ອີວານໂທນີ ດາວຍິງ ເບຣນຟອດ ຖືກແບນ ສະຖານໜັກ 8 ເດືອນ ໂທດຖານກ່ຽວຂ້ອງ ກັບການພະນັນ

ອີວານ ໂຕນີ ກອງໜ້າຂອງ ເບຣນຟອດ ຖືກສະຫະພັນບານເຕະອັງກິດ (FA) ປະກາດລົງໂທດຫ້າມຍຸ້ງກ່ຽວກັບວົງການບານເຕະ 8 ເດືອນ ໃນຂໍ້ຫາມີສ່ວນກ່ຽວຂ້ອງກັບການພະນັນ.

ຍ້ອນກັບໄປໃນເດືອນມີນາ ກອງໜ້າຊາວອັງກິດ ຍອມຮັບວ່າລາວເຄີຍຫລິ້ນການພະນັນໃນກິລາບານເຕະ ປະເພດການພະນັນທົ່ວໄປທັງໝົດ 232 ຄັ້ງ, ເຊິ່ງເປັນສິ່ງທີ່ຖືກສັ່ງຫ້າມສຳລັບນັກກິລາບານເຕະ ແລະ ຄູຝຶກສອນໃນບານເຕະອັງກິດ ແລະ FA ກໍ່ໄດ້ກ່າວຫາເພື່ອເອົາຜິດ.

ຈົນໃນທີ່ສຸດ ດາວຍິງໄວ 27 ປີ ທີ່ຍິງໄປ 20 ປະຕູຈາກ 33 ນັດໃນ ພຣີເມຍລີກ ລະດູການນີ້ ໄດ້ຮັບການລົງໂທດຄື ຫ້າມລົງສະໜາມ ຫລື ມີສ່ວນຮ່ວມໃນການແຂ່ງຂັນບານເຕະເປັນເວລາ 8 ເດືອນ ແລະ ປັບໃໝ 50,000 ປອນ.

ການຫ້າມດັ່ງກ່າວມີຜົນບັງຄັບໃຊ້ທັນທີເມື່ອມັນຖືກປະກາດຢ່າງເປັນທາງການໃນວັນທີ 17 ພຶດສະພາ, ເຖິງຢ່າງໃດ FA ໄດ້ອະນຸຍາດໃຫ້ລາວຝຶກຊ້ອມກັບສະໂມສອນອີກ 4 ເດືອນຈົນເຖິງວັນທີ 17 ກັນຍາ.