ປິດສາກ 12 ປີ ຟິລ ໂຈນ ປະກາດອຳລາ ແມນເຊສເຕີ ຢູໄນເຕັດ ຫລັງຈົບລະດູການນີ້
ຟິລ ໂຈນ ກອງຫລັງປະສົບການຫລາຍຂອງ ແມນເຊສເຕີ ຢູໄນເຕັດ ຢືນຢັນວ່າຈະຍ້າຍອອກຈາກທີມ ຫລັງຈົບລະດູການນີ້ ພ້ອມເປັນການປິດສາກໄລຍະເວລາ 12 ປີກັບສະໂມສອນ.
ສຳລັບ ໂຈນ ຍ້າຍມາຈາກ ແບລັກເບີນ ໂຣເວີ ມາຢູ່ກັບ ແມນເຊສເຕີ ຢູໄນເຕັດ ເມື່ອປີ 2011 ແລະ ລາວກໍມີສ່ວນສຳຄັນໃນການພາທີມຄວ້າແຊ໊ມມາຄອງຫລາຍລາຍການທັງ ພຣີເມຍລີກ 2012-13, ເອຟເອ ຄັບ 2015-16, ຢູຟາ ຢູໂຣປາ ລີກ 2016-17 ເປັນຕົ້ນ ພ້ອມສະຖິຕິລົງສະໜາມ 229 ນັດ ລວມທຸກລາຍການຍິງໄດ້ 6 ປະຕູ.
ແນວໃດກໍຕາມສັນຍາຂອງດາວເຕະອາຍຸ 31 ປີ ກັບທີມຈະຫມົດລົງໃນໄລຍະເດືອນມິຖຸນານີ້ ແຕ່ບໍ່ມີການຂະຫຍາຍອອກໄປທ່າມການຂ່າວລືວ່າທັງ 2 ຝ່າຍກຽມແຍກທາງກັນໃນລະດູການນີ້.
ຫລ້າສຸດ ໂຈນ ໄດ້ອອກມາໂພສໃນສື່ສັງຄົມອອນລາຍສ່ວນຕົວວ່າ ລາວຈະຍ້າຍອອກຈາກຕົ້ນສັງກັດ ຫລັງຈົບລະດູການນີ້ແນ່ນອນແລ້ວ : “ ມັນຍາກຫລາຍໃນໄລຍະ 2-3 ປີທີ່ຜ່ານມາ ຂ້ອຍຫວັງວ່າຂ້ອຍຈະໄດ້ລົງຫລິ້ນຫລາຍກວ່ານີ້ ຂ້ອຍຈະບອກມາຈາກຫົວໃຈ ຂ້ອຍເຮັດທຸກຢ່າງທີ່ເຮັດໄດ້ແລ້ວ ”.
