ອົງການອະນາໄມໂລກຢຸດສະຖານະການສຸກເສີນ ການລະບາດຂອງພະຍາດໝາກສຸກລີງ

ອົງການອະນາໄມໂລກຢຸດການໃຊ້ຄໍາສັ່ງ “ສະຖານະການສຸກເສີນດ້ານສາທາລະນະສຸກສາກົນ” ຕໍ່ການແພ່ລະບາດຂອງພະຍາດໝາກສຸກລີງ.

ວັນທີ 12 ພຶດສະພາ, ສໍານັກຂ່າວຕ່າງປະເທດລາຍງານວ່າ: ທ່ານ ເທດຣອສ ແອດຮານອມ ເກເບຣເຢຊຸສ ຜູ້ອໍານວຍການອົງການອະນາໄມໂລກ (WHO) ຖະແຫລງໃນວັນທີ 11 ພຶດສະພາຜ່ານມາ ຢຸດການປະກາດໃຊ້ຄໍາສັ່ງ “ສະຖານະການສຸກເສີນດ້ານສາທາລະນະສຸກສາກົນ” ຕໍ່ພະຍາດໝາກສຸກລີງ ຫລັງມີມະຕິດັ່ງກ່າວໃນທ້າຍເດືອນກໍລະກົດປີຜ່ານມາ.

ທັງນີ້, ໃນໄລຍະການແພ່ລະບາດໃຫຍ່ຂອງພະຍາດໝາກສຸກລີງ, WHO ຢືນຢັນຜູ້ຕິດເຊື້ອສະສົມທົ່ວໂລກຫລາຍກວ່າ 87.000 ຄົນ ແລະ ເສຍຊີວິດສະສົມຢ່າງໜ້ອຍ 140 ຄົນ ໃນ 111 ປະເທດ ພົບຫລາຍທີ່ສຸດໃນອາເມລິກາ, ເບຣຊິນ, ແອັສປາຍ, ຝຣັ່ງ, ໂກລອມບີ, ເມັກຊິກ, ເປຣູ ແລະ ອັງກິດ.

ສໍາລັບການປະກາດຢຸດສະຖານະການສຸກເສີນຂອງພະຍາດໝາກສຸກລີງໂດຍ WHO ເກີດຂຶ້ນປະມານ 1 ອາທິດ ຫລັງການປະກາດຢຸດໃຊ້ຄໍາສັ່ງສະຖານະການດ້ານສາທາລະນະສຸກສາກົນ ຕໍ່ການແພ່ລະບາດຂອງພະຍາດໂຄວິດ-19 ເຊິ່ງປະກາດຢ່າງເປັນທາງການໃນວັນທີ 30 ມັງກອນ 2019.

ສະຖິຕິຜູ້ເສຍຊີວິດຢ່າງເປັນທາງການທົ່ວໂລກຈາກພະຍາດໂຄວິດ-19 ໃນໄລຍະການແພ່ລະບາດກວ່າ 3 ປີຜ່ານມາ ມີເກືອບ 7 ລ້ານຄົນ ຕາມລາຍງານທີ່ແຕ່ລະປະເທດສົ່ງເຂົ້າຫາ WHO, ແຕ່ໃນຄວາມເປັນຈິງ ໂຄວິດ-19 ອາດເປັນພະຍາດທີ່ຂ້າຊີວິດປະຊາກອນໂລກ “ໄປແລ້ວບໍ່ຕໍ່າກວ່າ 20 ລ້ານຄົນ”, ຍິ່ງໄປກວ່ານັ້ນ ເຊື້ອໄວຣັສຍັງຢູ່ ຍັງຂ້າຊີວິດປະຊາຊົນ ແລະ ກາຍພັນຕະຫລອດເວລາ.