ກູ້ເງິນອອນລາຍງ່າຍ ບໍ່ມີຈິງ ລະວັງມິດສາຊີບລໍ້ລວງເອົາຂໍ້ມູນສ່ວນຕົວ
ໃນໄລຍະຜ່ານມາປາກົດເຫັນຫລາຍຄົນໄດ້ຮັບຄວາມເດືອດຮ້ອນຍ້ອນຫລົງເຊື່ອກຸ່ມມິດສາຊີບທີ່ຕັ້ງເພຈໃຫ້ເຊົ່າສິນເຊື່ອ ດ້ວຍການປ່ອຍເງິນກູ້ ຜ່ານອອນລາຍ ດ້ວຍແຄັບຊັນຊວນເຊື່ອວ່າ “ກູ້ງ່າຍ ສະດວກ ວ່ອງໄວ ບໍ່ຫຍຸ້ງຍາກເອກະສານ ແລະ ການມັດຈຳ” ມີຄົນຕົກເປັນເຫຍື່ອຂອງພວກເຂົາໂດຍບໍ່ຮູ້ໂຕແລ້ວຈຳນວນຫລາຍ.
ກໍລະນີຫລ້າສຸດທີ່ເກີດຂຶ້ນ ຫວ່າງທ້າຍເດືອນ ເມສາ 2023 ຜ່ານມາ ໂດຍຜູ້ໃຊ້ເຟສບຸກ Daaylio Paseutkoun ໄດ້ໃຫ້ຂໍ້ມູນກັບທີມຂ່າວໜັງສືພິມລາວພັດທະນາວ່າ: ມີມື້ໜຶ່ງໄດ້ເລື່ອນໄປເຫັນ Page ໜຶ່ງທີ່ຂຽນວ່າ “ສະຖານບັນການເງິນ ປ່ອຍແບບບໍ່ມີຫລັກຊັບ” ເລີຍໄດ້ລອງໄປແຊດຖາມຂໍ້ມູນການກູ້ຢືມເງິນ ແຕ່ເຫັນວ່າລົມງ່າຍຜິດປົກກະຕິ ເອກະສານບໍ່ຫຍຸ້ງຍາກ ອະນຸມັດໄວ ແຕ່ທີ່ພວກເຂົາຫວັງຈະໃຫ້ເຮົາໂອນເງິນຄ່າເອກະສານກ່ອນອະນຸມັດເງິນໃຫ້ ເຊິ່ງຕົົົນເອງໄດ້ສົ່ງຮູບໄປໃຫ້ພວກເຂົາ ລວມທັງຮູບບັດປະຈໍາຕົວ ແຕ່ຍັງບໍ່ໄດ້ສົ່ງເລກບັນຊີທະນາຄານໄປໃຫ້. ແຕ່ຄຶດສະເດືອກໃຈວ່າ ທຸກຢ່າງຄືງ່າຍໄປໝົດ ແລະ ມີຄ່າມັດຈຳພຽງສາມແສນກີບ ກໍເລີຍບໍ່ເຊື່ອ ແຕ່ທີ່ໂຊກຮ້າຍທີ່ສຸດກໍຄື ໄດ້ສົ່ງເອກະສານເປັນຂໍ້ມູນສ່ວນຕົວໃຫ້ເຂົາ ແລ້ວເພຈດັ່ງກ່າວນຳເອົາໄປໄປຕົວະເອົາເງິນຄ່າມັດຈໍາເອກະສານຄົນອື່ນ ໂດຍໃຊ້ຮູບຕົນເອງຢັ້ງຢືນຕົວຕົນແທນ ເຮັດໃຫ້ຜູ້ເສຍຫາຍອື່ນໆ ນຳເອົາພາບບັດປະຈຳຕົວ ໂພສປະຈານຜ່ານເຟສ ພ້ອມໂທມາດ່າ ແລະ ຂູ່ຕ່າງໆນານາ ຈົນໄດ້ມີການແຈ້ງຄວາມກັນເກີດຂຶ້ນ.
