ເຈົ້າໜ້າທີ່ຮູ້ມືປືນກໍ່ເຫດຍິງຄົນເສຍຊີວິດ 2 ສົບຢູ່ບ້ານສາລາຄຳແລ້ວ
ເຈົ້າໜ້າທີ່ກົມຕຳຫລວດສືບສວນ-ສອບສວນໃຫ້ຮູ້ວ່າ: ພາຍຫລັງເກັບກຳຫລັກຖານຈາກສະຖານທີ່ເກີດເຫດ, ກວດກາກ້ອງວົງຈອນປິດ ແລະ ສອບຖາມພະຍານຫລັກຖານ ສາມາດຮູ້ໄດ້ມືປືນທີ່ເປັນຄົນຮ້າຍກໍ່ເຫດຍິງຄົນເສຍຊີວິດ 2 ສົບຢູ່ບ້ານສາລາຄຳເມືອງຫາດຊາຍຟອງນະຄອນຫລວງວຽງຈັນ ເມື່ອວັນທີ 1 ກັນຍາຜ່ານມານີ້, ຊຶ່ງປັດຈຸບັນກຳລັງເຈົ້າໜ້າທີ່ພວມເລັ່ງຕິດຕາມນຳຈັບຕົວມາດຳເນີນຄະດີໃຫ້ໄດ້ໂດຍໄວ ແລະ ຜ່ານຈາກການສືບສວນ-ສອບສວນຜູ້ເຫັນເຫດການ ໃຫ້ຮູ້ວ່າ: ຜູ້ກໍ່ເຫດແມ່ນຜູ້ຊາຍໃສ່ໝວກມົ້ງສີດຳປິດບັງໃບໜ້າ, ໃສ່ເສື້ອຍືດແຂນສັ້ນສີດຳ, ໃສ່ໂສ້ງຂາສັ້ນເຄິ່ງຫົກຖົງສີຂຽວຂີ້ມ້າ, ຊຶ່ງຈາກການເກັບຂໍ້ມູນຫລັກຖານພົບວ່າ: ຜູ້ກໍ່ເຫດຄາດຕະກຳແມ່ນເປັນມືປືນຮັບຈ້າງ ແລະ ຍັງລີ້ຊ້ອນຕົວຢູ່ໃນເຂດນະຄອນຫລວງວຽງຈັນ, ຊຶ່ງເຈົ້າໜ້າທີ່ກຳລັງເລັ່ງຕິດຕາມຕົວມາດຳເນີນຄະດີ ແລະ ເນັ້ນປະເດັນວ່າ: ອາດເກີດຍ້ອນບັນຫາຂັດແຍ່ງດ້ານທຸລະກິດ.
ຂ່າວຍັງໃຫ້ຮູ້ຕື່ມວ່າ: ໃນວັນທີ 11 ກັນຍາຜ່ານມານີ້, ໄດ້ເກີດເຫດໄວລຸ້ນໃຊ້ອາວຸດປືນຍິງກັນຢູ່ເຂດບ້ານດົງນາໂຊກເມືອງສີໂຄດຕະບອງນະຄອນຫລວງວຽງ ຈັນ, ຜູ້ກໍ່ເຫດແມ່ນທ້າວ ໂຕ ອາຍຸ 23 ປີອາຊີບກຳມະກອນຢູ່ບ້ານໜອງປາໄນ ເມືອງສີໂຄດຕະບອງ, ໂດຍໄດ້ໃຊ້ປືນສັ້ນດັດແປງຍິງໃສ່ຂາຂວາຂອງທ້າວໝາຍ ອາຍຸ 20 ປີຢູ່ບ້ານໂພນສະຫວາດໃຕ້ເມືອງສີໂຄດຕະບອງ ນະຄອນຫລວງວຽງຈັນໄດ້ຮັບບາດເຈັບ, ໂດຍສາເຫດແມ່ນຍ້ອນຄວາມຫຶງຫວງບັນຫາຊູ້ສາວ.
