ປີ 2022 ຜ່ານມາ ຫວຍພັດທະນາ ມອບພັນທະໃຫ້ລັດ 218,80 ຕື້ກີບ ແລະ 3 ເດືອນຕົ້ນປີ 2023 ມອບພັນທະໃຫ້ລັດ 57,61 ຕື້ກີບ

ກອງປະຊຸມສາມັນສະພາບໍລິຫານບໍລິສັດລັດ ວິສາຫະກິດ ຫວຍພັດທະນາປະຈໍາປີ 2023 ຄັ້ງທີ I ໄດ້ຈັດຂຶ້ນທ້າຍອາທິດຜ່ານມາ ທີ່ສໍານັກງານໃຫຍ່ບໍລິສັດລັດ ວິສາຫະກິດ ຫວຍພັດທະນາ, ໂດຍການເປັນປະທານຂອງທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ, ປະທານສະພາບໍລິຫານບໍລິສັດລັດ ວິສາຫະກິດ ຫວຍພັດທະນາ ພ້ອມມີຄະນະສະພາບໍລິຫານ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ທ່ານ ຄໍາເຜັ່ນ ບຸບຜາວົງ ຜູ້ອໍານວຍການບໍລິສັດລັດ ວິສາຫະກິດ ຫວຍພັດທະນາ ລາຍງານຜົນການເຄື່ອນໄຫວດໍາເນີນທຸລະກິດຂາດຕົວປະຈໍາປີ 2022 ແລະ ການເຄື່ອນໄຫວດໍາເນີນທຸລະກິດປະຈໍາງວດ I ປີ 2023, ດ້ານລາຍຮັບປະຕິບັດໄດ້ເທົ່າກັບ 355,93 ຕື້ກີບ ຫລື ເທົ່າກັບ 150,81% ຂອງແຜນການປີ 2022 ລື່ນແຜນການປີ  50,81% ມອບພັນທະງົບປະມານໃຫ້ລັດ 218,80 ຕື້ກີບ ຫລື ເທົ່າກັບ 157,16% ຂອງແຜນການ ລື່ນແຜນການປີ 57,16%.

ສໍາລັບການເຄື່ອນໄຫວດໍາເນີນທຸລະກິດປະຈໍາງວດ I (3 ເດືອນຕົ້ນປີ 2023)   ດ້ານລາຍຮັບປະຕິ ບັດໄດ້ 116,21 ຕື້ກີບ ຫລື ເທົ່າກັບ 130,24% ຂອງແຜນການລື່ນແຜນການປີ 30,24% ມອບພັນທະໃຫ້ລັດ 57,61 ຕື້ກີບ ຫລື ເທົ່າກັບ 146,48% ຂອງແຜນການລື່ນແຜນການປີ 46,48% ຄຽງຄູ່ກັບວຽກງານການດໍາເນີນທຸລະກິດບໍລິສັດຍັງໄດ້ເອົາໃຈໃສ່ການປະກອບສ່ວນຊ່ວຍເຫລືອສັງຄົມເປັນຕົ້ນວຽກງານສຶກສາ, ສາທາ, ສະມາຄົມຄົນພິການ ແລະ ອື່ນໆ ປີ 2022 ລວມມູນຄ່າ 3,60 ຕື້ກີບ ຈາກຜົນງານດັ່ງກ່າວສະແດງໃຫ້ເຫັນເຖິງການດໍາເນີນທຸລະກິດຫວຍພັດທະນາມີການເຕີບໃຫຍ່ຂະຫຍາຍຕົວຂຶ້ນເທື່ອລະກ້າວ ແລະ ຜົນງານທີ່ຍາດມາໄດ້ນັ້ນຍ້ອນມີການຊີ້ນໍາ-ນໍາພາຂອງຂັ້ນເທິງກໍຄືກະຊວງການເງິນ ແລະ ພາກສ່ວນກ່ຽວຂ້ອງທີ່ອໍານວຍຄວາມສະດວກໃຫ້ແກ່ການເຄື່ອນໄຫວດໍາເນີນທຸລະກິດ.