ທີມຂ່າວໜັງສືພິມລາວພັດທະນາ ໄດ້ທຳການສຶກສາກົນໄກວິທີການຂອງພວກເຂົາສາມາດສະຫລຸບໄດ້ເປັນຂໍ້ໆຄືດັ່ງນີ້:
- ພວກເຂົາຈະຕັ້ງເພຈຂຶ້ນມາ ແລ້ວກໍບູດໂຄສະນາເພື່ອໃຫ້ຄົນເຫັນຈຳນວນຫລາຍ
- ພວກເຂົາຕັ້ງເຟສບຸກປອມຂຶ້ນມາຈຳນວນຫລາຍ ແລ້ວກໍໄປສະແດງຄວາມຄິດເຫັນເພື່ອເປັນການຣີວິວ ໃຫ້ຄົນເຊື່ອໝັ້ນ
- ຂໍ້ຄວາມທີ່ພວກເຂົາແຊັດສ່ວນຫລາຍເປັນຂໍ້ຄວາມອັດຕະໂນມັດ ແລະ ການໃຊ້ພາສາລາວບໍ່ຄ່ອງແຄ້ວ
- ຫາກມີຄົນຫລົງເຊື່ອໄດ້ທັກເຂົ້າໄປຫາ ເຂົາກໍຈະຕອບຮັບດ້ວຍດີ ພ້ອມຂໍຂໍ້ມູນສ່ວນຕົວ ບໍ່ວ່າຈະເປັນບັດປະຕຳຕົວ, ສຳມະໂນຄົວ ຫລື ນັງສືຜ່ານແດນ.
- ໃຫ້ໂອນຄ່າທຳນຽມກ່ອນ ເພື່ອຫັກຄ່ານາຍໜ້າ ຫລື ຄ່າເອກະສານດຳເນີນການຮັບເງິນ.
- ບັນຊີທີ່ໃຊ້ໃນການຊຳລະຄ່າທຳນຽມຈະມາໃນຮູບແບບກະເປົາດີຈິຕອລ ບໍ່ສະແດງເລກບັນຊີ.
- ພວກເຂົາໃຊ້ຂໍ້ມູນ ຫລື ບັນຊີຜູ້ທີ່ຖືກຕົວະກ່ອນໜ້ານີ້ມາເປັນເອກະສານຢັ້ງຢືນຕົວຕົນ ລໍ້ລວງເຫຍື່ອຄົນຕໍ່ໆໄປ.
ຜູ້ທີ່ຫລົງເຊື່ອກໍຈະຕົກເປັນເຫຍື່ອ ແລະ ເປັນຜູ້ຕໍ່ເຕີມວົງໃຫ້ພວກເຂົາໃຊ້ເປັນເຄື່ອງມືໃນການຫລອກລວງຄົນຕໍ່ໆໄປ.
ໃນຜ່ານມາ ທະນາຄານທຸລະກິດຕ່າງໆໃນລາວກໍໄດ້ອອກມາໂພສ ແລະ ເຕືອນສັງຄົມ ຜ່ານເພຈຫລັກຂອງຕົນເອງຢູ່ເປັນປະຈຳວ່າ ທະນາຄານຕົນເອງບໍ່ມີນະໂຍບາຍໃນການປ່ອຍເງິນກູ້ຜ່ານອອນລາຍ ຫາກພົບເຫັນຊື່ທະນາຄານຕ່າງໆຂອງລາວ ໂພສວ່າສາມາດປ່ອຍກູ້ຜ່ານອອນລາຍນັ້ນລ້ວນແລ້ວແຕ່ແມ່ນມິດສາຊີບແອບອ້າງ.
ສະນັ້ນ, ໃຫ້ທ່ອງຂຶ້ນໃຈໄວ້ເລີຍວ່າ “ຢືມເງິນງ່າຍ ໄດ້ສະດວກ ວ່ອງໄວ ຜ່ານອອນລາຍ ບໍ່ມີຢູ່ຈິງ” ເພາະໃນຄວາມເປັນຈິງແລ້ວ ການກູ້ຢືມເງິນ ຜ່ານສະຖາບັນການເງິນ ແລະ ທະນາຄານ ບໍ່ແມ່ນເລື່ອງງ່າຍ ຕ້ອງໄດ້ດຳເນີນການດ້ວຍຕົນເອງ, ມີເອກະສານຫລາຍຢ່າງຫລາຍຂັ້ນຕອນ ແລະ ມີຫລັກຊັບຄໍ້າປະກັນ ໂດຍສາມາດກູ້ໄດ້ໃນວົງເງິນທີ່ບໍ່ເກີນ 50-70% ຂອງຫລັກຊັບ.
