ກໍ່ສ້າງໂຄງການປ້ອງກັນຕະຝັ່ງ ແລະ ພັດທະນາແຄມຂອງຢູ່ນະຄອນຫລວງວຽງຈັນ ໄລຍະທີ II ໃນຕົ້ນປີໜ້າ

ທ່ານ ພຸດທະເສນ ສິນທະວົງ, ຮອງຫົວໜ້າພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ໃຫ້ສໍາພາດວ່າ: ຕາມແຜນແລ້ວໂຄງການນີ້ ຈະເລີ່ມລົງມືກໍ່ສ້າງພາຍໃນປີ 2021 ແຕ່ເນື່ອງຈາກການລະບາດຂອງພະຍາດໂຄວິດ-19 ເຮັດໃຫ້ເປັນອຸປະສັກຫລາຍຢ່າງຕໍ່ການກໍ່ສ້າງ ຈິ່ງຈຳເປັນຕ້ອງເລື່ອນເວລາອອກໄປລົງມືໃນຕົ້ນປີ 2022 ໂດຍຈະມີການເຊັນສັນຍາກັບ ບໍລິ ສັດຮັບເໝົາກໍ່ສ້າງຈາກ ສ.ເກົາຫລີ ໃນອີກບໍ່ດົນນີ້. ໂຄງການດັ່ງກ່າວ ປະກອບມີ 4 ໜ້າວຽກສໍາຄັນ ຄື:

1). ຍົກລະດັບຄູປ້ອງກັນນໍ້າ ແລະ ກໍ່ ສ້າງລະບົບປ້ອງກັນຕະຝັ່ງແຕ່ຫລັກ 3 ຫາ ຫລັກ 4 ເມືອງສີສັດຕະນາກ ມີຄວາມຍາວປະ ມານ 0,97 ກິໂລແມັດ ແລະ ກໍ່ສ້າງລະບົບປ້ອງກັນຕະຝັ່ງບໍ່ໃຫ້ມີການເຊາະເຈື່ອນ ມີຄວາມຍາວທັງໝົດ 8,36 ກິໂລ ແມັດ ຈາກຫລັກ 4 ຫາ ບ້ານ ຫາດດອກແກ້ວ, ເມືອງ ຫາດຊາຍຟອງ.

2). ກໍ່ສ້າງສວນສາທາ ລະນະຢູ່ເຂດບ້ານແກ້ງຍາງ ໃຫ້ເຊື່ອມຈອດກັນໄດ້ລະຫວ່າງໂຄງການໄລຍະທີ I ແລະ ທີ II ຈົນຮອດບ້ານຫາດດອກແກ້ວ, ເມືອງຫາດຊາຍຟອງ ໃນເນື້ອທີ່ປະມານ 4 ເຮັກຕາ ເຊີ່ງປະກອບດ້ວຍ: ເສັ້ນທາງຍ່າງຊົມວີວ ແລະ ຊົມຕາ ເວັນຕົກດິນ, ສວນກິລາກາງ ແຈ້ງ ແລະ ຈຸດທ່ອງທ່ຽວທໍາມະຊາດທີ່ເຊື່ອມຈອດກັບຕົວເມືອງໄດ້.

3). ຍົກລະດັບເສັ້ນທາງຕາມຄູປ້ອງກັນນໍ້າຖ້ວມໃນໂຄງ ການໄລຍະທີ I ແຕ່ບ້ານອຸໂມງ ຫາ ບ້ານເກົ້າລ້ຽວ, ເມືອງສີໂຄດຕະບອງ, ມີຄວາມຍາວ 4,4 ກິໂລແມັດ ລຽບຕາມແຄມຂອງ ແລະ

4). ກໍ່ສ້າງເສັ້ນ ທາງຍ່າງຊົມທໍາມະຊາດ ແລະ ອອກກໍາລັງກາຍລຽບຕາມແຄບຂອງຈາກ ຫລັກ 3 ຫາ ຫລັກ 4 ເມືອງສີສັດຕະນາກ ມີຄວາມຍາວປະມານ 0,97 ກິໂລ ແມັດ ເພື່ອເຊື່ອມກັບໂຄງການໄລຍະທີ I.

