ປກສ ເມືອງ ໄຊບົວທອງ ກັກຕົວຜູ້ຖືກຫາໄດ້ 1 ຄົນ ພ້ອມຢຶດຂອງກາງຢາບ້າ 1.994 ເມັດ ແລະ ເງິນອີກຫລາຍຮ້ອຍລ້ານກີບ
ວັນທີ 5 ພຶດສະພາ 2023 ຜ່ານມາ; ເຈົ້າໜ້າທີ່ ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງໄຊບົວທອງ ແຂວງຄຳມ່ວນ ໄດ້ລົງເຄື່ອນໄຫວແກ້ໄຂມ້າງລາຍຄະດີການຄ້າ-ຂາຍ ແລະ ເສບຢາເສບຕິດ ຢູ່ເຂດບ້ານ ແກ້ງມື້ນ ເມືອງໄຊບົວທອງ ສາມາດກັກຕົວເປົ້າໝາຍຄ້າ-ຂາຍ ແລະ ເສບຢາເສບຕິດໄດ້ 1 ຄົນ ພ້ອມຂອງກາງຢາບ້າ 1.994 ເມັດ ມາດຳເນີນຄະດີ.
ໃນເວລາ 15:15 ນາທີ ຂອງວັນທີ 5 ພຶດສະພາ 2023 ເຈົ້າໜ້າທີ່ ປກສ ເມືອງໄຊບົວທອງ ໄດ້ຮັບການລາຍງານຈາກພົນລະເມືອງດີວ່າ ມີກຸ່ມແກ້ງມົ້ວສຸມຄ້າຂາຍ, ຈຳໜ່າຍ ແລະ ເສບຢາເສບຕິດ ປະເພດຢາບ້າຢູ່ບ້ານແກ້ງມື້ນ ເມືອງໄຊບົວທອງ ແຂວງຄຳມ່ວນ ເມື່ອໄດ້ຮັບຂ່າວແລ້ວເຈົ້າໜ້າທີ່ຕຳຫຼວດວິຊາສະເພາະໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງ ໄຊບົວທອງ ຈຶ່ງໄດ້ປະສານສົມທົບກັບ ປກສ ກຸ່ມບ້ານ ນໍ້າກະປໍ ເມື່ອງໄຊບົວທອງ ແຂວງຄຳມ່ວນ ແລະ ພາກສ່ວນທີ່ກ່ຽວຂ້ອງ ເພື່ອຕິດຕາມ, ກວດກາສະກັ້ນກັດ ໃນການເຄື່ອນໄຫວຄ້າ-ຂາຍ ຈຳໜ່າຍ ແລະ ເສບຢາເສບຕິດດັ່ງກ່າວ ພໍມາຮອດເວລາ 19:00 ໂມງຂອງວັນດຽວກັນ ເຈົ້າໜ້າທີ່ຕຳຫຼວດວິຊາສະເພາະ ຈຶ່ງເຫັນເປົ້າໜາຍ 1 ຄົນ ຢູ່ໃນເຮືອນຂອງຜູ້ກ່ຽວ ເຈົ້າໜ້າທີ່ຈຶ່ງໄດ້ສະແດງຕົວເຂົ້າຈັບຕົວ ແລະ ທຳການກວດຄົ້ນເຄຫະສະຖານ (ເລົ້າເຂົ້າ) ພົບເຫັນຢາບ້າ 1 ມັດ ເທົ່າກັບ 1.994 ເມັດ ທີ່ຊຸກເຊື່ອງໄວ້ຢູ່ເລົ້າເຂົ້າ ແລະ ເງິນ 271.400.000 ກີບ (ສອງຮ້ອຍເຈັດສິບເອັດລ້ານສີ່ແສນກີບ) ແລະ ໂທລະສັບ ວິໂວ້ ສີແດງ 1 ໜ່ວຍ. ດັ່ງນັ້ນເຈົ້າໜ້າທີ່ຕຳຫຼວດ ປກສ ເມືອງໄຊບົວທອງ ຈຶ່ງໄດ້ກັກຕົວຜູ້ຕ້ອງຫາ 1 ຄົນ ມາດຳເນີນການສືບສວນ-ສອບສວນ.
ຜ່ານການສືບສວນ-ສອບສວນ ຂອງເຈົ້າໜ້າທີ່ຕຳຫຼວດວິຊາສະເພາະ ປກສ ເມືອງໄຊບົວທອງ ຈຶ່ງຮູ້ວ່າ: ຜູ້ຖືກຫາ ຊື່ທ້າວ ປິກ ຈູມມະລີ ອາຍຸ 24 ປີ ອາຊີບເຮັດນາ ຢູ່ບ້ານແກ້ງມື້ນ, ເມືອງໄຊບົວທອງ ແຂວງຄຳມ່ວນ ຜູ້ກ່ຽວຮັບສາລະພາບວ່າ: ຢາເສບຕິດປະເພດຢາບ້າຈຳນວນດັ່ງກ່າວແມ່ນເປັນຂອງຜູ້ກ່ຽວແທ້ ແລະ ເງິນແມ່ນໄດ້ມາຈາກການຂາຍຢາບ້າ ເຊິ່ງຢາບ້າທີ່ນຳມາຂາຍແມ່ນຊື້ມາຈາກກຸ່ມແກ້ງຮ່ວມຂະບວນການ ແລ້ວຈະນຳເອົາຢາບ້າຈຳນວນດັ່ງກ່າວຂາຍ ແລະ ຈຳໜ່າຍໃຫ້ໄວລຸ້ນແຖວບ້ານ ແລະ ເຂດໃກ້ຄຽງ. ຕໍ່ກັບຄະດີດັ່ງກ່າວເຈົ້າໜ້າທີ່ໜ່ວຍງານສະກັ້ນກັດ ແລະ ຕ້ານຢາເສບຕິດ ປກສ ເມືອງ ໄຊບົວທອງ ແຂວງຄຳມ່ວນ ແມ່ນເລັ່ງໃສ່ການສືບສວນ-ສອບສວນ ຂະຫຍາຍຜົນຫາກຸ່ມແກ້ງຮ່ວມຂະບວນການມາດຳເນີນຄະດີຕາມລະບຽບກົດໜາຍຕໍ່ໄປ.
