ຄະນະຮັບຜິດຊອບໂຄງລ່າງພື້ນຖານເພື່ອສົ່ງເສີມການທ່ອງທ່ຽວ ເມືອງວັງວຽງຕິດຕາມຊຸກຍູ້ ແລະ ກວດກາວຽກກໍ່ສ້າງໂຄງລ່າງພື້ນຖານ

ວັນທີ 9 ພຶດສະພາ 2023, ຢູ່ທີ່ເມືອງວັງວຽງ ແຂວງວຽງຈັນ ຄະນະຮັບຜິດຊອບໂຄງລ່າງພື້ນຖານເພື່ອສົ່ງເສີມການທ່ອງທ່ຽວໄລຍະ 2, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບຄະນະຮັບຜິດຊອບໂຄງການ, ນຳໂດຍທ່ານ ອຸ່ນທວງ ຂາວພັນ ຮອງລັດຖະມົນຕິກະຊວງ ຖວທ, ມີບັນດາທ່ານຫົວໜ້າກົມກ່ຽວຂ້ອງ ແລະ ຄະນະຮັບຜິດຊອບໂຄງການຂັ້ນເມືອງເຂົ້າຮ່ວມ.

ໂອກາດນີ້, ທ່ານ ຮອງລັດຖະມົນຕີກະຊວງ ຖວທ ພ້ອມດ້ວຍຄະນະຮັບຜິດຊອບໄດ້ລົງກວດກາວຽກຢູ່ພາກສະໜາມເສັ້ນທາງວົງແຫວນເບື້ອງຕາເວັນຕົກຂອງສາຍນ້ຳຊອງ, ຂົວຂ້າມນໍ້າຊອງ ແລະ ທາງເປຕົງເຂົ້າເຖິງສະຖານທີ່ທ່ອງທ່ຽວນໍ້າຕົກຕາດແກ້ງຍຸຍ ແລະ ໃນຕອນແລງຂອງວັນດຽວກັນບັນດາຄະນະຮັບຜິດຊອບໂຄງການພັດທະນາໂຄງລ່າງພື້ນຖານໄດ້ເຂົ້າຮ່ວມຮັບຟັງການລາຍງານຄວາມຄືບໜ້າ ຂອງໂຄງການຈາກຜູ້ຮັບເໝົາກໍ່ສ້າງຮ່ວມກັບ ຊ່ຽວຊານ ແລະ ວິຊາການປະຈຳສະໜາມ ຢູ່ທີ່ຫ້ອງປະຊຸມຊັ້ນ3ຂອງຫ້ອງວ່າການປົກຄອງເມືອງ ໂດຍຫຍໍ້ວ່າ: w03 ໂຄງການກໍ່ສ້າງເສັ້ນທາງເຂົ້ານໍ້າຕົກຕາດແກ້ງຍຸ້ຍ, ຂົວຂ້າມນໍ້າຊອງ ແລະ ເສັ້ນທາງວົງແຫວນຊົນນະບົດເບື້ອງຕາເວັນຕົກຂອງສາຍນໍ້າຊອງ ເມືອງວັງວຽງ, ນັບແຕ່ມື້ລົງມືກໍ່ສ້າງມາຮອດມາຮອດທ້າຍເດືອນ ເມສາ 2023 ປະຕິບັດໄດ້ສໍາເລັດ ທັງໝົດ 49.07% ທຽບກັບແຜນການດັດແກ້ 84.92% (ຊັກຊ້າ 35.85%). ຄວາມຄືບໜ້າຕົວຈິງທີ່ ປະຕິບັດໄດ້ໃນເດືອນ ເມສາ 2023 ແມ່ນ 3.10% ທຽບກັບແຜນການເດືອນ 9.11% ເຊິ່ງໃນນັ້ນລວມມີວຽກບໍລິຫານພັນທະຂອງສັນຍາກໍ່ສ້າງ ແລະ ວຽກສັນຍາຍ່ອຍV2-ວຽກກໍ່ສ້າງທາງຊອຍເຂົ້າຫານ້ຳຕົກຕາດແກງຍຸ້ຍສຳເລັດ 55.69% ວຽກສັນຍາຍອ່ຍ V3-ວຽກກໍ່ສ້າງທາງຊອຍວົງແຫວນເບື້ອງ ຕາເວັນຕົກເມືອງວັງວຽງ ສຳເລັດ 45.56%.

ຈາກນັ້ນ, ໃນກອງປະຊຸມຍັງໄດ້ຮັບຟັງການປະກອບຄຳຄິດຄຳເຫັນຂອງຄະນະກຳມະການເປັນຕົ້ນແມ່ນຂໍ້ສະດວກ, ຂໍ້ຫຍຸ້ງຍາກ ຕື່ມອີກ. ຕອນທ້າຍພິທີທ່ານຮອງລັດຖະມົນຕີກະຊວງ ຖວທ ຍັງໄດ້ຮຽກຮ້ອງໃຫ້ທາງບໍລິສັດຮີບຮ້ອນເລັ່ງມື້ສືບຕໍ່ເພີ່ມແຮງງານເຂົ້າແຕ່ລະແຕ່ລະໜ້າວຽກໃຫ້ມີຄວາມສຳເລັດ ແລະ ໄດ້ມາດຕະຖານຕາມທີກຳນົດ.