ເມສຊີ ບັນລຸຂໍ້ຕົກລົງຍ້າຍໄປຫລິ້ນລີກຊາອຸດິອາຣະເບຍ ລະດູການໜ້າ

ສຳນັກຂ່າວ ເອເຟພີ ລາຍງານວ່າ ລີໂອເນລ ເມສຊີ ກອງໜ້າ ປາຣີສ ແຊງ ແຊັກແມັງ ບັນລຸຂໍ້ຕົກລົງໃນການຍ້າຍໄປຫລິ້ນໃນລີກຊາອຸດິອາຣະເບຍລະດູການໜ້າພາຍໃຕ້ການຊື້ຂາຍທີ່ມີມູນຄ່າມະຫາສານ ແຕ່ຍັງບໍ່ມີການລະບຸວ່າລາວຈະໄປຫລິ້ນໃຫ້ສະໂມສອນໃດ.

ສຳລັບ ເມສຊີ ພວມຈະຫມົດສັນຍາກັບ ເປແອສເຊ ຫລັງຈົບລະດູການນີ້ ແລະ ຍັງບໍ່ມີການຂະຫຍາຍອອກໄປເຊິ່ງບັນດາສື່ດັງລາຍງານກົງກັນວ່າ ດາວເຕະອາຍຸ 35 ປີ ຕັດສິນໃຈທີ່ຈະບໍ່ຕໍ່ສັນຍາ ແລະ ຍ້າຍອອກຈາກທີມຫລັງຢູ່ມາ 2 ລະດູການ.

ທີ່ຜ່ານມາ ເມສຊີ ຕົກເປັນຂ່າວເຊື່ອມໂຍງການຫລາຍສະໂມສອນທີ່ສົນໃຈດຶງຕົວລາວໄປຮ່ວມທີມ ທັງບາເຊໂລນາ ອະດີດຕົ້ນສັງກັດເກ່ົາ, ອິນເຕີ ໄມອາມີ ທີມໃນເມເຈີ ລີກ ສະຫະລັດ ແລະ ອັລ ຮິລາລ ສະໂມສອນໃນຊາອຸດິ ໂປຣ ລີກ ແຕ່ຍັງບໍ່ມີການຕົກລົງໃດ.

ຫລ້າສຸດ ເອເອຟພີ ອ້າງອີງຈາກແຫລ່ງຂ່າວວ່າ ເມສຊີ ໄດ້ບັນລຸຂໍ້ຕົກລົງໃນການຍ້າຍໄປຫລິ້ນໃນລີກຊາອຸດິອາຣະເບຍ ລະດູການໜ້າແລ້ວ ດ້ວຍຄ່າຕົວມະຫາສານ ແຕ່ຍັງບໍ່ມີການຢືນຢັນເລື່ອງສະໂມສອນທີ່ລາວຈະໄປຫລິ້ນນຳ.

“ ເມສຊີ ບັນລຸຂໍ້ຕົກລົງແລ້ວ ລາວຈະຫລິ້ນໃນຊາອຸດີອາຣະເບຍໃນລະດູການໜ້າ ສັນຍານີ້ພິເສດ ແລະ ຍິ່ງໃຫຍ່ຫລາຍ ເຮົາພວມສະຫລຸບລາຍລະອຽດເລັກໆນ້ອຍ ” ແຫລ່ງຂ່າວລະບຸ.