ຟີລິບປິນ ບຸກທຳລາຍແກ໊ງຄໍເຊັນເຕີ ຊ່ວຍຜູ້ຕົກເປັນເຫຍື່ອຫລາຍກວ່າ 1,000 ຄົນ ທີ່ຖືກບັງຄັບໃຫ້ເຮັດວຽກມື້ໜຶ່ງ 18 ຊົ່ວໂມງ
ສຳນັກຂ່າວຕ່າງປະເທດຈາກນະຄອນຫລວງມະນີລາ ປະເທດຟີລິບປິນລາຍງານວ່າ : ໃນວັນທີ 7 ພຶດສະພາ 2023 ນີ້ ທາງການຟີລິບປິນໄດ້ຊ່ວຍເຫລືອຜູ້ທີ່ຕົກເປັນຫຍື່ອຫລາຍກວ່າ 1,000 ຄົນ ຈາກຫລາຍປະເທດໃນທະວີບອາຊີ ເຊິ່ງຕົກເປັນເຫຍື່ອຂອງຂະບວນການຄ້າມະນຸດທີ່ຖືກກັກຂັງໜ່ວງໜ່ຽວ ແລະ ຖືກບັງຄັບໃຫ້ຫລອກລວງທາງອອນລາຍ.
ທ່ານ ນາງ ມິເຊວ ຊາບິໂນ ໂຄສົກປະຈຳກຸ່ມຕໍ່ຕ້ານອາຊະຍາກຳທາງໄຊເບີ ຂອງກອງກຳລັງຕຳຫລວດແຫ່ງຊາດຟີລິບປິນ ກ່າວວ່າ: ເຈົ້າໜ້າທີ່ບຸກຄົ້ນອາຄານຫລາຍແຫ່ງໃນເມືອງ ທາບາລາກັດ ເຊິ່ງຢູ່ຫ່າງຈາກນະຄອນຫລວງມະນີລາໄປທາງເໜືອປະມານ 90 ກິໂລແມັດ, ຕຳຫລວດສາມາດຊ່ວຍເຫລືອຜູ້ທີ່ຕົກເປັນເຫຍື່ອທັງໝົດ 1,090 ຄົນ, ເຊິ່ງຖືກບັງຄັບໃຫ້ດຳເນີນການຫລອກລວງທາງອອນລາຍ ໂດຍການຫລອກລວງໃຫ້ລູກຄ້າຊື້ສະກຸນເງິນດິຈິຕອນ ຫລື ຝາກເງິນເຂົ້າບັນຊີທະນາຄານປອມ ,ທຸກຄົນທີ່ຕົກເປັນເຫຍື່ອຖືກຢຶດໜັງສືເດີນທາງ ແລະ ຕ້ອງເຮັດວຽກດົນເຖິງ 18 ຊົ່ວໂມງ/ວັນ ອີກທັງຈະຖຶກຫັກເງິນເດືອນ ຫາກມີການພົວພັນກັບຄົນຮ່ວມງານ ຫລື ຢຸດພັກເປັນເວລາດົນ..ຜູ້ທີ່ຕົກເປັນເຫຍື່ອສ່ວນຫລາຍເປັນຄົນຈີນ, ຫວຽດນາມ, ຟີລິບປິນ, ອິນໂດເນເຊຍ, ມາເລເຊຍ, ໄທ, ໄຕ້ຫວັນ, ຮ່ອງກົງ, ມຽນມາ,ເນປານ ແລະ ລາວ
ຂໍ້ມູນອ້າງອີງ: AFP, https://www.dailynews.co.th/news/2301675/
