ລາວ-ຈີນ ກະກຽມຈັດງານວັນການທ່ອງທ່ຽວພູເຂົາສາກົນ ຄັ້ງທີ 5 ແລະ ກອງປະຊຸມປິ່ນອ້ອມທີ່ ສປປ ລາວ
ສປປ ລາວ ແລະ ສປ ຈີນ ໄດ້ມີຄວາມເຫັນເປັນເອກະພາບກັນໃນການຈັດງານ ວັນການທ່ອງທ່ຽວພູເຂົາສາກົນ ຄັ້ງທີ 5 ແລະ ກອງປະຊຸມປິ່ນອ້ອມກ່ຽວຂ້ອງ ທີ່ ສປປ ລາວ, ໂດຍໃນວັນທີ 11 ພຶດສະພາ 2023 ຜູ້ຕາງໜ້າສະຫະພັນການທ່ອງທ່ຽວ ພູເຂົາສາກົນ ໄດ້ເຂົ້າພົບ ທ່ານ ອຸ່ນທວງ ຂາວພັນ, ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ(ຖວທ) ເພື່ອປຶກສາຫາລືການກະກຽມງານດັ່ງກ່າວພາຍໃຕ້ຫົວຂໍ້ “ມ່ວນຊື່ນໃນຄວາມມະຫັດສະຈັນຂອງພູເຂົາ, ເພື່ອຟື້ນຟູອຸດສາຫະກຳການທ່ອງທ່ຽວ”.
ໂອກາດນີ້, ທ່ານ ຮອງລັດຖະມົນຕີ ກະຊວງ ຖວທ ໄດ້ສະແດງຄວາມຍິນດີຕ້ອນຮັບ ແລະ ຍ້ອງຍໍຊົມເຊີຍຂອບໃຈ ມາຍັງສະຫະພັນທີ່ໄດ້ເລືອກເອົາ ສປປ ລາວ ເປັນສະຖານທີ່ຈັດງານໃນຄັ້ງນີ້ ທັງໄດ້ເອົາໃຈໃສ່ຫ້າງຫາກະກຽມຈັດງານດັ່ງກ່າວຢ່າງມີຜົນສຳເລັດຫລາຍດ້ານ ແລະ ໄດ້ຕີລາຄາສູງ ຕໍ່ການຈັດຕັ້ງປະຕິບັດກິດຈະກຳດັ່ງກ່າວ. ເຊິ່ງຈະເປັນໂອກາດອັນດີໃນການເປີດກວ້າງການຮ່ວມມືດ້ານການທ່ອງທ່ຽວ, ເພາະ ສປປ ລາວ ກໍມີທ່າແຮງໃນການທ່ອງທ່ຽວພູເຂົາ. ພາຍຫລັງການຟື້ນຟູອຸດສາຫະກຳການທ່ອງທ່ຽວຂອງໂລກຈາກການແຜ່ລະບາດຂອງພະຍາດໂຄວິດ-19 ກໍໄດ້ມີກິດຈະກຳສົ່ງເສີມການທ່ອງທ່ຽວ ຢູ່ ສປປ ລາວ ຢ່າງຕໍ່ເນື່ອງໂດຍສະເພາະພິທີຕ້ອນຮັບນັກທ່ອງທ່ຽວ ແລະ ຜູ້ໂດຍສານທີ່ເດີນທາງໃນຂະບວນທຳອິດການເປີດບໍລິການໂດຍສານສາກົນ ລົດໄຟລາວ-ຈີນ ຄັ້ງວັນທີ 13 ເມສາ 2023 ທີ່ສະຖານີລົດໄຟ ນະຄອນຫລວງວຽງຈັນ ແລະ ບໍ່ເຕັນແຂວງຫລວງນ້ຳທາ ຜ່ານມາ ອັນໄດ້ກາຍເປັນຂີດໝາຍທີ່ເຕັມໄປດ້ວຍຄວາມໝາຍຄວາມສໍາຄັນຕໍ່ປະຊາຊົນສອງຊາດ ລາວ-ຈີນ ໂດຍສະເພາະຕໍ່ວຽກງານສົ່ງເສີມການທ່ອງທ່ຽວ ຖືວ່າເປັນການໂຄສະນາການທ່ອງທ່ຽວລາວໃຫ້ແກ່ຕະຫລາດທ່ອງທ່ຽວ ສປ ຈີນໃຫ້ກວ້າງຂວາງ.
ເຊິ່ງງານດັ່ງກ່າວ ປະກອບມີຫລາຍກິດຈະກຳທີ່ຈະຈັດຕັ້ງຂຶ້ນ ເປັນຕົ້ນ:ການວາງສະແດງບັນດາຮູບພາບແຫລ່ງທ່ອງທ່ຽວທາງພູເຂົາ, ເຄື່ອງຫັດຖະກຳ, ວັດທະນະທຳ ແລະ ຜະລິດຕະພັນການທ່ອງທ່ຽວລາວ ແລະ ກິດຈະກໍາປິ່ນອ້ອມອື່ນໆ. ໂດຍຈະຈັດຂຶ້ນໃນລະຫວ່າງວັນທີ 28 ພຶດສະພາ ຫາ 1 ມີຖຸນາ 2023 ທີ່ນະຄອນຫລວງວຽງຈັນ ແລະ ແຂວງຫລວງພະບາງ.
