ທ່ານ ສີຈິ້ນຜິງ ສັ່ງໜ່ວຍກູ້ໄພຊ່ວຍຊີວິດປະຊາຊົນທຸກທາງ ຫລັງເກີດເຫດເຮືອປະມົງຂວ້ຳໃນມະຫາສະໝຸດອິນເດຍ ສູນຫາຍ 39 ຄົນ
ປະທານປະເທດ ສີຈິ້ນຜິງ ຂອງຈີນ ໄດ້ສັ່ງໃຫ້ເຈົ້າໜ້າທີ່ກູ້ໄພໃຊ້ທຸກວິທີເພື່ອຊ່ວຍເຫລືອປະຊາຊົນ ຫລັງຈາກເກີດເຫດເຮືອປະມົວງພິກຂວ້ຳໃນມະຫາສະໝຸດອິນເດຍເມື່ອເວລາປະມານ 03:00 ໂມງ ຂອງວັນທີ 16 ພຶດສະພາ ຕາມເວລາທ້ອງຖິ່ນ ຂະນະທີ່ມີກໍາມະກອນສູນຫາຍ 39 ຄົນ.
ສໍານັກຂ່າວ Xinhua ລາຍງານວ່າ: ເຮືອປະມົງລໍາດັ່ງກ່າວມີຊື່ວ່າ: ຫລູ່ເຜິງ ຢວນຢູ 028 (Lupeng Yuanyu 028) ມີກໍາມະກອນຊາວຈີນ 17 ຄົນ, ຊາວອິນໂດເນເຊຍ 17 ຄົນ ແລະ ຊາວຟີລິບປິນ 5 ຄົນ ໂດຍປັດຈຸບັນທ່ານ ສີຈິ້ນຜິງ ໄດ້ສັ່ງໃຫ້ທຸກໜ່ວຍງານທີ່ກ່ຽວຂ້ອງເພື່ອຍົກລະດັບການກູ້ໄພ ພ້ອມປະສານການຮ່ວມມືທາງທະເລນໍາປະເທດອື່ນໆ ໂດຍຕອນນີ້ທາງການຈີນໄດ້ຕິດຕໍ່ກັບສໍານັກງານທາງການທູດໃນອົດສະຕຣາລີ, ສີລັງກາ, ມາວດິບ, ອິນໂດເນເຊຍ ແລະ ຟີລິບປິນ ເພື່ອປະສານງານການຊ່ວຍເຫລືອດັ່ງກ່າວ.
ສ່ວນນາຍົກລັດຖະມົນຕີ ຫລີ່ສຽງ ໄດ້ສັ່ງໃຫ້ໜ່ວຍງານທີ່ກ່ຽວຂ້ອງພະຍາຍາມຫລຸດຄວາມສ່ຽງທີ່ຈະມີຜູ້ບາດເຈັບ ຫລື ເສຍຊີວິດໃຫ້ໄດ້ຫລາຍທີ່ສຸດ. ພ້ອມກ່າວວ່າ: ຈີນຄວນຍົກລະດັບການແກ້ໄຂຄວາມປອດໄພຂອງເຮືອປະມົງໃຫ້ເຂັ້ມງວດຂຶ້ນກວ່າເກົ່າ.
ເຖິງຢ່າງໃດກໍຕາມ, ປັດຈຸບັນຍັງບໍ່ຮູ້ສາເຫດທີ່ເຮັດໃຫ້ເຮືອພິກຂວໍ້າ ໂດຍປະເທດຕ່າງໆໄດ້ເຂົ້າມາຮ່ວມຊ່ວຍເຫລືອໃນປະຕິບັດການກູ້ໄພຄັ້ງນີ້. ສໍານັກງານຄົ້ນຫາ ແລະ ກູ້ໄພແຫ່ງຊາດຂອງອິນໂດເນເຊຍລະບຸວ່າ: ຈຸດເກີດເຫດຢູ່ຫ່າງຈາກອົດສະຕຣາລີໄປທາງຕາເວັນຕົກສຽງເໜືອປະມານ 4.600 ກິໂລແມັດ. ຂະນະທີ່ເຮືອຫລາຍລໍາ ແລະ ເຮືອບິນ P-8A Poseidon ຂອງກອງທັບອົດສະຕຣາລີກໍໄດ້ເຂົ້າມາຊ່ວຍຄົ້ນຫາໃນພື້ນທີ່ດັ່ງກ່າວ, ແຕ່ປັດຈຸບັນຍັງບໍ່ພົບຜູ້ລອດຊີວິດ.
ສູນບັນຊາການໜ່ວຍຍາມຝັ່ງຟີລິບປິນ ເປີດເຜີຍໃນວັນທີ 17 ພຶດສະພາວ່າ: ອົງການກໍາລັງເຝົ້າຕິດຕາມສະຖານະການ ແລະ ປະສານງານກັບສະຖານທູດຈີນໃນນະຄອນຫລວງມະນິລາ ຕະຫລອດຈົນທີມຄົ້ນຫາ ແລະ ໜ່ວຍກູ້ໄພທີ່ປະຕິບັດງານໃກ້ກັບຕໍາແໜ່ງທີ່ຮູ້ຫລ້າສຸດຂອງເຮືອ. ນອກຈາກນີ້ ຍັງມີເຮືອປະມົວງ ແລະ ເຮືອສິນຄ້າອື່ນໆທີ່ຢູ່ໃນບໍລິເວນໃກ້ຄຽງມາຮ່ວມຊ່ວຍກັນຄົ້ນຫາຜູ້ລອດຊີວິດ.
ອ້າງອີງ:
https://www.bloomberg.com/…/xi-orders-all-out-rescue-as…
https://apnews.com/…/china-indian-ocean-fishing-vessel…
https://www.reuters.com/…/chinese-fishing-boat…/
https://edition.cnn.com/…/chinese-fishing…/index.html
