ບານເຕະທີມຊາດລາວໄປບໍ່ເຖິງ ຕາມທີ່ປວງຊົນລາວຕັ້ງເປົ້າໝາຍ ເຊິ່ງມີຫລາຍຢ່າງຕ້ອງພັດທະນາ

ໂດຍ: ທິດກໍ່າ

ຈາກຜົນງານການໄປຮ່ວມແຂ່ງຂັນປະເພດກິລາບານເຕະຊາຍອາຍຸບໍ່ເກີນ 22 ປີຢູ່ທີ່ງານມະຫະກໍາກິລາຊີເກມຄັ້ງທີ 32 ທີ່ກໍາປູເຈຍເປັນເຈົ້າພາບ, ທີມຊາດຖືກຈັດຢູ່ໃນກຸ່ມ B ຮ່ວມກັບ ຫວຽດນາມ, ມາເລເຊຍ, ສິງກະໂປ ແລະ ໄທ  ຜົນການແຂ່ງຂັນທີມຊາດລາວຕົກລາວຕົກຮອບທໍາອິດ ໂດຍ ເສຍໃຫ້ທີມຊາດຫວຽດນາມ 0 ຕໍ່ 2, ເສຍໃຫ້ມາເລເຊຍ 1 ຕໍ່ 5, ສະເໝີສິງກະໂປ 0 ຕໍ່ 0 ແລະ ເສຍໃຫ້ທີມຊາດໄທ 4 ປະຕູຕໍ່ 1 ປັດຈຸບັນທີມຊາດລາວກໍໄດ້ເດີນທາງກັບມາຍັງດິນແດນມາຕຸພູມເປັນທີ່ຮຽບຮ້ອຍແລ້ວ. ສະແດງວ່າຜ່ານການໄປຮ່ວມແຂ່ງຂັນຊີເກມຄັ້ງນີ້ ວົງການບານເຕະລາວ ສາມາດຍາດໄດ້ພຽງ 1 ຄະແນນ.

ຢ່າງໃດກໍດີ, ຖ້າມາວິເຄາະເບິ່ງໃນແຕ່ລະເກມທີ່ມີການລົງສະໜາມໃນມື້ທໍາອິດທີ່ພົບກັບຫວຽດນາມ ເຖິງວ່າເສຍປະຕູໄປ 2 ຕໍ່ 0 ແຕ່ກໍເຫັນວ່າທີມຊາດລາວເຮົາຫລິ້ນໄດ້ດີຈົນໄດ້ໃຈກອງເຊຍໃນສະໜາມ ແລະ ນອກສະໜາມໂດຍສະເພາະຄົນລາວທີ່ຢູ່ໃນປະເທດ, ແຕ່ກໍໜ້າເສຍດາຍ ພາຍຫລັງມາແຂ່ງກັບທີມຊາດອື່ນໆທີ່ໄດ້ກ່າວມາຂ້າງເທິງປາກົດວ່າເກມແຕກ ອາດເປັນຍ້ອນເຂົາເກັ່ງກວ່າ ແລະ ການວາງແຜນເກມເຂົາກໍເໜືອກວ່າບໍຈຶ່ງບໍ່ສາມາດເຮັດໄດ້.

