ສປປ ລາວ ຈະສົ່ງນັກກິລາ 7 ປະເພດ ໄລ່ລ່າຄວາມຫວັງ 2 ຫລຽນຄຳ “ອາຊຽນ ພາຣາເກມ”

ຢ່າງເປັນທາງການ ສາທາລະນະລັດ ປະຊາທິປະໄຕ ປະຊາຊົນລາວ ຫຼື ສປປ ລາວ ຈະສົ່ງທັບນັກກິລາຄົນພິການທີມຊາດລາວ ຈຳນວນ 89 ຄົນ, ຍິງ 36 ຄົນ ຈາກ 7 ປະເພດກິລາ ໄລ່ລ່າຄວາມຫວັງ 2 ຫຼຽນຄຳ ໂດຍສະເພາະ 2 ປະເພດກິລາທີ່ມີຄວາມຫວັງ ກໍຄື ຍົກນໍ້າໜັກ ແລະ ບານເຕະ ໃນການເຂົ້າຮ່ວມແຂ່ງຂັນກິລາຄົນພິການອາຊຽນ ຫຼື “ອາຊຽນ ພາຣາເກມ” ຄັ້ງທີ 12 ທີ່ຣາຊະອານາຈັກກຳປະເຈຍ ຮັບກຽດເປັນເຈົ້າພາບ ລະຫວ່າງວັນທີ 3-9 ມິຖຸນານີ້.

ເພື່ອເປັນການຫ້າງຫາກະກຽມຄວາມພ້ອມເຂົ້າຮ່ວມງານດັ່ງກ່າວ, ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ທັງເປັນຮອງປະທານ ແລະ ເລຂາທິການຄະນະກຳມະການພາຣາແລມປິກແຫ່ງຊາດລາວ ໄດ້ຜ່ານບົດລາຍງານຫຍໍ້ການກະກຽມຄວາມພ້ອມຮອບດ້ານໃນການເຂົ້າຮ່ວມແຂ່ງຂັນກິລາ “ອາຊຽນ ພາຣາເກມ” ຄັ້ງທີ 12 ຕໍ່ກອງປະຊຸມຄະນະລັດຖະມົນຕີ ສສກ ຄັ້ງວັນທີ 19 ພຶດສະພາ 2023 ໃຫ້ຮູ້ວ່າ: ການເຂົ້າຮ່ວມແຂ່ງຂັນຄັ້ງນີ້ ມີຈຳນວນ 7 ປະເພດກິລາ ຄື: ແລ່ນ-ລານ (ລວມ 11 ຄົນ, ນັກກິລາ 7 ຄົນ, ຍິງ 2 ຄົນ), ລອຍນ້ຳ (ລວມ 11 ຄົນ, ນັກກິລາ 7 ຄົນ, ຍິງ 2 ຄົນ), ຍົກນ້ຳໜັກ (ລວມ 6 ຄົນ, ນັກກິລາ 3 ຄົນ, ຍິງ 1 ຄົນ), ໂກນບານຍິງ (ລວມ 10 ຄົນ, ນັກກິລາ 6 ຄົນ), ບັອດເຊຍ (ລວມ 7 ຄົນ, ນັກກິລາ 3 ຄົນ, ຍິງ 1 ຄົນ), ບານບ້ວງລໍ້ເລື່ອນຍິງ (ລວມ 13 ຄົນ, ນັກກິລາ 9 ຄົນ) ແລະ ກິລາບານເຕະຄົນພິການຕາ (ລວມ 15 ຄົນ, ນັກກິລາ 10 ຄົນ) ລວມຜູ້ເຂົ້າຮ່ວມທັງໝົດ 89 ທ່ານ, ຍິງ 36 ທ່ານ, ໃນນັ້ນ ຄະນະນຳ 11 ທ່ານ, ຍິງ 6 ທ່ານ, ແພດ-ນັກຂ່າວ 5 ທ່ານ, ຍິງ 2 ທ່ານ, ຄູຝຶກ-ຜູ້ຊ່ວຍຄູຝຶກ 28 ທ່ານ, ຍິງ 7 ທ່ານ ແລະ ນັກກິລາທັງໝົດ 45 ຄົນ, ຍິງ 21 ຄົນ.

