອນັກຮຽນໄດ້ຮຽນພາສາໃໝ່, ພວກເຂົາຕ້ອງການເຂົ້າເຖິງພາສາດັ່ງກ່າວໃນຫລາຍໂອກາດເພື່ອຟັງ ແຕ່ວ່າມັນອາດເປັນສິ່ງທ້າທາຍສໍາລັບຄູໃນ ສປປ ລາວ ທີ່ຈະສາມາດຍົກຕົວຢ່າງການອອກສຽງພາສາອັງກິດ ຫາກຄູເອງຍັງບໍ່ທັນໝັ້ນໃຈໃນລະດັບພາສາອັງກິດຂອງຕົນ.
ນັບແຕ່ຊັ້ນ ປ.3, ກະຊວງສຶກສາທິການ ແລະ ກິລາ ພ້ອມດ້ວຍແຜນງານບີຄວາ ໄດ້ຮ່ວມມືກັບໂຮງຮຽນນານາຊາດ ວຽງຈັນ (VIS) ຜະລິດສື່ຟາຍສຽງສຳລັບຫລັກສູດພາສາອັງກິດ ເປັນເວລາ 3 ປີຕິດຕໍ່ກັນ ແລະ ມີນັກຮຽນຫລາຍຄົນໄດ້ສະໝັກໃຈເຂົ້າຮ່ວມການບັນທຶກສຽງສຳລັບວິຊາພາສາອັງກິດ.
ນັກຮຽນໄດ້ບັນທຶກສຽງໃນບົດສົນທະນາ ແລະ ມີຫລາຍບົດບາດ ເພື່ອໃຫ້ບົດຮຽນມີຊີວິດຊີວາ ແລະ ສົມຈິງກັບການສົນທະນາແບບທໍາມະຊາດ. ພວກເຂົາຍັງໄດ້ບັນທຶກສຽງຮ້ອງເພງຈຳນວນໜຶ່ງ ແລະ ສຽງຂອງພວກເຂົາແມ່ນມ່ວນຫລາຍ. ການອ່ານສຽງຂອງນັກຮຽນແມ່ນເຮັດໄດ້ດີ ພວກເຂົາໄດ້ເນັ້ນການອ່ານຊ້າລົງ ແລະ ອອກສຽງແຕ່ລະຄໍາຢ່າງຈະແຈ້ງ ເພື່ອໃຫ້ນັກຮຽນຊັ້ນ ປ.5 ຂອງລາວເຂົ້າໃຈ ແລະ ປະຕິບັດຕາມປຶ້ມແບບຮຽນ. ພວກເຂົາຍັງໄດ້ເຮັດໄດ້ດີໃນການສະແດງທາງສຽງ ເພື່ອເຮັດໃຫ້ຟາຍສຽງຄືເຫດການແທ້ ແລະ ຄືຢູ່ໃນເຫດການດັ່ງກ່າວ.
ນັກຮຽນໄດ້ອັດສຽງໃນຫ້ອງບັນທຶກສຽງຂອງກະຊວງສຶກສາທິການ ແລະ ກິລາ ທີ່ສະຖາບັນຄົ້ນຄວ້າວິທະຍາສາດການສຶກສາ, ເຊິ່ງຖືກນໍາໃຊ້ປະຈໍາວັນ ເພື່ອສົ່ງຂ່າວກ່ຽວກັບການສຶກສາຜ່ານລາຍການວິທະຍຸຂອງ ສວສ.
ຄູ່ມືຄູວິຊາພາສາອັງກິດຊັ້ນປ.5 ຈະມີສຽງເພງທັງໝົດ 104 ສຽງ ພ້ອມທັງມີຄໍາແນະນໍາກ່ຽວກັບຟາຍສຽງທີ່ຈະໃຊ້ ແລະ ລາຍລະອຽດຂອງສຽງທັງພາສາອັງກິດ ແລະ ພາສາລາວ. ການນໍາໃຊ້ສື່ດ້ານສຽງຈະຊ່ວຍໃຫ້ຄູລາວສາມາດນຳພາການສອນພາສາອັງກິດໃຫ້ນັກຮຽນໂດຍໃຊ້ສຽງທີ່ສົມຈິງ, ເປີດໂອກາດໃຫ້ນັກຮຽນໄດ້ຟັງສຳນຽງພາສາອັງກິດທີ່ຫລາກຫລາຍ ແລະ ເຮັດໃຫ້ບົດຮຽນມີຄວາມຫ້າວຫັນ ແລະ ມ່ວນຊື່ນ.
ສໍາລັບຟາຍສຽງແມ່ນຈະອັດໃສ່ USB ແລະ ຈັດສົ່ງໃຫ້ແກ່ທຸກໂຮງຮຽນໃນ ສປປ ລາວ ພ້ອມທັງສາມາດໃຫ້ດາວໂລດ ແລະ ຟັງໄດ້ຜ່ານທາງຊ່ອງທາງຢູທູບ: ວິດີໂອສໍາລັບການພັດທະນາຄູ (Teacher Development Videos) ແລະ ຜ່ານທາງແພຼັດຟອມ ຄັງປັນຍາລາວ (Khang Panya Lao) ຂອງກະຊວງສຶກສາທິການ ແລະ ກິລາ.
ຂໍ້ມູນ: ສສກ
