ປ່ອຍຕົວນັກໂທດກ່ອນກຳນົດໂດຍມີເງື່ອນໄຂ 11 ຄົນ ເຊິ່ງພວກກ່ຽວມີຄວາມຮູ້ສຶກກິນແໜງ ແຄງໃຈຕໍ່ການກະທຳຜິດຂອງຕົນ
ແຂວງຫລວງພະບາງ ປ່ອຍຕົວນັກໂທດກ່ອນກໍານົດໂດຍມີເງື່ອນໄຂ ໃນວັນທີ 12 ພຶດສະພາ 2023 ຜ່ານມາ, ໂດຍການເຂົ້າຮ່ວມຂອງ ທ່ານ ພັອ ທາ ລຽນປະດິດ ຮອງຫົວໜ້າກອງບັນຊາການ ປກສ ແຂວງ, ທ່ານ ພັທ ສຸຫວັດ ສິດທິປັນຍາ ຫົວໜ້າຄ້າຍຄຸມຂັງ-ດັດສ້າງ.
ນັກໂທດທີ່ໄດ້ຮັບການອະໄພຍະໂທດປ່ອຍຕົວກ່ອນກຳນົດໂດຍມີເງື່ອນໄຂ ໃນຄັ້ງນີ້ ມີ 11 ຄົນ ຍິງ 1 ຄົນ; ເຊິ່ງເປັນການປະຕິບັດຕາມນະໂຍບາຍຂອງພັກ-ລັດ ຕໍ່ບຸກຄົນທີ່ໄດ້ຫຼົງກະທຳຜິດ ມີຄວາມຮູ້ສຶກກິນແໜງແຄງໃຈ ຕໍ່ການກະທຳຜິດຂອງຕົນ, ເປັນນັກໂທດຜູ້ຫ້າວຫັນປະຕິບັດລະບຽບຄ້າຍຄຸມຂັງຢ່າງເຄັ່ງຂັດ ແລະ ຈິງໃຈໃຊ້ແທນຄ່າເສຍຫາຍ, ຄ່າປັບໃໝຕາມຄຳຕັດສິນຂອງສານ.
ທ່ານ ພັອ ທາ ລຽນປະດິດ ໄດ້ໂອ້ລົມຕໍ່ນັກໂທດດັ່ງກ່າວວ່າ: ພາຍຫຼັງໄດ້ຮັບການປ່ອຍຕົວອອກໄປແລ້ວ ຈົ່ງພ້ອມກັນກັບຄືນສູ່ຄອບຄົວ, ເລີ່ມຕົ້ນຊີວິດໃໝ່ທີ່ດີ, ທຳມາຫາກິນໃນອາຊີບທີ່ສຸດຈະລິດ, ບໍ່ຂັດກັບລະບຽບກົດໝາຍ ພ້ອມທັງປະກອບສ່ວນຢ່າງຕັ້ງໜ້າໃນການພັດທະນາຄອບຄົວ-ສັງຄົມ ແລະ ປະເທດຊາດ ໃຫ້ມີຄວາມສະຫງົບຮຸ່ງເຮືອງສີວິໄລ.
