ສປປ ລາວ ແລະ ແຂວງເສສວນ ສປ ຈີນ ເສີມຂະຫຍາຍການຮ່ວມມືການຄ້າ-ການລົງທຶນ ແລະ ການຄ້າຊາຍແດນ ລາວ-ຈີນ
ວັນທີ 10 ພຶດສະພາ 2023 ທີ່ຫ້ອງຮັບແຂກກະຊວງອຸດສາຫະກໍາ ແລະ ການຄ້າ, ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ຕ້ອນຮັບການເຂົ້າຢ້ຽມ ແລະ ພົບປະ ຂອງທ່ານ Yang Xingping (ຢາງ ຊິງປິງ) ຮອງເຈົ້າແຂວງ ເສສວນ ແຫ່ງ ສາທາລະນະລັດ ປະຊາຊົນຈີນ ພ້ອມຄະນະທັງສອງຝ່າຍເຂົ້າຮ່ວມ.
ການພົບປະສອງຝ່າຍ ເພື່ອເປັນການເສີມຂະຫຍາຍການຮ່ວມມື ດ້ານການຄ້າ ແລະ ອຸດສາຫະກຳ ລະຫວ່າງ ສປປ ລາວ ແລະ ແຂວງ ເສສວນ ສປ ຈີນ, ເສີມຂະຫຍາຍການຮ່ວມມືວຽກງານໂຄງການດ້ານວິສາວະກຳ ແລະ ການກໍ່ສ້າງ ເປັນຕົ້ນໂຄງການກໍ່ສ້າງ Logisitcs, ການເສີມຂະຫຍາຍການຮ່ວມມືດ້ານການປຸງແຕ່ງ ແລະ ພັດທະນາແຮ່ທາດ ເປັນຕົ້ນ ການປຸງແຕ່ງແຮ່ທາດ ແລະ ການເສີມຂະຫຍາຍການຮ່ວມມືດ້ານການພັດທະນາກະສິກຳ ແລະ ອື່ນໆ. ພ້ອມນັ້ນກໍຊຸກຍູ້ສົ່ງເສີມການຄ້າ-ການລົງທຶນ ແລະ ການຄ້າຊາຍແດນ ລາວ-ຈີນ, ການພັດທະນານິຄົມອຸດສາຫະກຳ ລຽບຕາມແລວທາງລົດໄຟ ລາວ-ຈີນ ແລະ ການອຳນວຍຄວາມສະດວກໃນການຂົນສົ່ງສິນຄ້າ ຜ່ານທາງລົດໄຟ ລາວ-ຈີນ ຕໍ່ ເອີຣົບ
ໂອກາດນີ້, ທ່ານ ຮອງລັດຖະມົນຕີ ກະຊວງ ອຄ ໄດ້ສະແດງຄວາມຊົມເຊີຍຕໍ່ ທ່ານ Yang Xingping (ຢາງ ຊິງປິງ) ພ້ອມດ້ວຍຄະນະ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອ ເປັນຕົ້ນ: ສິດທິພິເສດທາງດ້ານການຄ້າ 98% ຂອງລາຍການສິນຄ້າທັງໝົດສົ່ງອອກໄປຈີນ, ສິດທິພິເສດ ແລະ ໂຄຕ້ານຳເຂົ້າສິນຄ້າເປັນຕົ້ນເຂົ້າ ແລະ ພືດພັກ, ໂຄງການຊ່ວຍເຫລືອການຈັດຕັ້ງປະຕິບັດແຜນວຽກຂອງ ສປປ ລາວ (2021-2025) ເພື່ອຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ (AEC) 2025 ແລະ ໂຄງການປັບປຸງລະບົບ ICT, ໂຄງການກອງທຶນພິເສດ ແມ່ນ້ຳຂອງ-ແມ່ນ້ຳລ້ານຊ້າງ, ການຍົກລະດັບວິຊາການ ແລະ ເຕັກນິກ, ພາຫະນະ, ວັດຖຸອຸປະກອນ ແລະ ອື່ນໆ.
ໂອກາດດຽວກັນ, ທ່ານ Yang Xingping (ຢາງ ຊິງປິງ) ກໍສະແດງຄວາມຮູ້ສຶກເປັນກຽດ ແລະ ດີໃຈເປັນຢ່າງຍິ່ງ ທີ່ທ່ານຮອງລັດຖະມົນຕີ ໄດ້ຕ້ອນຮັບການເຂົ້າປະຢ້ຽມຢາມ ແລະ ພົບປະ ທີ່ເລິກເຊິ່ງດ້ານວິຊາການເປັນຕົ້ນດ້ານນະໂຍບາຍການຄ້າ ແລະ ການລົງທຶນ ລະຫວ່າງ ສປປ ລາວ-ສປ ຈີນ ເພື່ອໃຫ້ເກີດຜົນປະໂຫຍດທີ່ດີໃຫ້ແກ່ສອງປະເທດ.
