ສະຖານະການຢູ່ຊູດັງຮ້າຍແຮງໜັກ ຜູ້ຍິງ ແລະ ເດັກຍິງຖືກທະຫານຂົ່ມຂືນ ຫລັງສົງຄາມກາງເມືອງຍືດເຍື້ອມາ 1 ເດືອນ
ລັດຖະບານຊູດັງອອກມາເປີດເຜີຍລາຍງານທີ່ໜ້າຕົກໃຈ ມີຜູ້ຍິງຫລາຍຄົນຖືກທະຫານຂົ່ມຂືນໃນນະຄອນຫລວງຄາທູມ ຫລັງຈາກສົງຄາມລະຫວ່າງສອງກຸ່ມທະຫານຊູດັງຍືດເຍື້ອມາເປັນເວລາກວ່າ 1 ເດືອນແລ້ວ.
ໜັງສືພິມ The Guardian ຂອງອັງກິດ ເປີດເຜີຍວ່າ: ມີຜູ້ຍິງ 4 ຄົນ ແລະ ເດັກຍິງອີກ 1 ຄົນທີ່ຖືກທະຫານຂົ່ມຂືນ ເຊິ່ງປັດຈຸບັນພວກເຂົາໄດ້ຮັບການຊ່ວຍເຫລືອຈາກໜ່ວຍຕໍ່ຕ້ານຄວາມຮຸນແຮງຕໍ່ແມ່ຍິງ ສັງກັດກະຊວງກິດຈະການສັງຄົມຂອງຊູດັງແລ້ວ.
ທ່ານ ນາງ ຊູລີມາ ອິຊາກ (Suliema Ishaq) ຜູ້ອໍານວຍການຂອງໜ່ວຍຕໍ່ຕ້ານຄວາມຮຸນແຮງຕໍ່ແມ່ຍິງ ລະບຸວ່າ: ນາງເຊື່ອວ່າຍັງມີເຫດຄວາມຮຸນແຮງທາງເພດອີກຫລາຍກໍລະນີທີ່ຜູ້ຍິງບໍ່ກ້າລາຍງານຕໍ່ທາງການ.
ນັບແຕ່ສົງຄາມເກີດຂຶ້ນໃນວັນທີ 15 ເມສາ ມີພົນລະເຮືອນ ແລະ ທະຫານຫລາຍກວ່າ 600 ຄົນທີ່ເສຍຊີວິດ. ຂະນະທີ່ຈໍານວນຜູ້ບາດເຈັບມີຫລາຍກວ່າ 5.000 ຄົນ ໂດຍສາເຫດຂໍ້ຂັດແຍ່ງຄັ້ງນີ້ເກີດຈາກການຍາດຊີງອໍານາດຂອງສອງຜູ້ນໍາທາງທະຫານທີ່ມີຄວາມເຫັນບໍ່ກົງກັນກ່ຽວກັບທິດທາງປະເທດກໍາລັງດໍາເນີນຢູ່ ໂດຍບັນຫາສໍາຄັນຄືແຜນການຄວບຮວມກອງກໍາລັງ RSF ເຂົ້າກັບກອງທັບ ທີ່ຍັງບໍ່ສາມາດຫາຂໍ້ສະຫລຸບໄດ້ວ່າໃຜຈະເປັນຜູ້ນໍາຄົນໃໝ່.
ປັດຈຸບັນມີໂຮງໝໍໃນນະຄອນຫລວງກາທູມພຽງ 16% ທີ່ຍັງສາມາດດໍາເນີນງານໄດ້ຢ່າງເຕັມປະສິດທິພາບ ໂດຍເຈົ້າໜ້າທີ່ສາທາລະນະສຸກລາຍງານວ່າ: ໂຮງໝໍບາງແຫ່ງຖືກກອງກໍາລັງ RSF ຍຶດຄອງ ເຊິ່ງປັດຈຸບັນກອງກໍາລັງ RSF ໄດ້ເຂົ້າຄວບຄຸມພື້ນທີ່ເກືອບ 90% ຂອງເມືອງຫລວງ.
ອ້າງອີງ:
https://www.theguardian.com/…/sudan-reports-of-women…
