ລາວ-ໄທຫາລືການອະນຸຍາດນຳເຂົ້າແຮງງານຕ່າງດ້າວ
ເມື່ອບໍ່ດົນມານີ້, ກະຊວງແຮງງານ ແລະ ສະຫວັດດີການສັງຄົມລາວ ແລະ ໄທ, ໄດ້ຈັດກອງປະຊຸມລະດັບວິຊາການຂຶ້ນທີ່ປະເທດໄທ, ຊຶ່ງຝ່າຍລາວນຳໂດຍທ່ານນາງ ອານຸສອນ ຄຳສິງສະຫວັດ ຮັກສາການຫົວໜ້າກົມພັດທະນາສີມືແຮງງານ ແລະ ຈັດຫາງານ ແລະ ຝ່າຍໄທ ນຳໂດຍທ່ານ ວະຣານົນ ປິຕິວັນ ຫົວໜ້າກົມການຈັດຫາງານ ເພື່ອແຈ້ງໃຫ້ກັນຊາບກ່ຽວກັບບໍລິສັດທີ່ໄດ້ຮັບອະນຸຍາດໃຫ້ນຳເຂົ້າແຮງງານຕ່າງດ້າວເຂົ້າມາເຮັດວຽກໃນປະເທດໄທ, ຜົນການດຳເນີນງານຂອງສູນຮັບແຈ້ງການເຮັດວຽກຂອງຄົນຕ່າງດ້າວຕາມການປະກາດຂອງກະຊວງແຮງງານ ແລະ ດຳເນີນການກໍລະນີແຮງງານລາວທີ່ໄດ້ຮັບໜັງສືຢັ້ງຢືນຈາກກະຊວງແຮງງານ.
ທ່ານຫົວໜ້າກົມການຈັດຫາງານໄທ ກ່າວວ່າ: ຝ່າຍໄທມີຄວາມຍິນດີ ແລະ ຢືນຢັນເຈດຕະນາລົມທີ່ພ້ອມໃຫ້ການຮ່ວມມືດ້ານແຮງງານ, ເພື່ອໃຫ້ມີຄວາມກ້າວໜ້າ ແລະ ພັດທະນາຕໍ່ໄປໃນການຮ່ວມມືໃນທຸກດ້ານທີ່ກ່ຽວຂ້ອງກ່ຽວກັບ ການຈັດສົ່ງແຮງງານມາເຮັດວຽກໃນປະເທດໄທ, ການຈັດຕັ້ງສູນປັບສະຖານະພາບແຮງງານລາວ ທີ່ກຸງເທບມະຫານະຄອນ ລວມທັງການຮ່ວມມືດ້ານອື່ນໆ ທີ່ທັງສອງປະເທດເຫັນດີຮ່ວມກັນໃນອະນາຄົດ ເພື່ອໃຫ້ເກີດການຈ້າງງານທີ່ໂປ່ງໃສ, ເປັນທຳຫລຸດບັນຫາການຫລອກຫລວງ ແລະ ປົກປ້ອງແຮງງານທີ່ເຂົ້າມາເຮັດວຽກໂດຍບໍ່ຖືກຕ້ອງນັ້ນໃຫ້ໝົດໄປ.