ສຳລັບການກະກຽມວຽກໃນໄລຍະຜ່ານມາ ແມ່ນໄດ້ສຳເລັດວຽກງານການປະສານງານກັບຄະນະຮັບຜິດຊອບຈັດການແຂ່ງຂັນໂດຍພື້ນຖານ ໂດຍສະເພາະການລົງທະບຽນຄະນະນຳ, ຄູຝຶກ ແລະ ນັກກິລາ ຍັງແຕ່ນັກຮັບບານ ນັກກິລາບານເຕະຄົນພິການຕາ 2 ຄົນ ຍັງລົງທະບຽນບໍ່ທັນໄດ້ ແລະ ຈະໄດ້ນຳສະເໜີເຂົ້າກອງປະຊຸມ DRM ຄັ້ງວັນທີ 28-29 ພຶດສະພາ 2023 ທີ່ກຳປູເຈຍ.

ສ່ວນວຽກການເງິນ ແລະ ບໍລິຫານ ໄດ້ຮັບອະນຸມັດງົບປະມານເຂົ້າຮ່ວມງານແຂ່ງຂັນຄັ້ງນີ້ທັງໝົດ 4 ຕື້ກີບ ແລະ ໄດ້ດຳເນີນເອກະສານຂໍຖອນງົບປະມານຈຳນວນ 4 ກິດຈະກຳຄື: ປະກອບເອກະສານຂໍຖອນງົບປະມານການເຂົ້າຮ່ວມກອງປະຊຸມ CDM ຈຳນວນ 2 ທ່ານ ເປັນຈຳນວນເງິນ 48.445.000ກີບ, ປະກອບເອກະສານການໂອນເງິນເສຍພັນທະເຂົ້າຮ່ວມແຂ່ງຂັນ 50 ໂດລາສະຫະລັດຕໍ່ 1 ທ່ານ ໃຫ້ຄະນະກຳມະການກິລາຄົນພິການອາຊຽນ (APSF) ຈຳນວນ 4.450 ໂດລາສະຫະລັດ ເທົ່າກັບ 77.906.150 ກີບ (ອັດຕາແລກປ່ຽນວັນທີ 8 ພຶດສະພາ 2023 ) ແລະ ເສຍພັນທະສະມາຊິກ APSF, APC, IPC ປະຈຳປີ 2023 ຈຳນວນ 5.703.100 ກີບ, ນະໂຍບາຍການເຂົ້າສູນຝຶກຊ້ອມຂອງຄະນະນັກກິລາ 7 ປະເພດກິລາ ແລະ ນະໂຍບາຍນ້ຳມັນການລົງຕິດຕາມການຝຶກຊ້ອມຂອງຄະນະນຳ, ຄູຝຶກ ແລະ ນັກກິລາລວມໝົດ 474.200.000 ກີບ ຂະນະທີ່ ງົບປະມານຮັບໃຊ້ການເຂົ້າຮ່ວມແຂ່ງຂັນປະກອບມີນະໂຍບາຍການການແຂ່ງຂັນ, ເງິນແຮຄະນະ, ແຮບຸກຄົນ, ເງິນທີ່ພັກ, ອັດຕາກິນຂອງຄະນະນຳ, ກອງເລຂາລວມທັງໝົດ 602.501.000 ກີບ.

ສະນັ້ນ, ໃນວັນທີ 19 ພຶດສະພາ 2023 ໄດ້ມີແຜນເລີ່ມເບີກນະໂຍບາຍຕ່າງໆໃຫ້ຄະນະນຳ, ກອງເລຂາ, ຄູຝຶກ, ຜູ້ຊ່ວຍຄູຝຶກ ແລະ ນັກກິລາ ຕາມແຜນງົບປະມານທີ່ໄດ້ຮັບອະນຸມັດ ງົບປະມານຮັບໃຊ້ວຽກທີ່ບໍ່ທັນໄດ້ປະກອບເອກະສານຖອນເງິນແມ່ນການປະຕິບັດນະໂຍບາຍນັກກິລາທີ່ໄດ້ຫຼຽນ (ຈະໄດ້ປະກອບເອກະສານຂໍຖອນງົບປະມານຕົວຈິງ ພາຍຫຼັງສຳເລັດການແຂ່ງຂັນ) ຂະນະທີ່ ວຽກການປະມູນ ແລະ ການຈັດຊື້ ກົມການເງິນ ໄດ້ສຳເລັດກອງປະຊຸມມອບ-ຮັບປີ້ຍົນໃຫ້ຄະນະກຳມະການພາຣາແລມປິກແຫ່ງຊາດລາວແລ້ວ ໃນວັນທີ 17 ພຶດສະພາ 2023 ການຈັດຊື້ອຸປະກອນຮັບໃຊ້ການຝຶກຊ້ອມ, ການແຂ່ງຂັນ ແລະ ເຄື່ອງນຸ່ງຕ່າງໆ ຂອງຄະນະນຳ, ຄູຝຶກ ແລະ ນັກກິລາຄົນພິການທີມຊາດລາວ ໃນວັນທີ 8 ພຶດສະພາ 2023 ເປັນມູນຄ່າທັງໝົດ 1.108.378.000 ກີບ ແລະ ຄະນະຮັບຜິດຊອບໄດ້ດຳເນີນຕາມຂະບວນການ, ຕາມກົດໝາຍ ແລະ ຄຳແນະນຳຂອງກະຊວງການເງິນໄດ້ກຳນົດໄວ້ ແລະ ໄດ້ປະເມີນຜົນຂອງການປະມູນ ໃນຕອນບ່າຍຂອງວັນທີ 10 ພຶດສະພາ 2023 ທີ່ຫ້ອງປະຊຸມກົມກິລາມວນຊົນ, ພະລະ ແລະ ສິລະປະສຶກສາ ແລະ ຈະມີກອງປະຊຸມກວດກາ 100% ໃນວັນທີ 25 ພຶດສະພາ 2023.

