ແມນຢູ ລ໊ອກເປົ້າກຽມ ດຶງ ພິກຟອດ ຢືນມື 1 ແທນ ເດເຄອາ ລະດູການໜ້າ
ເອຣິກ ເທນ ຮາກ ຜູ້ຈັດການທີມ ແມນເຊສເຕີ ຢູໄນເຕັດ ສະໂມສອນດັງແຫ່ງພຣີເມຍ ລີກ ຍັງຄົງຊອກຫາຜູ້ຮກສາປະຕູຄົນໃຫມ່ຢ່າງຕໍ່ເນື່ອງ ແລະ ຫລ້າສຸດພວມໃຫ້ຄວາມສົນໃຈທີ່ຈະຄວ້າ ຈໍແດນ ພິກຟອດ ຜູ້ຮັກສາປະຕູທີມຊາດອັງກິດ ຂອງ ເອຟເວີຕັນ ໄປເຝົ້າເສົາຫລັງຈົບລະດູການນີ້.
ລາຍງານຂ່າວລະບຸວ່າ ເທນ ຮາກ ຢາກໄດ້ ຜູ້ຮັກສາປະຕູຄົນໃຫມ່ເຂົ້າມາຮ່ວມທີມເພື່ອກົດດັນຕຳແໜ່ງ ຂອງ ດາບິດ ເດ ເຄອາ ມືກາວຊາວສະເປນທີ່ກໍ່ຄວາມຜິດພາດຢູ່ຕໍ່ເນື່ອງ ໂດຍເບິ່ງວ່າ ພິກຟອດ ມີຄຸນສົມບັດຄົບຖ້ວນທີ່ຈະເຂົ້າມາທ້າທາຍຕຳແໜ່ງມື 1 ຂອງ ແມນຢູ.
ໃນລະດູການນີ້ ເຖິງວ່າ ເອເວີຕັນ ຈະຕ້ອງດິ້ນຮົນໜີຕົກຊັ້ນຢ່າງຫນັກ ແຕ່ຜົນງານສ່ວນຕົວຂອງ ພິກຟອດ ໜ້າປະທັບໃຈຢ່າງຫລາຍ ຫລັງຈາກຊ່ວຍທີມປ້ອງກັນປະຕູໃນຈັງຫວະສຳຄັນຫລາຍຄັ້ງ ແລະ ສາມາດເກັບໄດ້ເຖິງ 7 ຄລິນຊິດ.
ຂະນະດຽວກັນ ພິກຟອດ ຍັງຍຶດຕຳແໜ່ງຜູ້ຮັກສາປະຕູມື 1 ຂອງທີມຊາດອັງກິດມາຢ່າງຍາວນານ ໂດຍລົງເຝົ້າເສົາໃຫ້ທີມຊາດອັງກິດໄປແລ້ວເຖິງ 52 ເກມ ເຊິ່ງປະສົບການຂອງນັກເຕະອາຍຸ 29 ປີມີຫລາຍພຽງພໍທີ່ຈະຫລິ້ນໃນເວທີໃຫຍ່ໃຫ້ກັບ ແມນເຊສເຕີ ຢູໄນເຕັດ ໄດ້ແບບສະບາຍ.
ແນວໃດກໍຕາມ ພິກຟອດ ຍັງມີສັນຍາກັບ ເອຟເວີຕັນ ຈົນເຖິງປີ 2027 ແລະ ຖືກຕັ້ງຄ່າຕົວໄວ້ສູງເຖິງ 40 ລ້ານປອນ.
