ບຣາຊິວກຽມອອກ “ພັນທະບັດສີຂຽວ” ທ້າຍປີນີ້ ເພື່ອລະດົມທຶນພັດທະນາໂຄງການດ້ານສິ່ງແວດລ້ອມ ແລະ ຄວາມຍືນຍົງ

ລັດຖະບານບຣາຊິວໄດ້ຈັດຕັ້ງຄະນະກໍາມະການລະຫວ່າງກະຊວງຂຶ້ນໃນວັນທີ 17 ພຶດສະພາ ເພື່ອພັດທະນາແຜນງານການອອກພັນທະບັດອະທິປະໄຕເພື່ອຄວາມຍືນຍົງ (Sustainable Sovereign Bonds) ຫລື ພັນທະບັດສີຂຽວ ໃນທ້າຍປີ 2023.

ທາງການບຣາຊິວຊີ້ແຈງວ່າ: ພັນທະບັດໃໝ່ເຫລົ່ານີ້ຈະເປັນກາສານໜີ້ສາທາລະນະທີ່ໄດ້ຮັບການສະໜັບສະໜູນຈາກການຈັດສັນງົບປະມານຂອງລັດຖະບານກາງບຣາຊິວ ເພື່ອການພັດທະນາທີ່ຍືນຍົງ ລວມທັງໃຊ້ໃນການດໍາເນີນໂຄງການຕ່າງໆດ້ານສິ່ງແວດລ້ອມ ແລະ ສັງຄົມ ໂດຍຄາດວ່າຈະສາມາດລະດົມທຶນໄດ້ 2 ພັນລ້ານໂດລາສະຫະລັດ.

ບຣາຊິວຫວັງໃຊ້ພັນທະບັດສີຂຽວນີ້ສ້າງຄວາມເຊື່ອໝັ້ນໃຫ້ບັນດານັກລົງທຶນ ຫລັງຜູ້ນໍາຄົນປັດຈຸບັນຂອງບຣາຊິວ ປະທານາທິບໍດີ ລູອິຊ ອິນາຊິໂອ ລູລາ ດາ ຊິລວາ ພະຍາຍາມຊຸກຍູ້ໃຫ້ບຣາຊິວເປັນຜູ້ນໍາດ້ານສິ່ງແວດລ້ອມໃນປະຊາຄົມໂລກ.

ປັດຈຸບັນການອອກກາສານໜີ້ດ້ານຄວາມຍືນຍົງເປັນໜຶ່ງໃນແຫລ່ງລະດົມທຶນທີ່ໄດ້ຮັບຄວາມສົນໃຈຫລາຍ ຫລັງຈາກພາກລັດ ແລະ ພາກເອກະຊົນໃນຫລາຍປະເທດທົ່ວໂລກຕ່າງເນັ້ນໜັກເຖິງບັນຫາດ້ານສິ່ງແວດລ້ອມ ແລະ ການປ່ຽນແປງຂອງສະພາບອາກາດ ຈຶ່ງມຸ້ງຫາວິທີແກ້ໄຂ ແລະ ຮັບມືຕໍ່ບັນຫາເຫລົ່ານີ້ຢ່າງຈິງຈັງ ແລະ ເພື່ອຈະບັນລຸເປົ້າໝາຍຕ່າງໆທີ່ໄດ້ຕັ້ງໄວ້ນັ້ນ ຈໍາເປັນຕ້ອງໃຊ້ເງິນທຶນຈໍານວນຫລາຍ ຈົນນໍາໄປສູ່ແນວທາງຕ່າງໆໃນການເປີດລະດົມທຶນ.

ອ້າງອີງ:

https://www.reuters.com/…/brazils-government…/

https://www.reuters.com/…/brazil-looks-forward…/

https://www.ft.com/…/b0985574-3342-41ca-a27e-5db9d0459069