ຮອງຫົວໜ້າພະແນກໂຍທາທິການ ແລະ ຂົນສົ່ງນະ ຄອນຫລວງວຽງຈັນ ຍັງໄດ້ຮຽກຮ້ອງໃຫ້ປະຊາຊົນທີ່ມີເນື້ອທີ່ດິນນອນຢູ່ເຂດໂຄງການປ້ອງກັນຕະຝັ່ງ ແລະ ພັດ ທະນາແຄມຂອງ ໄລຍະທີ II ບໍ່ໃຫ້ມີການໂອນກໍາມະສິດ ຫລື ຊື້-ຂາຍເນື້ອທີ່ດິນເທື່ອໃນຕອນນີ້ ເພາະຈະສ້າງຄວາມຫຍຸ້ງ ຍາກໃຫ້ແກ່ທາງໂຄງການໃນການຊົດເຊີຍຜົນເສຍຫາຍຕ່າງໆ, ພ້ອມນີ້ ໄດ້ຮຽກ ຮ້ອງໃຫ້ປະຊາຊົນຫລາຍຄອບຄົວທີ່ອາໃສຢູ່ຕາມເຂດຄູປ້ອງກັນນໍ້າຖ້ວມໃນໂຄງ ການໄລຍະທີ I ແຕ່ບ້ານອຸໂມງ ຫາ ບ້ານເກົ້າລ້ຽວ ທີ່ປະສົບກັບສະພາບນໍ້າຖ້ວມເປັນປະຈໍາຍ້ອນນໍ້າໄຫລບໍ່ທັນ ໃຫ້ອົດ ທົນຮ່ວມກັນ ແລະ ຕິດຕໍ່ຫາພະແນກ ຍທສ ນະຄອນ ຫລວງວຽງຈັນ ຖ້າຫາກມີນໍ້າຖ້ວມຢູ່ເຂດບ້ານຂອງຕົນເກີດຂຶ້ນ ເພື່ອນໍາເອົາຈັກດູດນໍ້າໄປດູດນໍ້າອອກຊ່ວຍ ເຊີ່ງເປັນການແກ້ ໄຂສະເພາະໜ້າຈົນກວ່າການກໍ່ສ້າງໂຄງການຈະສໍາເລັດ.

ໂຄງການປ້ອງກັນຕະຝັ່ງ ແລະ ພັດທະນາແຄມຂອງ ໄລຍະທີ II ເປັນໂຄງ ການບູລິມະສິດຂອງລັດຖະບານ ກໍຄື ນະຄອນຫລວງວຽງຈັນ ໃນການພັດ ທະນາພື້ນຖານໂຄງລ່າງ, ປ້ອງກັນຜົນຮ້າຍທີ່ອາດຈະເກີດຂຶ້ນຈາກໄພພິບັດທາງທໍຳມະຊາດ ແລະ ປົກປ້ອງດິນແດນຂອງຊາດທີ່ສູນເສຍຈາກການເຊາະເຈື່ອນ ລວມມູນຄ່າການກໍ່ສ້າງທັງໝົດ 67. 562.000 ໂດລາສະຫະລັດ, ໃນນີ້ ເປັນເງິນກູ້ຢືມດອກເບ້ຍຕໍ່າຈາກ ສ.ເກົາຫລີ 57.605.000 ໂດລາສະຫະ ລັດ ແລະ ທຶນສົມທົບຂອງລັດຖະບານລາວ 9.957.000 ໂດລາສະຫະລັດ ເຊີ່ງຈັດເຂົ້າແຜນງົບປະມານປະຈໍາປີຂອງນະຄອນຫລວງວຽງຈັນ ເພື່ອນໍາໃຊ້ໃນການປະຕິບັດວຽກຂອງໂຄງການ ແລະ ຊົດເຊີຍໃຫ້ແກ່ປະຊາ ຊົນທີ່ໄດ້ຮັບຜົນກະທົບ ໂດຍຈະກໍ່ສ້າງໃຫ້ສໍາເລັດພາຍໃນ 48 ເດືອນ ຫລື 4 ປີ.

ທີ່ມາ: Lao National Radio