ບັງກະລາເດັດ-ມຽນມາ ເສຍຫາຍໜັກ ຈາກອິດທິພົນພາຍຸໂມຄາ

ເຖິງຢ່າງໃດກໍດີ, ພາຍຸອ່ອນກໍາລັງລົງຫລາຍ ຫລັງພັດຂຶ້ນຝັ່ງລະຫວ່າງບັງກະລາເດັດກັບມຽນມາ.

ວັນທີ 15 ພຶດສະພາ, ສໍານັກຂ່າວຕ່າງປະເທດລາຍງານວ່າ: ພາຍຫລັງພາຍຸໂມຄາ ທີ່ເລີ່ມຂຶ້ນຢູ່ອ່າວເບງກໍ ເຄື່ອນທີ່ດ້ວຍຄວາມໄວລົມ 195 ກິໂລແມັດຕໍ່ຊົ່ວໂມງ ພັດຂຶ້ນຝັ່ງລະຫວ່າງເມືອງຄ໊ອກ ບາຊາ ທາງຕາເວັນອອກສຽງໃຕ້ຂອງປະເທດ ກັບເມືອງຊິດຕະເວ ເມືອງເອກຂອງລັດຍະໄຂ່ ຢູ່ພາກຕາເວັນຕົກຂອງມຽນມາ ໃນວັນທີ 14 ພຶດສະພາຜ່ານມາ.

ຂະນະທີ່ສູນເຕືອນໄພພາຍຸຂອງອາເມລິກາ ລາຍງານວ່າ: ພາຍຸໂມຄາສະສົມຄວາມໄວລົມໃນໄລຍະໜຶ່ງໄດ້ໃນລະດັບສູງສຸດ 259 ກິໂລແມັດຕໍ່ຊົ່ວໂມງ ທຽບເທົ່າເຮີລິເຄນລະດັບ 5 ຕາມມາດຕາວັດແທກພາຍຸຊັບເຟີ-ຊິມສັນ ຈຶ່ງເພີ່ມຄວາມກັງວົນໃຫ້ທຸກຝ່າຍທີ່ກ່ຽວຂ້ອງ ວ່າອິດທິພົນຂອງພາຍຸໂມຄາອາດຮຸນແຮງຂຶ້ນກວ່າຕອນພາຍຸຊິດພັດຜ່ານບັງກະລາເດັດໃນເດືອນພຶດສະພາ 2007 ຂ້າຊີວິດປະຊາຊົນຫລາຍກວ່າ 3.000 ຄົນ.

ສໍານັກງານຂ້າຫລວງໃຫຍ່ຜູ້ລີ້ໄພແຫ່ງສະຫະປະຊາຊາດ (UNHCR) ລາຍງານວ່າ: ທີ່ພັກອາໄສຂອງຜູ້ລີ້ໄພຊາວໂຣຮິນຈາໃນຄ້າຍຜູ້ລີ້ໄພ ຢູ່ເມືອງຄ໊ອກ ບາຊາ ໄດ້ຮັບຄວາມເສຍຫາຍປະມານ 400-500 ແຫ່ງ. ທັງນີ້ ບັງກະລາເດັດອົບພະຍົບປະຊາຊົນໃນພື້ນທີ່ສ່ຽງລ່ວງໜ້າຫລາຍກວ່າ 750.000 ຄົນ ແລະ ຢືນຢັນວ່າ: ຮອດຕອນນີ້ຍັງບໍ່ເກີດຄວາມເສຍຫາຍເປັນວົງກວ້າງ.

ສ່ວນກາແດງມຽນມາອົບພະຍົບປະຊາຊົນຫລາຍກວ່າ 100.000 ຄົນ ອອກຈາກພື້ນທີ່ສ່ຽງເປັນເສັ້ນທາງຜ່ານຂອງພາຍຸ ແລະ ມີລາຍງານການເກີດຄວາມເສຍຫາຍໃນຫລາຍພື້ນທີ່. ຢ່າງໃດກໍດີ, ສໍານັກງານອຸຕຸນິຍົມວິທະຍາແຫ່ງຊາດຂອງອິນເດຍໃຫ້ຂໍ້ມູນເພີ່ມອີກວ່າ: ພາຍຸໂມຄາອ່ອນກໍາລັງລົງເມື່ອພັດຂຶ້ນຝັ່ງ ເນື່ອງຈາກປະທະກັບພູຜາຂອງມຽນມາ.