WHO ປະກາດຢຸດຕິສະຖານະການສຸກເສີນດ້ານສາທາລະນະສຸກຂອງພະຍາດໝາກສຸກລີງ ເນື່ອງຈາກການແພ່ລະບາດຫລຸດລົງ

ວັນທີ 11 ພຶດສະພາ 2023 ຜ່ານມາ, ທ່ານ ທີໂດຣສ ອັດຮານອມ ກີບຮີເຢຊຸດ ຜູ້ອໍານວຍການອົງການອະນາໄມໂລກ ຫຼື WHO ໄດ້ອອກມາປະກາດວ່າ ພະຍາດໝາກສຸກລີງ ຈະບໍ່ແມ່ນສະຖານະການສຸກເສີນດ້ານສາທາລະນາສຸກ ລະຫວ່າງປະເທດອີກຕໍ່ໄປ ຫລັງຈາກຄະນະກໍາມະການຜູ້ຊ່ຽວຊານໄດ້ສະຫລຸບໃຫ້ເຫັນວ່າ ຜູ້ຕິດເຊື້ອພະຍາດໝາກສຸກລີງ ຈາກທົ່ວໂລກໄດ້ມີຈໍານວນຫລຸດລົງເຖິງ 90% ໃນຊ່ວງ 3 ເດືອນທີ່ຜ່ານມາ. ດັ່ງນັ້ນພະຍາດ ໝາກສຸກລີງນີ້ຈຶ່ງບໍ່ໄດ້ຢູ່ໃນຊ່ວງສະຖານະການທີ່ໜ້າກັງວົນ ອີກຕໍ່ໄປໃນປັດຈຸບັນ ເຖິງແມ່ນວ່າເຊື້ອໄວຣັດຊະນີດນີ້ຍັງຄົງມີການແພ່ລະບາດຢູ່ ແລະ ອາດມີການລະບາດຮອບໃໝ່ໄດ້ກໍຕາມ ແຕ່ກໍຖືວ່າໄດ້ຜ່ານພົ້ນຊ່ວງເຕືອນໄພລະດັບສູງແລ້ວໃນຕອນນີ້.

ການປະກາດຍົກເລີກສະຖານະການສຸກເສີນຂອງພະຍາດໝາກສຸກລີງ ນີ້ເກີດຂຶ້ນ ຫລັງຈາກມີການປະກາດຍົກເລີກສະຖານະການສຸກເສີນຂອງພະຍາດ ໂຄວິດ-19 ພຽງໜຶ່ງອາທິດເທົ່ານັ້ນ, ເຊິ່ງປັດຈຸບັນນີ້ຍັງຄົງເຫຼືອພຽງແຕ່ພຽງ ພະຍາດໂປລີໂອເທົ່ານັ້ນທີ່ ອົງການອະນາໄມໂລກຍັງຄົງຍົກໃຫ້ເປັນສະຖານະການສຸກເສີນດ້ານສາທາລະນະສຸກ ລະຫວ່າງປະເທດ.