ອາຊຽນ ຈະຍົກລະດັບການປາບປາມ ຂະບວນການຄ້າມະນຸດທາງອອນລາຍ

ສຳນັກຂ່າວຕ່າງປະເທດລາຍງານຈາກ ເມືອງລາບວນ ບາໂຈ ປະເທດ ອິນໂດເນເຊຍ ເມື່ອວັນທີ 11 ພືດສະພາວ່າ: ກອງປະຊຸມສຸດຍອດຜູ້ນຳສະມາຊິກສະມາຄົມປະຊາຊາດແຫ່ງອາຊີ ຕາເວັນອອກສຽງໃຕ້ (ອາຊຽນ) ໄດ້ມີມະຕິຮ່ວມກັນຮັບຮອງການປະຕິຍານ ວ່າດ້ວຍການສົ່ງເສີມ ຄວາມຮ່ວມມື ແລະ ການປະສານງານເພື່ອປາບປາມການຄ້າມະນຸດອອນລາຍ ແລະ ການລະບຸຕົວຕົນເຫຍື່ອ, ລວມເຖິງ ການຍົກລະດັບການຮ່ວມມື ລະຫວ່າງເຈົ້າໜ້າທີ່ ຮັກສາກົດໝາຍ ຂອງທຸກປະເທດ ສະມາຊິກທັງໃນດ້ານການແບ່ງປັນ ແລະ ແລກປ່ຽນຂໍ້ມູນ, ການລວບລວມຫລັກຖານ ແລະ ການສືບສວນສອບສວນ.

ການເຄື່ອນໄຫວ ດັ່ງກ່າວ ຂອງອາຊຽນ ເກີດຂຶ້ນພາຍຫລັງ ອົງການ ລະຫວ່າງປະເທດເພື່ອການຍົກຍ້າຍຖິ່ນຖານ (ໄອໂອເອັມ) ເຜີຍແພ່ ບົດລາຍງານເມື່ອບໍ່ດົນມານີ້ ວ່າ: ກຳປູເຈຍ ແລະ ລາວ ພວມກາຍເປັນຈຸດໝາຍ ແຫ່ງໃໝ່ ຂອງ ຂະບວນການຄ້າມະນຸດ . ໃນຂະນະທີ່ ຂະບວນ ການເຄື່ອນໄຫວຂອງ ອາຊະຍະກອນໃນພາກພື້ນ ແຫ່ງນີ້ ໄດ້ຫັນມາໃຊ້ເຄືອຂ່າຍ ສັງຄົມອອນລາຍຫລາຍຂຶ້ນ ເພື່ອເປັນ ແພລດຟອມ ໃນການຕົວະຍົວະເຫຍື່ອ ແລະ ການດຳເນີນງານ.  ໂດຍທ່ານ ໂຈໂກວິໂດໂດ ປະທານາທິບໍດີ ອິນໂດເນເຊຍ ກ່າວວ່າ: ການປາບປາມ ອາຊະຍະກຳອອນລາຍໃນລັກສະນະນີ້ ຕ້ອງດຳເນີນການ ຢ່າງເຂັ້ມງວດ. ໃນຂະນະທີ່ ອິນໂດເນເຊຍ ໃຫ້ຄວາມຊ່ວຍເຫລືອພົນລະເມືອງຂອງຕົນເອງ ຫລາຍພັນຄົນ ເມື່ອປີກາຍນີ້ ເນື່ອງຈາກ ຖືກຕົວະຍົວະໃຫ້ເຂົ້າສູ່ ຂະບວນການຄໍລເຊັນເຕີຣ ສ່ວນໃຫຍ່ ຢູ່ໃນກຳປູເຈຍ ແລະ ມຽນມາ.

ອ້າງອີງ: ຂ່າວສານປະເທດລາວ