ສະມາຄົມປີ້ງໄກ່ເຊໂນ ສະເໜີໃຫ້ພະແນກອຸດສາຫະກໍາ-ການຄ້າແຂວງສະຫວັນນະເຂດ ຊ່ວຍເຫລືອເລື່ອງຄ່າເຊົ່າແພງ

ວັນທີ 9 ພຶດສະພາ 2023, ສະມາຄົມປີ້ງໄກ່ເຊໂນ ເມືອງອຸທຸມພອນ ແຂວງສະຫວັນນະເຂດ ໄດ້ສະເໜີໃຫ້ພະແນກອຸດສາຫະກໍາ-ການຄ້າແຂວງ ທີ່ລົງມາພົບປະກັບສະມາຄົມ ເພື່ອປຶກສາຫາລືໃຫ້ການຊ່ວຍເຫລືອກ່ຽວກັບຄ່າເຊົ່າແພງ ພາຍຫລັງທີ່ສ້ອມແປງສໍາເລັດ. ໜຶ່ງໃນຕົວແທນສະມາຄົມປີ້ງໄກ່ເຊໂນ ໄດ້ສະເໜີວ່າ: ຄ່າເຊົ່າບ່ອນຂາຍປີ້ງໄກ່ລາດທີ່ເພິ່ນກໍາລັງສ້ອມແປງຢູ່ນັ້ນມີລາຄາເຊົ່າ 3-5 ລ້ານກີບ ຕໍ່ຫ້ອງ ຕໍ່ເດືອນ ຍັງບໍ່ທັນໄດ້ນັບທັງຄ່ານໍ້າ, ຄ່າໄຟຟ້າ ຖືວ່າແພງເກີນໄປ, ດັ່ງນັ້ນຈຶ່ງຢາກໃຫ້ທາງພາກສ່ວນຮັບຜິດຊອບແກ້ໄຂຊ່ວຍ, ຖ້າວ່າຄ່າເຊົ່າຢູ່ໃນລະດັບ 5 ແສນ ຫາ 1 ລ້ານກີບ ຕໍ່ຫ້ອງ ຕໍ່ເດືອນ ແມ່ນສາມາດຢູ່ໄດ້.

ໂອກາດດັ່ງກ່າວ, ທ່ານ ວັນແສງ ແກ້ວບຸນພັນ ຫົວໜ້າ ພະແນກອຸດສາຫະກໍາ-ການຄ້າແຂວງ ໄດ້ຮັບເອົາຄໍາສະເໜີຂອງສະມາຄົມໄປສະເໜີຕໍ່ຂັ້ນເທິງ ພິຈາລະນາແກ້ໄຂຕາມສະພາບຄວາມເປັນຈິງ. ພ້ອມນີ້ກໍເນັ້ນໃຫ້ແມ່ຄ້າ ຫລື ບັນດາຮ້ານປີ້ງໄກ່ລາດແຕ່ລະຮ້ານທີ່ໄດ້ເຄື່ອງໝາຍໂອດ໊ອບ ແລະ ຍັງບໍ່ທັນໄດ້ໂອດ໊ອບ ຕ້ອງໄດ້ມີການພັດທະນາການຫຸ້ມຫໍ່, ຮັກສາສຸຂະອະນາໄມ ແລະ ເພີ່ມຄວາມດຶງດູດຜູ້ບໍລິໂພກ, ສ້າງຄວາມເຊື່ອໝັ້ນໃຫ້ຜູ້ບໍລິໂພກ, ຮັກສາເອກະລັກປີ້ງໄກ່ລາດເຊໂນໃຫ້ຢັ້ງຢືນ ເພາະວ່າປິ້ງໄກ່ລາດເຊໂນແມ່ນມີຊື່ສຽງ ເປັນທີ່ຮູ້ຈັກຂອງຄົນທົ່ວປະເທດເຮົາ.

ນອກນີ້, ທ່ານ ບຸນທະວີ ສີສຸມັງ ຮອງຫົວໜ້າຫ້ອງການອຸດສາຫະກໍາ-ການຄ້າ ເມືອງອຸທຸມພອນ ລາຍງານຕື່ມວ່າ: ພາຍຫລັງທີ່ກຸ່ມ ຫລື ສະມາຄົມຜູ້ຜະລິດປີ້ງໄກ່ລາດເຊໂນ ໄດ້ຮັບອະນຸຍາດໃຫ້ນໍາໃຊ້ກາໝາຍຢ່າງເປັນທາງການແລ້ວ, ເຫັນວ່າໄດ້ຮັບຄວາມນິຍົມເປັນທີ່ຕ້ອງການຂອງສັງຄົມພາຍໃນ ແລະ ນັກທ່ອງທ່ຽວພາຍນອກຫລາຍຂຶ້ນ ແລະ ມາຮອດປັດຈຸບັນມີຈໍານວນສະມາຊິກທັງໝົດ 52 ຮ້ານ, ເຊິ່ງມີຍອດຂາຍແຕ່ລະວັນປະມານ 1.200 ຫາ 1.500 ໂຕ.

ແຫລ່ງຂ່າວ: ເມືອງອຸທຸມພອນ