ລັດຖະມົນຕີກະຊວງການເງິນ ເນັ້ນໃຫ້ເຈົ້າໜ້າທີ່ ດ່ານພາສີບໍ່ເຕັນ ເອົາໃຈໃສ່ການຄຸ້ມຄອງການຈັດ ເກັບລາຍຮັບ ເພື່ອອັດຊ່ອງຫວ່າງຕ້ານການຮົ່ວໄຫລ

ວັນທີ 10 ພຶດສະພາ 2023 ຜ່ານມາ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ພ້ອມດ້ວຍຄະນະ ໄດ້ລົງຢ້ຽມຢາມບັນດາດ່ານພາສີ ພ້ອມທັງຊີ້ນໍາວຽກງານພາສີ ປະຈໍາແຂວງ ເນື່ອງໃນໂອກາດທີ່ໄປເຄື່ອນໄຫວເຮັດວຽກທີ່ແຂວງຫຼວງນໍ້າທາ ໂດຍການຕ້ອນຮັບຂອງທ່ານ ບຸນແອງ ພັນທະວົງ ຫົວໜ້າພາສີ ປະຈໍາແຂວງຫຼວງນໍ້າທາ.

ທ່ານ ບຸນແອງ ພັນທະວົງ ລາຍງານໃຫ້ຮູ້ເຖິງສະພາບຄວາມຫຍຸ້ງຍາກ ແລະ ສິ່ງທ້າທາຍ ຕໍ່ວຽກງານຂອງພາສີ ປະຈໍາແຂວງ ໂດຍສະເພາະພື້ນຖານໂຄງລ່າງຂອງພາສີ ແຂວງຫຼວງ້າທາ ຍັງບໍ່ໄດ້ມາດຖານເທົ່າທີ່ຄວນ ແລະ ຢູ່ກະແຈກກະຈາຍ ເຮັດໃຫ້ການຄຸ້ມຄອງ ແລະ ການບໍລິການຕໍ່ຜູ້ປະກອບການຍັງພົບຄວາມຫຍຸ້ງຍາກ, ຊັກຊ້າ ເຊັ່ນການນໍາເຂົ້າ-ສົ່ງອອກສິນຄ້າ ໂດຍສະເພາະ ຢູ່ດ່ານພາສີສາກົນບໍ່ເຕັນ. ປັດຈຸບັນ, ມີສາງຢູ່ສາມຈຸດ ແລະ ສາງຍັງມີຄວາມແອອັດ, ຄັບແຄບ ບໍ່ສາມາດອໍານວຍຄວາມສະດວກໄດ້ເທົ່າທີ່ຄວນ ໃນການນໍາເຂົ້າ-ສົ່ງອອກສິນຄ້າ; ແຕ່ເຖິງຢ່າງໃດກໍຕາມ, ໂດຍການຊີ້ນໍາ-ນໍາພາ ຂອງຄະນະພັກ, ຄະນະນໍາ ກະຊວງການເງິນ ກໍຄືກົມພາສີ, ພາສີ ປະຈໍາແຂວງ ຈະເອົາໃຈໃສ່ໃນການຄຸ້ມຄອງ ແລະ ຈັດເກັບລາຍຮັບເຂົ້າງົບປະມານ ໃຫ້ໄດ້ຕາມລະດັບຄາດໝາຍ ເຊິ່ງຜ່ານການຈັດຕັ້ງປະຕິບັດຕົວຈິງ ການເກັບລາຍຮັບໃນໄລຍະ 04 ເດືອນ ປີ  2023 ຜ່ານມາ ສາມາດຈັດເກັບລາຍຮັບໄດ້ທັງໝົດ 325 ຕື້ ກວ່າກີບ, ທຽບໃສ່ແຜນການປີ ປະຕິບັດໄດ້ 33,50%; ທຽບໃສ່ 04 ເດືອນ ປີ 2022 ປະຕິບັດໄດ້ພຽງ 139 ຕື້ ກວ່າກີບ, ເພີ່ມຂຶ້ນ 133% ທຽບໃສ່ໄລຍະດຽວກັນ.

ການລົງເຄື່ອນໄຫວເຮັດວຽກຄັ້ງນີ້, ທ່ານ ສັນຕິພາບ ພົມວິຫານ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ເຈົ້າໜ້າທີ່ພາສີ ແຂວງຫຼວງນໍ້າທາ ວ່າ: ຜ່ານການລາຍງານຂອງຫົວໜ້າພາສີ ປະຈໍາແຂວງ ເຫັນໄດ້ວ່າໃນໄລຍະຜ່ານມາ ການປະຕິບັດໜ້າທີ່ການເມືອງຂອງເຈົ້າໜ້າທີ່ພາສີ ໄດ້ເອົາໃຈໃສ່ຕໍ່ວຽກງານວິຊາສະເພາະຂອງຕົນ ໂດຍສະເພາະແມ່ນການຄຸ້ມຄອງການຈັດເກັບລາຍຮັບເຂົ້າງົບປະມານ ສາມາດບັນລຸໄດ້ລື່ນແຜນ ໃນ 4 ເດືອນຜ່ານມາ ສະແດງໃຫ້ເຫັນເຖິງຄວາມຮັບຜິດຊອບ, ຄວາມເອົາໃຈໃສ່ຂອງການນໍາທ້ອງຖິ່ນ ກໍຄືພະແນກການເງິນແຂວງ ທີ່ໄດ້ບຸກບືນ, ສູ້ຊົນ ສາມາດເກັບລາຍຮັບໄດ້ລື່ນແຜນ. ແຕ່ເຖິງຢ່າງໃດກໍຕາມ, ພາສີ ປະຈໍາແຂວງ ຕ້ອງໄດ້ເອົາໃຈໃສ່ຕື່ມໃນປັບປຸງກົນໄກການຄຸ້ມຄອງການຈັດເກັບລາຍຮັບ ຄຽງຄູ່ກັບການນໍາໃຊ້ເຄື່ອງມືທັນສະໄໝຊ່ວຍຈັດເກັບລາຍຮັບ ແລະ ເປັນການອັດຊ່ອງຫວ່າງ ກໍຄືການຕ້ານການຮົ່ວໄຫຼຂອງລາຍຮັບ ແລະ ເພື່ອເປັນການອໍານວຍຄວາມສະດວກ ແລະ ຫຼຸດຜ່ອນຂັ້ນຕອນໃນການແຈ້ງພາສີ.