ເມືອງມຸນລະປາໂມກ ທຳລາຍສິນຄ້າໝົດອາຍຸການໃຊ້ງານ 66 ລາຍການ ເພື່ອເຮັດຜູ້ບໍລິໂພກໄດ້ຮັບອາຫານທີ່ປອດໄພຕໍ່ສຸຂະພາບ
ຫ້ອງການສາທາລະນະສຸກເມືອງມຸນລະປາໂມກ ແຂວງຈຳປາສັກ ທຳລາຍສິນຄ້າໝົດອາຍຸ ເສຍຄຸນນະພາບ ໃນວັນທີ 10 ພຶດສະພາ 2023 ຜ່ານມາ, ເປັນກຽດເຂົ້າຮ່ວມຂອງທ່ານ ສີສະຫວັດ ພົມມະລິວັນ ຮອງເຈົ້າເມືອງ (ຜູ້ຊີ້ນຳວຽກງານວັດທະນະທຳ-ສັງຄົມ), ມີທ່ານ ບົວບາຍ ເພັດອຸໄທ ຫົວໜ້າຫ້ອງການສາທາລະນະສຸກເມືອງ.
ການຈັດພິທີຄັ້ງນີ້, ເພື່ອເຮັດໃຫ້ຜູ້ປະກອບການຮ້ານຂາຍເຄື່ອງສຳເລັດຮູບໄດ້ເຄື່ອນໄຫວຖືກຕ້ອງຕາມກົດໝາຍທີ່ໄດ້ກຳນົດໄວ້, ເພື່ອເຮັດໃຫ້ຜູ້ຊົມໃຊ້ກໍຄືປະຊາຊົນບັນດາເຜົ່າໄດ້ຮັບອາຫານທີ່ປອດໄພຕໍ່ສຸຂະພາບແນໃສ່ເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ ຖືກຕ້ອງສອດຄ່ອງຕາມແນວທາງຂອງພັກ.
ທ່ານນາງ ສີຜາ ຈູມມະລີ ຮອງຫົວໜ້າໜ່ວຍງານອາຫານ ແລະ ຢາ ໃຫ້ຮູ້ວ່າ: ໃນກາງເດືອນມີນາຜ່ານມາ, ໜ່ວຍງານອາຫານ ແລະ ຢາ ຫ້ອງການສາທາລະນະສຸກເມືອງ ພ້ອມດ້ວຍພາກສ່ວນກ່ຽວຂ້ອງ ໄດ້ລົງເຄື່ອນໄຫວກວດກາສິນຄ້າຕົວຈິງຢູ່ຕາມຫ້າງຮ້ານໃນທົ່ວເມືອງທັງໝົດ 135 ຮ້ານ, ພົບອາຫານໝົດອາຍຸເສຍຄຸນ 46 ຮ້ານ, 51 ລາຍການ, ພົບເຄື່ອງສຳອາງເສຍຄຸນ, ໝົດອາຍຸ 21 ຮ້ານ, 15 ລາຍການ, ສິນຄ້າຈຳນວນດັ່ງກ່າວນີ້, ທາງໜ່ວຍງານໄດ້ເຮັດບົດບັນທຶກໄວ້ພ້ອມທັງນຳເອົາສິນຄ້າໝົດອາຍຸ, ເສຍຄຸນມາທຳລາຍ