ນອກຈາກນັ້ນ, ການຝຶກຊ້ອມຂອງນັກກິລາທັງ 7 ປະເພດ ແມ່ນໄດ້ເລີ່ມຝຶກຊ້ອມມາແຕ່ຕົ້ນເດືອນ ມີນາ 2023 ພາຍຫຼັງສຳເລັດການເຂົ້າຮ່ວມແຂ່ງຂັນກິລາຄົນພິການແຫ່ງຊາດ ຄັ້ງທີ 3 ທີ່ ແຂວງຊຽງຂວາງ ມາພັກໄລຍະປີໃໝ່ລາວ ແລະ ເລີ່ມແຕ່ວັນທີ 15-30 ພຶດສະພາ 2023 ແມ່ນໄລຍະການຝຶກຊ້ອມເຂັ້ມເພື່ອກຽມຄວາມພ້ອມໃນການເຂົ້າຮ່ວມແຂ່ງຂັນ ແລະ ຄະນະນຳພວກເຮົາກໍໄດ້ລົງຕິດຕາມ ແລະ ໃຫ້ກຳລັງໃນຢ່າງປົກກະຕິ ໂດຍການຄາດຄະເນຫຼຽນລາງວັນ ສະເພາະກິລາແລ່ນ-ລານ ຫວັງທີ 1 ຫຼຽນເງິນ, 3 ຫຼຽນທອງ, ກິລາລອຍນ້ຳ 6 ຫຼຽນທອງ, ກິລາຍົກນ້ຳໜັກ 1 ຫຼຽນຄຳ, 1 ຫຼຽນເງິນ, 4 ຫຼຽນທອງ, ກິລາໂກນບານຍິງ 1 ຫຼຽນເງິນ, ກິລາບັອດເຊຍ ຂໍເຂົ້າຮອບ 4 ທີມ, ກິລາບານບ້ວງລໍ້ເລື່ອນຍິງ 1 ຫຼຽນເງິນ, 1 ຫຼຽນທອງ ແລະ ກິລາບານເຕະ 1 ຫຼຽນຄຳ ລວມທັງໝົດ 2 ຫຼຽນຄຳ, 5 ຫຼຽນເງິນ ແລະ 14 ຫຼຽນທອງ.

ສຳລັບແຜນການເດີນທາງຂອງຄະນະນຳ, ຄະນະກອງເລຂາ, ຄູຝຶກ, ຜູ້ຊ່ວຍຄູຝຶກ ແລະ ຄະນະນັກກິລາ ຄະນະ CDM ແລະ ກອງເລຂາ-ປະສານງານ ຈຳນວນ 6 ທ່ານ ຈະເດີນທາງ ໃນວັນທີ 26 ພຶດສະພາ 2023 ກັບ 10 ມິຖຸນາ 2023 ເພື່ອໄປກະກຽມຄວາມພ້ອມຮອບດ້ານໃນການຮອງຮັບການເດີນທາງຂອງຄະນະນຳ ແລະ ຄະນະນັກກິລາ ແລະ ເຂົ້າຮ່ວມກອງປະຊຸມ DRM-Meeting ແລະ ຂະບວນໃຫຍ່ ຊຶ່ງມີຄະນະນຳ, ຄູຝຶກ, ຜູ້ຊ່ວຍຄູຝຶກ, ແພດປະຈຳທີມ, ນັກຂ່າວ ແລະ ນັກກິລາ ຈຳນວນ 78 ທ່ານ ເລີ່ມອອກເດີນທາງໃນວັນທີ 31 ພຶດສະພາ 2023.

ຂໍ້ມູນ-ຮູບພາບ: ໜັງສືພິມສຶກສາ-ກິລາລາຍວັນ