ສີນຄ້າຄຸນນະພາບດີຈາກລາວໄດ້ຮັບຄວາມສົນໃຈໃນງານວາງສະແດງຈີນ-ອາຊຽນຄັ້ງທີ 14
ງານວາງສະແດງສິນຄ້າຈີນ-ອາຊຽນຄັ້ງທີ 14 ໄດ້ໄຂຂຶ້ນຢ່າງເປັນທາງການ ໃນວັນທີ 12 ກັນຍານີ້ຢູ່ທີ່ນະຄອນໜານໜິງແຂວງກວາງຊີ ສປຈີນ ພາຍໃຕ້ຫົວຂໍ້: “ຮ່ວມກັນສ້າງເສັ້ນທາງສາຍໄໝທາງທະເລແຫ່ງສະຕະວັດທີ 21 ສົ່ງເສີມການເຊື່ອມໂຍງເສດຖະກິດພາກພື້ນຜ່ານວຽກງານການທ່ອງທ່ຽວ” ໂດຍມີຜູ້ຜະລິດ, ຜູ້ປະກອບການຫລາຍກວ່າ 6.600 ກວ່າຮ້ານຈາກ 2.700 ຫົວໜ່ວຍ, ໃນນັ້ນຈາກປະເທດອາຊຽນ 1.700 ກວ່າຮ້ານ ແລະ ບັນດາປະເທດທີ່ມາຈາກນອກເຂດອາຊຽນ, ຊຶ່ງສິນຄ້າທີ່ນໍາມາວາງສະແດງປະກອບມີຜົນຜະລິດກະສິກຳ, ເຟີນີເຈີ, ເຄື່ອງຕົບແຕ່ງໃນເຮືອນ, ຫັດຖະກຳ, ອັນຍະມະນີ, ສິນຄ້າບໍ ລິໂພກ-ອຸປະໂພກ, ກົນຈັກ ແລະ ພາຫະນະ, ອາຫານ, ຜະລິດຕະພັນຫຸ້ມຫໍ່, ເຄື່ອງໄຟຟ້າ, ວັດສະດຸກໍ່ສ້າງ ແລະ ອື່ນໆ ແລະ ສຳລັບ ສປປ ລາວ ມີຫົວ ໜ່ວຍທຸລະກິດນໍາຜະລິດຕະພັນທີ່ມີຄຸນນະພາບປະເພດເຟີນີເຈີ, ແກະສະຫລັກໄມ້, ເຄື່ອງອັນຍະມະນີ, ເຄື່ອງຫັດຖະກຳແຜ່ນແພ, ກະສິກຳປຸງແຕ່ງ, ອາຫານ ແລະ ເຄື່ອງດື່ມ, ການບໍລິການ-ການທ່ອງທ່ຽວ ແລະ ສິນຄ້າໂອດ໊ອບຫລາຍກວ່າ 50 ບໍລິສັດເຂົ້າຮ່ວມວາງສະແດງ ແລະ ຈໍາໜ່າຍ, ພິເສດງານຄັ້ງນີ້, ສປປ ລາວ ໄດ້ເລືອກເອົາແຂວງໄຊຍະບູລີເປັນເມືອງແຫ່ງສະເໜ່ມານຳສະເໜີຕໍ່ຜູ້ທີ່ເຂົ້າຊົມງານ ເພື່ອດຶງດູດການຄ້າ, ການລົງທຶນ, ການທ່ອງທ່ຽວ ແລະ ເຜີຍແຜ່ວັດທະນະທຳອັນດີງາມຂອງຊາດລາວໃຫ້ສາກົນໄດ້ຮັບຮູ້ ແລະ ມາທ່ອງທ່ຽວ ສປປ ລາວ ຫລາຍຂຶ້ນ ແລະ ເຫັນວ່າໄດ້ຮັບຄວາມສົນໃຈສູງຈາກຜູ້ມາຮ່ວມງານດັ່ງກ່າວ.
ທ່ານຮອງນາຍົກລັດຖະມົນຕີແຫ່ງ ສປປ ລາວ ສອນໄຊ ສີພັນດອນ ໄດ້ມີຄໍາເຫັນໃນພິທີເປີດງານວາງສະແດງ ວ່າ: ສປປ ລາວ ໄດ້ເຂົ້າຮ່ວມງານວາງ ສະແດງສິນຄ້າຈີນ-ອາຊຽນ (CAEEXPO) ນັບແຕ່ປີ 2004 ເປັນຕົ້ນມາ, ອັນໄດ້ເຮັດໃຫ້ຜູ້ປະກອບການ, ນັກທຸລະກິດລາວມີໂອກາດເຂົ້າເຖິງຕະຫລາດສາກົນທີ່ກວ້າງຂວາງກວ່າເກົ່າ, ໂດຍສະເພາະໄດ້ນຳເອົາສິນຄ້າ ແລະ ຜະລິດຕະພັນທີ່ເປັນທ່າແຮງຂອງລາວເຂົ້າຮ່ວມວາງສະແດງ, ທັງເປັນການເພີ່ມມູນຄ່າການສົ່ງອອກຂອງ ສປປ ລາວໃນຕະຫລາດອາຊຽນ ແລະ ສປຈີນ ຫລາຍຂຶ້ນ.