ຫາກຕັ້ງໂຈດກັນວ່າ, ດ້ວຍສາເຫດໃດ ວົງການບານເຕະທີມຊາດລາວຈຶ່ງລົ້ມລຸກຄຸກຄາມ ບໍ່ມີການພັດທະນາທຽບທັນກັບຊາດອື່ນໃນກຸ່ມອາຊຽນດ້ວຍກັນ. ຄໍາຕອບມັນກໍມີຢູ່ຫລາຍປັດໄຈ ອັນສໍາຄັນທີ່ສຸດມັນຂຶ້ນກັບເສດຖະກິດ-ສັງຄົມຂອງປະເທດ. ປັດຈຸບັນຕົ້ນທຶນເຮົາມັນຍັງຕໍ່າປຽບເໝືອນຢຽບເຮືອແຊມ, ການໃຊ້ຈ່າຍງົບປະມານດ້ານນີ້ຍັງອືດໆອາດໆຂາດໆເຂີນໆ. ປັດໄຈອັນທີສອງກໍແມ່ນເລື່ອງຄົນ. ການສ້າງຄົນຢູ່ບ້ານເຮົາມັນບໍ່ທັນໄປຕາມລະບົບ, ມາດຕະຖານຄົບເຄື່ອງ, ຫຸ່ນຮ່າງກໍຍັງນ້ອຍ, ການກິນຢູ່ບໍ່ພຽງພໍ, ນັກກິລາທີ່ສັງກັດເປັນທີມຊາດຍັງບໍ່ເປັນອາຊີບທີ່ເຕັມຕົວ ສ່ວນຫລາຍເປັນພຽງຈິດໃຈມັກ, ສະໝັກ ແລະ ມີພອນສະຫວັນ ແລະ ປັດໄຈອັນທີສາມກໍແມ່ນບັນຫາການສົ່ງເສີມວຽກງານກິລາຢູ່ບ້ານເຮົາຍັງບໍ່ທັນແຂງແຮງເຕັມທີ່, ບໍ່ມີສະໂມສອນກິລາອາຊີບ, ບໍ່ມີການແກ້ງແຍ່ງແຂ່ງຂັນທີ່ຫລາກຫລາຍ ລາມໄປຮອດການບໍລິຫານຈັດການກໍເປັນໄປໃນສະພາບຕາມມີຕາມເກີດ ຜົນທີ່ໄດ້ຮັບເມື່ອໄປແຂ່ງຢູ່ໃສກໍໄດ້ແຕ່ທີຂີ້ໂຫລ້ຍ. ອັນທີ່ເຫັນມີການປ່ຽນແປງແດ່ໃນສະໄໝນີ້ຄືບໍ່ໄດ້ຍິນຂ່າວວ່າມີການລົ້ມບານ, ສ່ວນການປ່ຽນແປງອັນທີສອງແມ່ນມີວິໄສທັດດຶງເອົາຄົນເຊື້ອສາຍລາວເຂົ້າມາເສີມທັບຈໍານວນໜຶ່ງ. ບາດມາເບິ່ງບ້ານເຂົາມີຮອດຝັ່ງດັງໂມ, ມີທັງຜິວດໍາຜິວຂາວ ແຕ່ຈະເຮັດຈັ່ງໃດ ເຮົາພັດທະນາໄດ້ສໍ່ານີ້ ເຂົາພັດຍິ່ງໄປໄກຕັ້ງຫລາຍພັນລີ້.

ທີ່ຮູ້ນໍາກັນແລ້ວວ່າ, ບານເຕະເປັນປະເພດກິລາຍອດນິຍົມທີ່ຊາວໂລກໃຝ່ຝັນ, ໃຫ້ຄວາມສົນໃຈຫລາຍກວ່າກິລາປະເພດອື່ນໆ ເພາະມັນມີຈຸດພິເສດຢູ່ບ່ອນວ່າ ໃຊ້ຈໍານວນພົນຫລາຍ, ຫລິ້ນແບບເປັນທີມງານ, ໃຊ້ທັກສະກໍາລັງແຮງ, ມີຍຸດທະວິທີສິລະປະຍຸດ ແລະ ເຕັກນິກໃນການຫລິ້ນຢ່າງຄ່ອງແຄ້ວວ່ອງໄວ, ຖ້າຢາກຊະນະຝ່າຍກົງກັນຂ້າມ ກໍຕ້ອງມີການຝຶກແອບຢ່າງຈິງຈັງລຽນຕິດ, ໃຊ້ທຶນຮອນມະຫາສານທີ່ຈະພັດທະນາໃຫ້ກ້າວໄກ. ໃນອະນາຄົດອັນບໍ່ໄກນີ້ ຄົນລາວ, ເຊື້ອສາຍລາວທຸກຄົນກໍຢາກເຫັນບານເຕະທີມຊາດລາວມີການພັດທະນາດີຂຶ້ນຢ່າງວ່ອງໄວຄືກັນກັບປະເທດອື່ນໃນກຸ່ມອາຊຽນ ແລະ ພາກພື້ນ, ບໍ່ຢາກເຫັນໄປແຂ່ງຢູ່ໃສກໍໄດ້ແຕ່ໄຂ່ເປັດໄຂ່ໄກ່ມາຕ້ອນແມ່ບັກຄໍາໂຕຍ.