ຊ້າງປ່າ ທຳລາຍຜົນລະປູກ ຂອງປະຊາຊົນ ເສຍຫາຍຫລາຍກວ່າ 40 ລ້ານກີບ
ຫ້ອງການກະສິກຳ ແລະ ປ່າໄມ້ ເມືອງຫລາ, ແຂວງອຸດົມໄຊ ລາຍງານໃຫ້ຮູ້ວ່າ: ໃນໄລຍະຜ່ານມາ, ຊ້າງປ່າເຂົ້າມາທຳລາຍຜົນລະປູກ, ຕູບ ແລະ ຖຽງນາຂອງປະຊາຊົນ ທີ່ເຮັດນາຢູ່ເຂດຫ້ວຍສະກໍ ບ້ານພູແທນ ເມືອງຫລາ ລວມມູນຄ່າເສຍຫາຍປະມານ 40 ລ້ານກວ່າກີບ (ຄັ້ງນີ້ເປັນຄັ້ງທີສາມຈາກການທຳລາຍຂອງຊ້າງປ່າ) ໂດຍອົງການຈັດຕັ້ງບ້ານ ແລະ ກຸ່ມຄອບຄົວ ທີ່ໄດ້ຮັບຜົນກະທົບ ໄດ້ສະເໜີ ແລະ ຮຽກຮ້ອງໃຫ້ອົງການປົກຄອງເມືອງ ແລະ ພາກສ່ວນກ່ຽວຂ້ອງທຸກຂັ້ນ ເຂົ້າມາຊ່ວຍເຫລືອ ແລະ ແກ້ໄຂບັນຫາດັ່ງກ່າວ.
ຕາມການລາຍຂອງປະຊາຊົນ ໃນເຂດດັ່ງກ່າວໃຫ້ຮູ້ວ່າ: ຝຸງຊ້າງປ່າ ມີປະມານ 22 ໂຕ ໄດ້ເຂົ້າມາອາໄສຢູ່ເຂດຫ້ວຍຊະ ບ້ານພູແທນ ແຕ່ສົກປີ 2011-2012 ເປັນຕົ້ນມາ ໂດຍໄດ້ແຍກກັນຢູ່ເປັນ 2 ຝູງ, ຝູງໜຶ່ງມີ 18 ໂຕ ແລະ ອີກຝູງໜຶ່ງ ຢູ່ຝາກເບື້ອງປ່າໜໍ່ຂົມຂອງບ້ານພູແທນ ຄາດວ່າຈະມີປະມານ 4 ໂຕ, ເຊິ່ງມັນໄດ້ເຂົ້າທຳລາຍຜົນລະປູກ ແລະ ຕູບ-ຖຽງນາຂອງປະຊາຊົນມາຕະຫລອດ, ຈຶ່ງເຮັດໃຫ້ປະ ຊາຊົນຈໍານວນ 15 ຄອບຄົວ ທີ່ເຮັດນາຢູ່ເຂດຫ້ວຍຊະຕອນໃຕ້ ໄດ້ຢຸດເຮັດນາປະເປັນນາເຮື້ອ, ຍັງເຫລືອ 9 ຄອບຄົວ ທີ່ຍັງສືບຕໍ່ເຮັດນາຢູ່ເຂດຫ້ວຍສະກໍ ຕອນເໜືອ ຈົນເຖິງປັດຈຸບັນ ໃນເນື້ອທີ່ທັງໝົດ 4.6 ເຮັກຕາ, ຜົນຜະລິດເຂົ້ານາໄດ້ 16 ໂຕນຕໍ່ປີ.
ມາຮອດໄລຍະທ້າຍເດືອນມີນາ ຫາ ຕົ້ນເດືອນເມສາ ປີ 2023 ນີ້, ຝຸງຊ້າງປ່າດັ່ງກ່າວໄດ້ເຂົ້າມາທຳລາຍຜົນລະປູກ, ຕູບ ແລະ ຖຽງນາ ລວມທັງເຄື່ອງໃຊ້ໃນຄົວເຮືອນ ແລະ ອຸປະກອນການຜະລິດຂອງປະຊາຊົນຈຳນວນ 3 ຄັ້ງຄື: ຄັ້ງທຳອິດ ໃນວັນທີ 24 ມີນາ 2023 ຊ້າງໄດ້ມາທຳລາຍ ຕູບນາ ຂອງປະຊາຊົນຈຳນວນ 3 ຕຸບ, ປະກອບມີ 5 ຄອບຄົວ; ຄັ້ງທີສອງ ໃນວັນທີ 4 ເມສາ 2023 ຝູງຊ້າງປ່າ ໄດ້ກັບມາທຳລາຍ ຖຽງນາຈຳນວນ 2 ຫລັງ, ປະກອບມີ 3 ຄອບຄົວ ແລະ ຄັ້ງຫລ້າສຸດໃນວັນທີ 7 ເມສາ 2023 ຝູງຊ້າງດັ່ງກ່າວ ກໍໄດ້ກັບມາທຳລາຍ ຖຽງນາ 1 ຫລັງ, ມີ 1 ຄອບຄົວ ລວມມູນຄ່າເສຍຫາຍທັງໝົດ 40 ລ້ານກວ່າກີບ.
