ການຮັບໃບປະກາດ, ນຳໃຊ້ວຸດທິປະລິນຍາເອກກິດຕິມະສັກ ແລະ ສາດສະດາຈານກິດຕິມະສັກ
ອີງຕາມ ກົດຫມາຍວ່າດ້ວຍການສຶກສາຊັ້ນສູງ ສະບັບເລກທີ 87/ສພຊ, ລົງວັນທີ 11 ພະຈິກ 2020; ອີງຕາມ ດໍາລັດຂອງນາຍົກລັດຖະມົນຕີ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກະຊວງສຶກສາທິການ ແລະ ກິລາ ສະບັບເລກທີ 633/ນຍ, ລົງວັນທີ 18 ພະຈິກ 2021.
ກະຊວງສຶກສາທິການ ແລະ ກິລາ ຂໍຖືເປັນກຽດແຈ້ງມາຍັງທ່ານຊາບວ່າ: ກົດຫມາຍວ່າດ້ວຍການສຶກສາຊັ້ນສູງ ສະບັບ ເລກທີ 87/ສພຊ, ລົງວັນທີ 11 ພະຈິກ 2020, ມາດຕາ 50 ໄດ້ກໍານົດໄວ້ວ່າ:
“ປະກາສະນິຍະບັດປະລິນຍາເອກກິດຕິມະສັກ (Honorary Doctor) ແມ່ນ ປະກາສະນີຍະບັດ ທີ່ມອບເປັນກຽດໃຫ້ແກ່ບຸກຄົນໃດໜຶ່ງ ທີ່ມີຜົນງານດີເດັ່ນໃນຂົງເຂດວຽກງານໃດໜຶ່ງ ຊຶ່ງບໍ່ແມ່ນວຸດທິການສຶກສາຊັ້ນສູງ, ບໍ່ມີສິດນໍາໃຊ້ຊື່ຫຍໍ້ ປອ. ຂຽນນໍາໜ້າຊື່ຂອງຕົນເອງ ແລະ ບໍ່ມີຜົນຕໍ່ການປະຕິບັດນະໂຍບາຍເງິນເດືອນ.
ມະຫາວິທະຍາໄລ ຫຼື ສະຖານການສຶກສາຊັ້ນສູງ ທຽບເທົ່າມະຫາວິທະຍາໄລ ສາມາດອອກປະກາສະນີຍະບັດ ປະລິນຍາເອກກິດຕິມະສັກໃຫ້ບຸກຄົນພາຍນອກ ຕາມເງື່ອນໄຂທີ່ສະຖານການສຶກສາຊັ້ນສູງທີ່ກ່ຽວຂ້ອງກໍານົດ ໂດຍຜ່ານການ ຮັບຮອງຈາກສະພາສະຖານການສຶກສາຊັ້ນສູງຂອງຕົນ ແລະ ການເຫັນດີຂອງອົງການຈັດຕັ້ງທີ່ກ່ຽວຂ້ອງ.”
ສະນັ້ນ, ຈຶ່ງຂໍແຈ້ງມາຍັງບັນດາທ່ານ ທີ່ໄດ້ຮັບຂໍ້ສະເໜີໃນການມອບປະກາສະນີຍະບັດປະລິນຍາເອກກິດຕິມະສັກ ຈາກສະຖານການສຶກສາຊັ້ນສູງ ທັງພາຍໃນ ແລະ ຕ່າງປະເທດ ໃຫ້ສະເໜີຂໍຄໍາເຫັນຈາກກະຊວງສຶກສາທິການ ແລະ ກິລາ ກ່ອນ ພິຈາລະນາຮັບເອົາປະກາສະນີຍະບັດດັ່ງກ່າວ. ສໍາລັບທ່ານທີ່ໄດ້ຮັບປະກາສະນີຍະບັດປະລິນຍາເອກກິດຕິມະສັກ ຜ່ານມາແລ້ວ ຫາກຕ້ອງການຂຽນນໍາໜ້າຊື່, ລະບຸໃນ ນາມບັດ, ຊີວະປະຫວັດ ຫຼື ເອກະສານທາງການອື່ນໆ ໃຫ້ຂຽນວຸດທິເຕັມ (ປະລິນຍາເອກກິດຕິມະສັກ) ຕາມທີ່ກໍານົດໄວ້ໃນຫນັງສືຢັ້ງຢືນດັ່ງກ່າວ.
ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ປະຕິບັດຕາມແຈ້ງການສະບັບນີ້ດ້ວຍ.
ແຈ້ງການ ກະຊວງສຶກສາທິການ ແລະ ກິລາ ຂໍຖືເປັນກຽດແຈ້ງມາຍັງທ່ານ ຊາບວ່າ: ຕຳແໜ່ງວິຊາການຄູຂັ້ນ ສາດສະດາຈານ ກິດຕິມະສັກ (Honorary Professor) ແມ່ນຕຳແໜ່ງວິຊາການຄູປະເພດໜຶ່ງ ແຕ່ງຕັ້ງເພື່ອເປັນ ກຽດຍົກຍ້ອງຖານະໃຫ້ເປັນ ກິດຕິມະສັກ ສຳລັບບຸກຄົນທີ່ມີຜົນງານດີເດັ່ນຕໍ່ສະຖານການສຶກສາໃດໜຶ່ງ ຊຶ່ງແຕ່ງຕັ້ງ ໂດຍອະທິການບໍດີມະຫາວິທະຍາໄລ ຫຼື ຫົວໜ້າສະຖານການສຶກສາຊັ້ນສູງທີ່ກ່ຽວຂ້ອງ ຊຶ່ງຕຳແໜ່ງດັ່ງກ່າວແຕກຕ່າງ ຈາກຕຳແໜ່ງ ສາດສະດາຈານ ທີ່ຕ້ອງເປັນຄູສອນປະຈຳ ແລະ ມີຜົນງານທາງວິຊາການດ້ານການສິດສອນ ແລະ ການ ຄົ້ນຄວ້າວິທະຍາສາດ.
ດຳລັດວ່າດ້ວຍຕຳແໜ່ງວິຊາການຄູ ຢູ່ສະຖານການສຶກສາຊັ້ນສູງ ສະບັບເລກທີ 03/ລບ, ລົງວັນ ທີ 10 ມັງກອນ 2020, ມາດຕາ 19 ໄດ້ກຳນົດວ່າ: “ສໍາລັບຄູບໍ່ປະຈຳ ທີ່ໄດ້ຮັບຕຳແໜ່ງວິຊາການຄູຢູ່ສະຖານການສຶກ ສາຊັ້ນສູງ ຂັ້ນ ສາດສະດາຈານກຽດຕິຄຸນ (Emeritus Professor), ສາດສະດາຈານພິເສດ (Adjunct Professor), ສາດສະດາຈານກິດຕິມະສັກ (Honorary Professor) ບໍ່ສາມາດນຳໃຊ້ຊື່ຫຍໍ້ຂອງຕຳແໜ່ງວິຊາການ ຄູ (ສຈ.) ເພື່ອຂຽນນໍາໜ້າຊື່ຂອງຕົນ”.
ສະນັ້ນ, ຈຶ່ງແຈ້ງມາຍັງບັນດາທ່ານ ທີ່ໄດ້ຮັບຕຳແໜ່ງວິຊາການຄູຂັ້ນດັ່ງກ່າວຈາກສະຖານການສຶກສາຊັ້ນສູງທັງ ພາຍໃນ ແລະ ຕ່າງປະເທດ ເອົາໃຈໃສ່ປະຕິບັດຕາມກົດໝາຍ ແລະ ລະບຽບການທີ່ກ່ຽວຂ້ອງໃນກໍລະນີທີ່ຕ້ອງການ ລະບຸຊື່ຕຳແໜ່ງດັ່ງກ່າວນຳໜ້າຊື່, ໃນນາມບັດ, ຊີວະປະຫວັດ ແລະ ເອກະສານທາງການອື່ນໆ ໃຫ້ຂຽນຊື່ຕໍາແໜ່ງ ເຕັມ ຕາມທີ່ກຳນົດໄວ້ໃນໜັງສືຢັ້ງຢືນດັ່ງກ່າວ. ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ປະຕິບັດຕາມແຈ້ງການສະບັບນີ້ດ້ວຍ.
