ກຽມພ້ອມຮັບມືກັບພະຍາດທີ່ອາດຈະເກີດຂຶ້ນ ຍ້ອນການປ່ຽນແປງຂອງດິນຟ້າອາກາດ

ສປປ ລາວ ເປັນໜຶ່ງໃນບັນດາປະເທດທີ່ຕັ້ງຢູ່ໃນເຂດອາກາດຮ້ອນຊຸ່ມ ແຕ່ລະປີສະພາບດິນຟ້າອາກາດມີການປ່ຽນແປງຮ້ອນກໍຮ້ອນຫລາຍ, ຍາມໜາວກໍໜາວຫລາຍທັງແກ່ຍາວຜິດປົກກະຕິນຳອີກ. ຍ້ອນແນວນັ້ນຈຶ່ງເຮັດໃຫ້ສະພາບອາກາດຢູ່ຫລາຍທ້ອງຖິ່ນຂອງປະເທດປີນີ້ຄືຈັ່ງວ່າຮ້ອນອົບເອົ້າຫລາຍເມື່ອທຽບໃສ່ຫລາຍປີຜ່ານມາ ເຮັດໃຫ້ມີຄວາມສ່ຽງເກີດພະຍາດຫລາຍຢ່າງ ຕາມມາຄື: ພະຍາດທາງເດີນອາຫານຍ້ອນຄົນເຮົາດື່ມນ້ຳຫລາຍຂຶ້ນໂດຍສະເພາະການດື່ມນ້ຳເຢັນ, ອາຫານກໍບູດເນົ່າໄວ ແມງວັນຫລາຍຂຶ້ນ ຖ້າດື່ມ ຫລື ກິນອາຫານບໍ່ສະອາດຈະເຮັດໃຫ້ເກີດພະຍາດຖອກທ້ອງ.

ຍິ່ງໄລຍະນີ້ຢູ່ຫລາຍແຂວງຫລາຍທ້ອງຖິ່ນເລີ່ມມີຝົນຕົກລົງມາແດ່ແລ້ວ ພະຍາດທີ່ອາດຈະເກີດຂຶ້ນ ແລະ ລະບາດໄດ້ແມ່ນພະຍາດໄຂ້ເລືອດອອກ ຫລືໄຂ້ຍຸງລາຍ ຍ້ອນວ່າແຕ່ລະປີພາຍຫລັງມີຝົນຕົກລົງມາກໍມັກຈະມີລາຍງານກໍລະນີການເພີ່ມຂຶ້ນຂອງຜູ້ຕິດເຊື້ອພະຍາດໄຂ້ເລືອດອອກ, ເຊິ່ງມາຮອດປັດຈຸບັນແຕ່ລະແຂວງເລີ່ມມີລາຍງານກໍລະນີຜູ້ຕິດເຊື້ອແລ້ວ ເນື່ອງຈາກວ່າຝົນຕົກລົງມາມັກມີນ້ຳຄ້າງນ້ຳຂັງ ກາຍເປັນບ່ອນແພ່ພັນຂອງໜອນນ້ຳຍຸງລາຍຫລາຍຂຶ້ນຊຶ່ງແຕ່ລະປີ ທົ່ວປະເທດມີລາຍງານຈຳນວນຜູ້ຕິດເຊື້ອພະຍາດໄຂ້ເລືອດອອກຢ່າງຫລວງຫລາຍ ແລະ ມີບາງກໍລະນີເຮັດໃຫ້ມີຄົນເສຍຊີວິດຍ້ອນ. ນອກນີ້ແມ່ນພະຍາດທາງລະບົບຫາຍໃຈເນື່ອງຈາກການສູບດົມເອົາລະອອງຝຸ່ນ PM2.5 ຈາກການຈູດປ່າທຳການຜະລິດ ລວມເຖິງເລື່ອງອາລົມນຳອີກ.

ໃນສະພາບອາກາດຄືປັດຈຸບັນນີ້ທຸກຄົນຕ້ອງປະຕິບັດຕາມຫລັກການອະນາໄມສາມສະອາດໃຫ້ໄດ້ດີ ດື່ມນ້ຳທີ່ສະອາດ, ກິນອາຫານທີ່ປຸງແຕ່ງໃໝ່ ຫລື ອາຫານຍັງອຸ່ນໆ, ຫລີກລ່ຽງການກິນອາຫານທີ່ເກັບຮັກສາເປັນເວລາດົນ, ຕ້ອງອະນາໄມຂອບເຂດເຮືອນຊານບ້ານຊ່ອງໃຫ້ສະອາດບໍ່ໃຫ້ມີນ້ຳຄ້າງນ້ຳຂັງເພື່ອບໍ່ໃຫ້ເປັນບ່ອນເພາະພັນຂອງຍຸງລາຍ, ໃສ່ຜ້າອັດປາກ-ດັງເວລາອອກເຮືອນໄປປະຕິບັດວຽກງານເພື່ອປ້ອງກັນຝຸ່ນລະອອງ PM2.5 ແລະ ພະຍາດອື່ນໆອີກ.ສຳຄັນແມ່ນການຕອບໂຕ້ພະຍາດໄຂ້ຍຸງລາຍ ດ້ວຍການເປີດຂະບວນການເຮັດອະນາໄມທຳລາຍໜອນນ້ຳຍຸງລາຍໃນແຕ່ລະຄອບຄົວແຕ່ລະບ້ານ, ເຮັດວຽກງານໂຄສະນາສຸຂະສຶກສາຢ່າງກວ້າງຂວາງ ຄຽງຄູ່ກັນນີ້ຕ້ອງປະຕິບັດຄຳຂວັນ 5ປ ທີ່ກະຊວງສາທາລະນະສຸກວາງອອກໃຫ້ເຂັ້ມງວດ.